Baćkoŭ vyklikajuć u škoły, kab adhavaryć vučyć dziaciej za miažoj
U Biełarusi znoŭ aktyvizavali baraćbu z pastupleńniem abituryjentaŭ za miažu. Baćkoŭ niekatorych vučniaŭ vyklikajuć na razmovu z nastaŭnikami i administracyjaj.
Pytalisia, što nie padabajecca ŭ Biełarusi
«Ideałahičnaja apracoŭka idzie ad samaha pačatku navučalnaha hoda. U škołu rehularna prychodziać ideołahi, jakija raspaviadajuć dzieciam, jak vydatna žyć u Biełarusi, jakija vialikija pierśpiektyvy ich tut čakajuć.
Paralelna z hetym raskazvajuć, jak drenna žyviecca biełarusam u Jeŭropie, jak tam jany nikomu nie buduć patrebnyja», — raspaviadaje mama adzinaccacikłaśnika.
Maci vypusknika kaža, što ŭ lutym u vypusknych kłasach pravodzili ankietavańnie, dzie byli pytańni pra toje, kudy vučni źbirajucca pastupać.
«Zdajecca, heta narmalnaja praktyka, bo ŭ starejšaha syna taksama byli padobnyja apytańni, kali jon vučyŭsia ŭ 11-m kłasie. Ale piać hadoŭ tamu nikoha asabliva nie turbavaŭ toj fakt, što školnik źbirajecca pastupać za miažu.
Ciapier ža baćkoŭ, čyje dzieci napisali, što źbirajucca vučycca za miažoj, vyklikajuć u škołu», — pryznajecca žančyna.
Administracyja sprabuje pierakanać baćkoŭ, kab ich dzieci zastavalisia ŭ Biełarusi, a nie vyjazdžali na Zachad.
«Pačali raskazvać, jak biełaruskaja dziaržava kłapocicca pra moładź, pra pierśpiektyvy, jakija ich tut čakajuć. Pytalisia, što nam nie padabajecca ŭ Biełarusi, kali my źbirajemsia adpraŭlać dziaciej za miažu», — zhadvaje žančyna.
Surazmoŭca adznačaje, što prynamsi dyrektarka škoły padčas razmovy pavodziła siabie tak, byccam vieryć u toje, što kaža.
«Z kłasnym kiraŭnikom było razmaŭlać praściej, bo jana ščyra skazała, što vymušana ŭsio heta rabić praź cisk z boku administracyi, pakolki vysoki pracent pastupleńniaŭ za miažu — heta drenna dla škoły. A voś dyrektarka vielmi padobnaja da idejnaj łukašystki», — pryznajecca surazmoŭca.
«Pravilny» adkaz u ankiecie nie harantuje spakoju
Jašče adnych baćkoŭ zaprasili na razmovu ŭ škołu, navat niahledziačy na toje, što ich dačka ŭ ankiecie nie paznačała, što źbirajecca źjazdžać.
«My jašče ź minułaha hoda viedali ad znajomych, što na pytańni ŭ toj ankiecie treba adkazvać «pravilna», tamu padrychtavali dačku, kab jana napisała, što budzie pastupać u biełaruskuju VNU.
Tym nie mienš, nas usio adno vyklikali, ale spasyłalisia nie na danyja z ankiety, a na čutki, što dačka nibyta płanuje pastupać u Polšču.
Naturalna, što siarod siabroŭ dzieci nie buduć chłusić pra toje, dzie chočuć vučycca, tamu dla nastaŭnikaŭ niama vialikaj prablemy daviedacca pra namiery vučniaŭ.
Ale my stajali na svaim, što ŭ ankiecie infarmacyja praŭdzivaja, što dačka zastaniecca ŭ Biełarusi i ŭ nijakuju Polšču nie źbirajecca», — pryznajecca maci vypusknicy.
Jana była nie adzinaj u kłasie, chto apynuŭsia ŭ padobnaj situacyi. Žančyna kaža, što mnohija baćki damaŭlajucca ź dziećmi, kab tyja mienš raspaŭsiudžvalisia pra svaje płany źjechać vučycca za miažu.
«U ankietach tolki niekalki čałaviek z kłasa adkazali, što płanujuć praciahvać vučobu ŭ inšaj krainie. Ale kali parazmaŭlać ź inšymi baćkami, to vynikaje, što nie mienš za pałovu vučniaŭ majuć taki namier. Bolšaść vybiraje Polšču, a na druhim miescy pa papularnaści idzie Rasija», — kaža maci budučaj vypusknicy.
Ciapier čytajuć
«Mnie soramna, ale ja navat nie pamiataju». Stali viadomyja novyja padrabiaznaści z pracesu zdymak emihrantaŭ dla kino na BT13
Kamientary