Tramp zajaviŭ, što pakul nie abmiarkoŭvaŭ spynieńnia vajskovaj dapamohi Ukrainie
Prezident ZŠA Donald Tramp zajaviŭ na pres-kanfierencyi, što jon «nie kazaŭ» pra prypynieńnie vajskovaj dapamohi Ukrainie paśla sustrečy z Uładzimiram Zialenskim.
«Pahladzim, što budzie dalej», — skazaŭ prezident ZŠA.
Kamientujučy słovy Zialenskaha pra toje, što kaniec vajny jašče vielmi daloka, Tramp skazaŭ: «Lepš by jon pamylaŭsia».
Pa słovach amierykanskaha prezidenta, luboje pahadnieńnie ab miry pavinna być dasiahnuta z Rasijaj i Ukrainaj, pry «ŭchvaleńni i zhodzie» Jeŭropy i ZŠA.
«Mahčyma, chtości nie choča iści na ździełku», skazaŭ Tramp, ale hetyja ludzi «doŭha nie pratrymajucca».
Jon dadaŭ, što, na jahonuju dumku, i Rasija, i ŭkrainski narod chočuć damahčysia miru.
U toj ža čas daradca Trampa pa nacyjanalnaj biaśpiecy Majkł Uołc 3 sakavika zajaviŭ, što administracyja prezidenta ZŠA pa-raniejšamu adkrytaja dla pieramovaŭ ź Zialenskim.
«My hatovyja da takich abmierkavańniaŭ. My ŭžo praviali ich z rasijanami ŭ Er-Ryjadzie. My hatovyja da dyjałohu z ukraincami, a zatym da pasrednickaj dypłamatyi. Ale nam treba pačuć heta ad samoha Zialenskaha — i pačuć publična», — skazaŭ jon u intervju Fox News.
Uołc adznačyŭ, što Bieły dom «budzie praviarać abodva baki», kab zrazumieć, nakolki jany hatovyja da kampramisu.
«Nam treba pačuć ad prezidenta Zialenskaha, što jon škaduje pra toje, što zdaryłasia, hatovy padpisać pahadnieńnie ab karysnych vykapniach i prystupić da mirnych pieramovaŭ», — skazaŭ Uołc, majučy na ŭvazie kanflikt, jaki adbyŭsia pamiž Donaldam Trampam, vice-prezidentam ZŠA Džej Dzi Vensam i Zialenskim 28 lutaha ŭ Biełym domie.
«Ja nie dumaju, što heta zanadta vialikaja prośba», — dadaŭ Uołc.
Kamientary