USU navučylisia niejtralizavać rasijskija płaniernyja bomby

Hetyja bomby nielha padavić srodkami radyjoelektronnaj baraćby (REB), «ad ich nielha schavacca, adziny sposab — heta źbić bambavik, jaki niasie takuju bombu», kazaŭ były ministr zamiežnych spraŭ Dźmitryj Kuleba.

Akazałasia — nie adziny. USU ŭsio ž navučylisia hłušyć datčyki takich bombaŭ, jakija kirujuć palotami, u tym liku z dapamohaj źniščalnikaŭ F-16, piša The Telegraph.

Heta nie aznačaje, što Rasija pierastała skidać takija bomby, jakija niasuć ad paŭtony da 3 ton vybuchoŭki. Ale zapuski časta akazvajucca niaŭdałymi: bomby, zabiaśpiečanyja kryłami, jakija raskryvajucca, i ŭnifikavanym modulem płanavańnia dy karekcyi (UMPK), jaki USU i navučylisia deaktyvavać, biez navihacyi časta padajuć udalečyni ad namiečanych celaŭ.

«Možna było b źmianić taktyku i tracić nie adnu bombu z UMPK na adnu cel, a, naprykład, 8. Abo 16. I tady z ulikam składańnia pamyłak, hladziš, cel źniščałasia b adnoj niejkaj bombaj z hetaj kučy, — z prykraściu piša Z-błohier Fighterbomber, jaki kamientuje pracu rasijskich VPS. — Ale, jak vy razumiejecie, dakładvać pryjdziecca pra toje, što z 16 celaŭ źbili ŭsiaho adnu. A kamu heta treba? Nu vy zrazumieli».

Srodki REB u partatyŭnych i mabilnych stancyjach, jakimi ŭtykanaja ŭsia linija bajavoha sudakranańnia, «zrabili karekcyju ŭsich sistem usich bojeprypasaŭ (nie tolki UMPK), zasnavanych na spadarožnikavaj navihacyi bieskarysnymi», piša Fighterbomber, reziumujučy: adzinočny UMPK siońnia moža patrapić u cel tolki vypadkova abo na palihonie.

Pieradatčyki radyjołakacyjnych pieraškod taksama pracujuć na źniščalnikach F-16, jakija ŭ minułym hodzie stała atrymlivać Ukraina.

Płaniernyja bomby Rasija atrymała za košt pierarobki savieckich fuhasnych avijabombaŭ (FAB). Samaloty mohuć zapuskać ich, znachodziačysia za 60—70 km ad celi. Na miescy vybuchu, jaki moža źniščyć ceły budynak, zastajecca varonka da 6 m hłybinioj i 20 m u dyjamietry.

Asabliva masava jany stali ŭžyvacca minułaj zimoj pry šturmie Aŭdziejeŭki, jakaja była zachoplenaja ŭ siaredzinie lutaha 2024 hoda. Aktyvizacyja bambavańniaŭ z dapamohaj płaniernych bombaŭ dazvoliła značna paskoryć tempy źniščeńnia haradoŭ.

Kab zachapić Bachmut, dzie hetyja bojeprypasy byli ŭžytyja ŭpieršyniu, spatrebiŭsia hod, na Aŭdziejeŭku pajšło niekalki miesiacaŭ, a na amal poŭnaje razbureńnie Vaŭčanska i Časavaha Jara — tolki niekalki tydniaŭ, pisała Associated Press pa vynikach analizu fatahrafij hetych haradoŭ. Abarony ad takich bombaŭ va USU nie było, tłumačyli AP ukrainskija sałdaty na pieradavoj.

Jašče ŭ listapadzie 2024 hoda płaniernyja bomby sparadžali maštabnyja razbureńni, dapamahajučy rasijskim vojskam prasoŭvacca napierad samymi chutkimi tempami z pačatku vajny, adznačaje The Telegraph. Ale padzieńnie ich efiektyŭnaści z tych časoŭ, mahčyma, spryjała tamu, što ŭ lutym prasoŭvańnie rasijskaj armii zamarudziłasia treci miesiac zapar.

Cim Uitynhtan, ekśpiert pa ŭzbrajeńni ŭ Karaleŭskim abjadnanym instytucie abaronnych daśledavańniaŭ (RUSI), skazaŭ haziecie:

«Ciapier Ukraina pieraškadžaje Rasii harantavana paražać celi za linijaj frontu. [Rasijskaja armija] nie moža ŭdaryć pa kamandnych punktach, parušyć zabieśpiačeńnie, a značyć, jaje vojski nie mohuć ruchacca ŭ patrebnym im tempie i ździajśniać nieabchodnyja manieŭry na poli boju».

• 53
• 1
• 1
• 0
• 0
• 0
• 0
• 3