«Zamiest «białki» napisana pra niejkich vaviorak». Maładaja nastaŭnica vykładaje chimiju na biełaruskaj movie i raskazvaje, jak jano
Maładaja nastaŭnica chimii i kłasnaja kiraŭnica Nata viadzie svaje zaniatki pa-biełarusku. Dziaŭčyna prydumlaje dla dziaciej cikavyja praktykavańni i interaktyŭnyja ŭroki, a ŭ tyktoku raspaviadaje, ci składana heta — być biełaruskamoŭnaj nastaŭnicaj u sučasnaj škole.
U tyktoku dziaŭčyna kaža, što padrychtavać zaniatak na biełaruskaj movie patrabuje času — šmat što treba pierakładać z ruskaj movy ci rabić materyjały dla dziaciej samastojna.
«Tamu što nastaŭnikaŭ, jakija vykładajuć na biełaruskaj movie, značna mienš, čym tych, chto vykładaje na ruskaj», — tłumačyć Nata.
Biełaruska starajecca padychodzić da zaniatkaŭ kreatyŭna — stvaraje ŭroki praź interaktyŭnyja anłajn-płatformy, źbiraje infarmacyju pa schiemach i tablicach. U adnym z rolikaŭ jana raspaviała, što prajšła kursy, dzie vučyłasia dośviedu inšych nastaŭnikaŭ.
U rolikach dziaŭčyna i žartuje: naprykład, pra toje, jak dzieci błytajuć pierakłady niekatorych terminaŭ:
«Tvoj tvar, kali ŭ čarhovy raz vučań zdaje sšytak, a tam zamiest «białki» napisana pra niejkich vaviorak».
Jak kłasnaja kiraŭnica Nata arhanizoŭvała dla dziaciej zaniatak pra padarožžy pa Biełarusi. Paśla prezientacyi ab biełaruskich abłaściach i miascovych słavutaściach jany stvarali svaje ŭłasnyja maršruty dla vandrovak.
A za aktyŭnaść padčas uroku dziaŭčyna vydavała dzieciam nadrukavanyja vałoški — chto sabraŭ bolš, atrymlivaŭ šakaładku. Dzieci taksama razmaloŭvali paštoŭki — z vyjavami Minska.
«Ja hanarusia tym, što vykładaju na biełaruskaj movie. Kaniečnie, maje viedy nie supier idealnyja, i ja imknusia pašyrać svaje viedy i raźvivać vusnaje maŭleńnie», — kaža jana.
U kamientaryjach ludzi pieravažna padtrymlivajuć nastaŭnicu, kažuć, što hanaracca joj i dziakujuć za važnuju pracu — jakuju, pišuć, varta adznačać bolšym zarobkam.
Ale nie ŭsie razumiejuć, pa jakoj pryčynie jana heta robić: «Adno pytańnie: navošta? Univiery ŭ nas usie na ruskaj, praca taksama», «A navošta chimija na biełaruskaj movie?».
Kamientary