U biełarusa, što niekalki dzion tamu z pahoniaj zatrymlivali ŭ centry Varšavy, znajšli kiłahramy narkotykaŭ

Nočču 3 maja palicejskija ŭmiašalisia ŭ situacyju z kiroŭcam BMW na placy Troch Kryžoŭ. Ich uvahu pryciahnuŭ jaho ahresiŭny styl kiravańnia aŭto. Kali jany zahadali jamu spynicca dla pravierki, mužčyna pačaŭ ŭciakać. Da pieraśledu dałučylisia ŭsie palicejskija, jakija byli pablizu, — raskazaŭ Jakub Pacyniak, pres-sakratar Rajonnaj kamiendatury palicyi Varšava I.

Na vulicy Brackaj kiroŭca ŭdaryŭsia ŭ bietonnyja łaŭki, paśla čaho pakinuŭ aŭto i praciahvaŭ uciakać pieššu. Praź niekalki dziasiatkaŭ mietraŭ jon byŭ zatrymany palicejskimi. Hetyja ž supracoŭniki znajšli ŭ jahonym aŭtamabili značnuju kolkaść narkotykaŭ. Vidavočna, mienavita tamu padazravany nie spyniŭsia dla darožnaj pravierki. Heta 37-hadovy hramadzianin Biełarusi, jaki nieadnarazova byŭ u poli zroku pravaachoŭnikaŭ, — dadaje pres-sakratar.

Mužčynu dastavili ŭ kamiendaturu. Jaho pravieryli śpiecyjalnym testaram na najaŭnaść narkatyčnych rečyvaŭ u arhaniźmie. Vyśvietliłasia, što jon byŭ pad uździejańniem amfietaminu i kakainu, što sam i paćvierdziŭ. U balnicy ŭ jaho ŭziali kroŭ dla dalejšaha detalovaha analizu.

Da spravy dałučylisia kryminalisty z apieratyŭna-raźviedvalnaha adździeła kamiendatury, jakija zajmajucca baraćboj z narkatyčnaj złačynnaściu. Pavodle ich źviestak, zatrymany žyŭ razam z 27-hadovaj hramadziankaj Ukrainy.

Kali palicejskija pryjechali da pary na vulicu Kanapnickaj, jany zaŭvažyli žančynu pierad domam, jakaja siadała ŭ Mercedes.

Pavialičyć

— Jany praviali ŭ dačynieńni da jaje apieratyŭnyja dziejańni i ŭ jaje sumačcy znajšli kakain i marychuanu. Dalejšyja dziejańni pravodzilisia ŭ kvatery, jakuju padazravanaja nie chacieła dobraachvotna adčynić. Palicejskija vyklikali na miesca ratavalnikaŭ, jakija dapamahli trapić usiaredzinu. U vientylacyjnym kanale byli znojdzienyja polietylenavyja pakiety z narkotykami, — raskazaŭ pres-sakratar.

Ahułam pa hetaj spravie było kanfiskavana amal try kiłahramy roznych narkotykaŭ: kakain, amfietamin, mietamfietamin, miefiedron, halucynahiennyja hryby, marychuana i tabletki MDMA. U paviedamleńni adznačajecca, što palicyja taksama kanfiskavała hazavy pistalet, hrošy, mabilnyja telefony i juvielirnyja vahi.

— 37-hadovy mužčyna atrymaŭ abvinavačańnie ŭ niežadańni spynicca na darožnuju pravierku i vałodańni značnaj kolkaściu narkotykaŭ. U svaju čarhu jaho 27-hadovaj partniorcy taksama byli vystaŭlenyja abvinavačańni ŭ vałodańni značnaj kolkaściu zabaronienych rečyvaŭ, — adznačaje Pacyniak.

Pavialičyć

Sud zadavoliŭ chadajnictva prakuratury i pryznačyŭ abodvum padazravanym časovy aryšt terminam na try miesiacy.

Im abodvum pahražaje da 10 hadoŭ pazbaŭleńnia voli.

• 3
• 0
• 1
• 6
• 4
• 0
• 0
• 0