Knyrovič: «Udzieł u błoku Prakopjeva-Jahorava płatny». Čamu i na što iduć hrošy?
Alaksandr Knyrovič, jaki vyłučajecca ŭ śpikiery Kaardynacyjnaj rady, u svaim fejsbuku padzialiŭsia mierkavańniem, jak zrabić KR bolš efiektyŭnaj i niezaležnaj. Siarod prapanoŭ — poŭnaja admova ad hrantavaha finansavańnia (ci pastanoŭka jaho na paŭzu).
Knyrovič upeŭnieny, što absalutna realna zrabić tak, kab Kaardynacyjnaja rada pracavała biez pryciahnieńnia finansavych srodkaŭ zvonku.
U jakaści prykładu jon pryvodzić svoj błok Prakopjeva-Jahorava, udzieł u jakim, jak vyśvietliłasia, płatny. Alaksandr raspavioŭ: «My štomiesiac płacim siabroŭskija ŭnioski i kalektyŭna vyrašajem, na padtrymku jakich inicyjatyŭ ich tracić».
«Naša Niva» paprasiła Alaksandra Knyroviča raspavieści, pra jakuju sumu idzie havorka i jakija inicyjatyvy jany padtrymali.
— My źbirajem takija ŭnioski ź vieraśnia 2024 hoda, pa 10-15 jeŭra sa ŭsich siabroŭ błoku, kudy ŭvachodziać nie tolki delehaty Kaardynacyjnaj Rady, ale i ŭdzielniki śpisa (da 30 čałaviek). Heta adnosna nievialikija sumy, da 500 jeŭra štomiesiac. Zbory nakiroŭvalisia na padtrymku kampanii pa pradastaŭleńni mižnarodnaj abarony ŭ Hruzii, vystaŭleńnie pikietaŭ na miažy, razavuju dapamohu tym, chto maje patrebu (naprykład, byłym palityčnym źniavolenym) i anałahičnyja nievialikija prajekty. Časam zapyt na dapamohu bolšy, čym sabranaja suma, i my ŭnutry błoka abjaŭlajem dadatkovy zbor. Rašeńnie ab nakiravańni srodkaŭ prymajucca štomiesiac hałasavańniem.
Na pytańnie, ci nie praściej było b, kab kožny z udzielnikaŭ sam padtrymlivaŭ niejkija inicyjatyvy, nie pieraličvajučy hrošy błoku, Alaksandr Knyrovič adkazvaje:
— My arhanizavali voś taki sposab abjadnańnia namahańniaŭ błoka. Pry hetym my nie abmiažoŭvajem udzielnikaŭ ad nakiravańnia asabistych srodkaŭ na lubyja inšyja prajekty.
«A zmožacie vylecieć zaŭtra?» Džon Koŭł raskazaŭ, jak piŭ z Łukašenkam harełku, kab damovicca pra vyzvaleńnie palitviaźniaŭ9
Kamientary