Kala novaj stancyi mietro chočuć źnieści pryvatny siektar i dvuchpaviarchoŭki. Minčan kličuć na abmierkavańnie
Cichi susied Minsk-Śvietu — dvuchpaviarchovy mikrarajon na vulicy Siarova — chutka mocna źmienicca. Niepadalok ad novaj stancyi mietro «Niemaršanski sad» źjaviacca šmatkvaternyja damy, dziciačy sadok, kramy i skviery. A voś usia małapaviarchovaja zabudova i pryvatnyja damy pojduć pad znos. Ciapier budučynia terytoryi abmiarkoŭvajecca ŭ administracyi Kastryčnickaha rajona. Da ŭdziełu ŭ hramadskim abmierkavańni zaprašajuć usich achvočych. Realt pahladzieŭ abnoŭleny płan i prahulaŭsia pa kvartałach z dvuchpaviarchoŭkami.
Mikrarajon u navakollach vulicy Siarova pačaŭ aktyŭna raści ŭ 50-ch hadach, kali tut stali budavać žyłyja damy dla rabotnikaŭ zavoda «Kieramin» (u saviecki čas — Minski kambinat budaŭničych materyjałaŭ). Siońnia heta zabudova častkova sastarełaja i maje patrebu ŭ pieramienach. Horadabudaŭničy prajekt detalovaha płanavańnia terytoryi ŭ miežach Asanalijeva — čyhunka — miaža vytvorčaj zony raspracavała UP «Minskhrada».
Zaraz na płoščy 57 hiektaraŭ mirna susiedničajuć pryvatnyja damy, upadabanyja mnohimi minčanami atmaśfiernyja dvuchpaviarchoŭki, a taksama paźniejšaja zabudova — piacipaviarchovyja i dzieviacipaviarchovyja damy.
Akramia žyłych damoŭ roznaj pavierchavaści, u mikrarajonie raźmieščany dźvie škoły (zvyčajnaja i muzyčnaja), paliklinika, chram, nievialikija kramki i niekalki vytvorčych abjektaŭ.
Pavodle abnoŭlenaha płanu, horadabudaŭniki prapanujuć adpravić pad znos praktyčna ŭsiu małapaviarchovuju zabudovu na vulicach Siarova, Lubanskaj, Žłobinskaj i Pirahova. Mienavita tut zaraz zasiarodžana najbolšaju kolkaść 2-3-paviarchovych damoŭ 50-ch hadoŭ pabudovy. Praces adsialeńnia i znosu ŭžo pačaŭsia.
Pa płanie na miescy dvuchpaviarchovak vyrastuć šmatkvaternyja damy z abjektami bytavoha absłuhoŭvańnia. U vyniku transfarmacyi žyllovy fond mikrarajona da 2030 hoda pavialičycca na 1064 kvatery.
Na pieršym etapie płanujecca źnieści ŭsiaho 3 damy, a da 2030 hoda — astatnija 33. Takim čynam, pryvatnych damoŭ u mikrarajonie nie zastaniecca.
Siońnia vułački pryvatnaha siektara (heta — Pirahova i prylehłyja da jaje zavułki) zaniatyja vielmi raznastajnymi pabudovami. Tut sustrakajucca i kłasičnyja paślavajennyja damy, i zamki z 90-ch, i sučasnyja katedžy.
Akramia vialikaj kolkaści šmatpaviarchovych žyłych damoŭ, na Siarova źbirajucca ŭźvieści dziciačy sadok na 230 miescaŭ. Daškolnaja ŭstanova źjavicca ŭ hłybini vulicy Puchavickaj — na miescy dvuch žyłych małapaviarchovak z adrynami. Taksama ŭ rajonie pabudujuć hramadskija centry i abjekty absłuhoŭvańnia nasielnictva.
Dobraŭparadkavanyja zialonyja zony płanujecca arhanizavać na praciahu vulicy Puchavickaj (pobač ź dźviuma škołami), a taksama niepadalok ad dyśpietčarskaj stancyi Siarova.
Kab budučym žycharam mikrarajona było dzie pakinuć mašynu, u roznych kutkach Siarova płanujecca ŭźvieści niekalki aŭtamabilnych stajanak i parkinhaŭ. Samaja vialikaja z parkovak (na 500 miescaŭ) raźmieścicca bližej da čyhunki na Pirahova.
U vyniku ŭsich źmien da 2030 hoda cichi kutok Minska moža kardynalna źmianicca. Žyllovy fond mikrarajona Siarova pavialičycca da 290 tysiač kvadrataŭ, a nasielnictva mikrarajona vyraście da 12 tysiač čałaviek.
Hramadskaje abmierkavańnie prajektu budzie prachodzić z 26 sakavika pa 9 krasavika. Razhledzieć płan možna na aficyjnym sajcie administracyi Kastryčnickaha rajona, a taksama ŭ faje hetaj ustanovy. Zaŭvahi i prapanovy z pamietkaj «Hramadskija abmierkavańni» čakajuć pa adrasie: 220 039, Minsk, Čkałava, 6 (elektronnaja pošta: [email protected]) da 9 krasavika.
Vyniki hramadskaha abmierkavańnia padviaduć na pasiadžeńni architekturna-horadabudaŭničaha Savieta pry hałoŭnym architektary horada Minska paśla razhladu zaŭvah i prapanoŭ, što pastupili.
Kamientary