Čarhovy skandał z administracyjaj Trampa: žurnalisty znajšli ŭ internecie piersanalnyja danyja top-čynoŭnikaŭ
Niamiecki časopis Der Spiegel pravioŭ rasśledavańnie i vyjaviŭ, što numary telefonaŭ i elektronnyja adrasy, navat paroli da paštovych skryniaŭ niekatorych kiraŭnikoŭ słužby biaśpieki Donalda Trampa byli dastupnyja ŭ siecivie.
Rasśledavańnie časopisa vyjaviła, što ŭ siecivie ŭtrymlivajucca źviestki daradcy Trampa ŭ nacyjanalnaj biaśpiecy Majka Uołca, kaardynatara raźviedki Tułsi Habard i ministra abarony Pita Chehseta, sa spasyłkaj na rasśledavańnie piša «Jeŭrapiejskaja praŭda».
Jak adznačajecca, infarmacyja była sabrana praz kamiercyjnyja pošukavyja sistemy i apublikavanyja ŭ siecivie danyja karystalnikaŭ.
Mnohija z hetych numaroŭ i adrasoŭ da hetaha času aktyŭna vykarystoŭvajucca.
Jany źviazany z akaŭntami ŭ sacyjalnych sietkach Instagram, LinkedIn, Dropbox i prahramami dla trekinhu fizičnaj aktyŭnaści.
Telefonnyja numary, u svaju čarhu, adpaviadajuć profilam u WhatsApp i Signal.
U rasśledavańni adznačyli, što heta śviedčyć ab novaj surjoznaj uraźlivaści ŭ sistemie biaśpieki Vašynhtona.
Praz hetyja ahulnadastupnyja danyja varožyja śpiecsłužby mahli b atrymać dostup da pryład i pierapiscy šlacham ustaloŭki špijonskich prahram. Nie vyklučana, što zamiežnyja ahienty mahli sačyć za kamunikacyjaj, kali Habard, Uołc i Chehset viali abmierkavańnie vajennaha ŭdaru ŭ čacie Signal.
Pakul niezrazumieła, ci viałosia abmierkavańnie mienavita praz akaŭnty Signal, pryviazanyja da pryvatnych numaroŭ,
a Habard admoviłasia davać kamientary.
U toj ža čas časopis ustanaviŭ, što pa stanie na sieradu, 26 sakavika, pryviazanyja da Signal numary Habard i Uołca ŭsio jašče byli dastupnyja anłajn.
Kantaktnyja danyja Habard, Chehseta i Uołtca častkova byli znojdzienyja ŭ adkrytych bazach, častkova — u šmatlikich uciečkach parolaŭ. Uciečki parolaŭ — raspaŭsiudžanaja źjava ŭ internecie. Naprykład, u 2019 hodzie daśledčyk Troj Chant znajšoŭ na chakierskim forumie bolš za 773 młn elektronnych adrasoŭ i bolš za 21 młn parolaŭ.
Z tych časoŭ adbylisia novyja ŭciečki — chakiery ŭvieś čas składajuć novyja bazy, kab pradać ich.
Dadzienyja ministra abarony Chehseta žurnalisty znajšli praz kamiercyjny servis kantaktnych danych, jaki zvyčajna vykarystoŭvajuć kampanii dla markietynhu i padboru piersanału.
Dastatkova było paznačyć spasyłku na jahony profil u LinkedIn — i sistema vydała numar mabilnaha i Gmail-adras.
Hety adras i paroli da jaho byli znojdzienyja bolš za 20 adkrytych uciečak. Z adkrytych krynic bačna, što adras vykarystoŭvaŭsia da niadaŭniaha času, adznačyli ŭ rasśledavańni.
A jaho mabilny numar byŭ pryviazany da akaŭnta ŭ WhatsApp, jaki, vierahodna, niadaŭna vydalili.
Mabilny numar i poštu Uołca taksama ŭdałosia znajści praz toj servis.
Pa danych žurnalistaŭ, Habard akazałasia aściarožniej i, padobna, zabłakavała svaje danyja ŭ niekatorych servisach, jakija ŭtrymlivali infarmacyju ab jaje kalehach.
Adnak jaje elektronnaja pošta ŭsio roŭna źjaŭlajecca na sajtach, u pryvatnaści WikiLeaks i Reddit.
Usiaho jaje e-mail znojdzieny bolš čym u dziesiaci ŭciečkach. U adnoj ź ich — taksama numar telefona, jaki, paśla adnaŭleńnia, pryvioŭ da aktyŭnych akaŭntaŭ u WhatsApp i Signal.
Žurnalisty dadali, što prainfarmavali Habard, Uołca i Chehseta ab infarmacyi. Taksama jany nie praviarali, ci paroli da elektronnych skryniaŭ usio jašče pracujuć.
Nahadajem, incydent pačaŭsia kali hałoŭny redaktar The Atlantic Džefry Hołdbierh apublikavaŭ materyjał, dzie śćviardžaŭ, što daradca Trampa pa pytańniach nacbiaśpieki Uołc pamyłkova dadaŭ jaho ŭ čat Signal, dzie top-čynoŭniki administracyi abmiarkoŭvali ŭdary pa Jemienie. Sam Tramp tym časam nastojvaje, što ŭ pierapiscy pamiž jaho kamandaj u Signal nie było ničoha, što mahło b «skampramietavać» płany napadu ŭ Jemienie, choć jon i pryznaŭ, što chtości, mahčyma, «abłažaŭsia».
Kamientary
Po trampu, oni, vsie - dobryje ludi, s normalnoj točki zrienija, oni, vsie - hordyje v svojej niekompietientnosti biezdari.....