U Kitai nazvali prezidenta Tajvania «parazitam» i adpravili vojski na vučeńni da vostrava
Ułady Kitaja abviaścili ab praviadzieńni maštabnych vajskovych vučeńniaŭ kala paŭnočnaha, paŭdniovaha i ŭschodniaha ŭźbiarežža Tajvania, paviedamlaje ahienctva «Sińchua». U apieracyi zadziejničanyja suchaputnyja čaści, vajskova-marskija i vajskova-pavietranyja siły, a taksama rakietnyja vojski, piša The Moscow Times.
Pradstaŭnik Narodna-vyzvalenčaj armii Kitaja Šy I zajaviŭ, što vučeńni stanuć «surovym papiaredžańniem» «sieparatysckim» siłam Tajvania.
Uzbrojenyja siły Kitaja adpracoŭvajuć bajavoje patrulavańnie fłotu i avijacyi kala ŭźbiarežža Tajvania, zachop «pravoŭ kompleksnaha kantrolu», naniasieńnie udaraŭ pa marskich i naziemnych celach, a taksama błakavańnie klučavych zon i šlachoŭ «z metaj pravierki bajazdolnaści» vojskaŭ «u realnych sumiesnych vajennych apieracyjach».
Piekin pravodzić vučeńni śledam za vizitam ministra abarony ZŠA Pita Chiehsieta ŭ Japoniju i na Filipiny, padčas jakoha toj krytykavaŭ ułady KNR i zajaviŭ, što Japonija «niezamiennaja» dla supraćdziejańnia kitajskaj ahresii, piša Reuters.
Taksama Kitaj vypuściŭ sieryju prapahandysckich rolikaŭ, u jakich nazvaŭ prezidenta Tajvania Łaj Cynda «parazitam» i vyjaviŭ jaho ŭ vyhladzie zialonaha žuka, jakoha trymajuć pałačkami dla ježy nad padpalenym Tajvaniem.
Urad Tajvania asudziŭ vučeńni, a administracyja prezidenta zajaviła, što Kitaj «pryznany mižnarodnaj supolnaściu jak parušalnik spakoju» i što tajvański ŭrad upeŭnieny ŭ zdolnaści abaranić siabie. U Minabarony Tajvania taksama paviedamili, što ŭ adkaz na nabližeńnie da vostrava ŭ paniadziełak kitajskaj avijanosnaj hrupy «Šańdun» jany adpravili svaje vajskovyja samaloty i karabli, a taksama aktyvavali naziemnyja rakietnyja sistemy.
Pavodle infarmacyi dvuch vysokapastaŭlenych tajvańskich čynoŭnikaŭ, u aŭtorak užo bolš za 10 kitajskich vajskovych karabloŭ nablizilisia da 44-kiłamietrovaj prylehłaj da Tajvania zony. Tajvań u adkaz nakiravaŭ tudy svaje vajskovyja karabli. Na vostravie nie zafiksavali nijakaj bajavoj aktyŭnaści z boku kitajskich vajskoŭcaŭ, adznačyli va ŭradzie.
U toj ža čas MZS Kitaja zajaviła, što vučeńni «źjaŭlajucca zakonnymi i nieabchodnymi mierami pa abaronie nacyjanalnaha suvierenitetu i zachavańni nacyjanalnaha adzinstva».
Apošni raz Kitaj imitavaŭ ataku abo błakadu Tajvania ŭ traŭni minułaha hoda (praz try dni paśla inaŭhuracyi Łaj Cynda). Kitajskija siły adpracavali zachop šerahu terytoryj vostrava i praviali vučeńni z bajavymi strelbami.
Sakretny dakumient Pientahona pakazaŭ rezkuju źmienu vajennych pryjarytetaŭ ZŠA
U Kitai budujecca samy vialiki kamandny štab u śviecie dla patencyjnaj jadziernaj vajny
Čamu niezaležnaść i stanovišča Tajvania zaležać ad vynikaŭ vajny Rasii va Ukrainie
Si Czińpin u navahodniaj pramovie pahražaŭ Tajvaniu
Kitaj pravioŭ najbujniejšyja za apošnija dziesiacihodździ vajennyja vučeńni vakoł Tajvania
Kamientary