Realizacyjaj inviestycyjnaha prajekta pa stvareńni sietki 5G u Biełarusi budzie zajmacca TAA «Biełaruskija vobłačnyja technałohii», taksama viadomaje jak beCloud. Pra heta havorycca ŭ ukazie № 139, jaki apublikavany na partale Pravo.by.
Jak vynikaje z dakumienta, na najbližejšyja 10 hadoŭ apierataru pradastaŭlajecca šerah ilhot i prefierencyj. U miežach inviestdamovy beCloud maje prava na rastreminoŭku na piać hadoŭ pa apłacie za vydzialeńnie radyjočastot. Pry hetym apieratar atrymaje pieravažnaje prava na atrymańnie novych častot, piša Office Life.
Da kanca 2034 hoda vałavy prybytak kampanii nie budzie abkładacca padatkam na prybytak pry ŭmovie, što prybytak budzie nakiravany na raźvićcio sietki i zakupku abstalavańnia. Kampanija taksama vyzvalajecca ad adličeńniaŭ u Respublikanski fond univiersalnaha absłuhoŭvańnia ličbavaha raźvićcia i suviazi.
Akramia taho, beCloud na piać hadoŭ atrymaje abaronu ad niespryjalnych źmianieńniaŭ padatkovaha zakanadaŭstva. To bok, kali buduć pavyšacca niejkija padatki i zbory abo ŭvodzicca novyja, apieratar maje prava prymianiać tyja normy, jakija dziejničali na momant padpisańnia dahavora.
Dla kampanii ŭstanoŭleny sproščany paradak prajektavańnia i pryjomki abjektaŭ. Joj budzie vydzialacca ziamla biez aŭkcyjonaŭ i arendnaj płaty, biez kampiensacyi strataŭ sielhasarhanizacyjam abo byłym uładalnikam i navat z pravam vysiečki nasadžeńniaŭ biez kampiensacyjnych pasadak.
Jość i inšyja prefierencyi, u tym liku pad hryfam DSK. Pry hetym, kali dahavor budzie skasavany pa vinie apieratara, jamu daviadziecca kampiensavać usie atrymanyja ilhoty. Ukaz ab stvareńni sietki 5G u Biełarusi Alaksandr Łukašenka padpisaŭ 1 krasavika.
Prakurorski načalnik aburyŭsia nieabhruntavanymi zatrymańniami biełarusaŭ8
Kamientary