Kanflikt u Organic Maps. Jak adhalinavańnie ad afłajn-mapy Mielnička trapiła «pad sankcyi» i što ciapier budzie

Što adbyłosia

U siaredzinie sakavika GitHub pieravioŭ u archiŭny režym repazitoryj opensorsnaha prajekta Organic Maps (fork, abo adhalinavańnie, ad Maps.me) — tak, što jon staŭ dastupny tolki dla čytańnia.

U akaŭncie adnaho z kantrybjutaraŭ prajekta źjaviłasia papiaredžańnie pra błakiroŭku z-za znachodžańnia ŭ padsankcyjnym rehijonie.

Dyskusija ŭ aficyjnaj telehram-hrupie prajekta praliła śviatło na padrabiaznaści: błakiroŭka adbyłasia paśla taho, jak raspracoŭščyka, čyj akaŭnt na GitHub užo byŭ pad sankcyjami, pieraviali ŭ status uładalnika repazitoryja Organic Maps.

Pavialičyć

Śledam za hetym vyśvietliłasia, što zasnavalniki prajekta — rasijanin Raman Cisik (z adnaho boku) i biełarusy Viktar Havaka i Alaksandr Barsuk (z druhoha boku) — znachodziacca ŭ kanflikcie. Pavodle słoŭ Barsuka, Cisik «biez papiaredžańnia vypiliŭ» (vierahodna, pazbaviŭ statusu owners) abodvuch biełarusaŭ i «ŭstaviŭ» inšaha raspracoŭščyka, «paśla čaho GitHub prajekt adrazu ž zabłakavaŭ».

Organic Maps

biaspłatnaja aplikacyja dla aŭtanomnaj navihacyi z adkrytym zychodnym kodam, jakaja vykarystoŭvaje kartahrafičnyja dadzienyja z OpenStreetMap. Pracuje afłajn paśla papiaredniaj zapampoŭki kart. Raspracoŭvajecca supolnaściu vałancioraŭ. Kirujecca jurydyčnaj asobaj, zarehistravanaj u Estonii.

Prajekt Organic Maps adhalinavaŭsia ad raspracavanaha biełarusami kartahrafičnaha servisu Maps.me paśla taho, jak u 2020 hodzie Mail.ru Group pradała servis kampanii Daegu Limited.

Praź miesiac paśla ŭhody na iOS vyjšła abnaŭleńnie Maps.me, jakim mnohija karystalniki zastalisia niezadavolenyja. U vyniku členy staroj kamandy Maps.me Alaksandr Barsuk i Viktar Havaka, a taksama Raman Cisik zapuścili inicyjatyvu pa adnaŭleńni vyhladu aplikacyi da abnaŭleńnia. Da ich dałučylisia karystalniki servisu. Tak naradziŭsia prajekt Organic Maps. Jon robić akcent na kanfidencyjalnaści, zajaŭlajučy, što nie adsočvaje miescaznachodžańnie karystalnika i nie źbiraje asabistyja danyja.

Pretenzii Cisika da Barsuka i Havaka taksama byli apublikavanyja ŭ čacie.

U ich try punkty: «kanflikt kaštoŭnaściaŭ», «karparatyŭny kanflikt» i «finansavy kanflikt». Apošni tyčycca taho, jak vydatkoŭvalisia danaty, atrymanyja ad supolnaści. U liście da kamandy Cisik taksama paćviardžaje, što pazbaviŭ statusu ŭładalnikaŭ u GitHub Havaka i Barsuka, «pakolki jany pavodziać siabie jak adzinaje cełaje».

U estonskaj jurasobie, jakoj naležyć handlovy znak Organic Maps i akaŭnty ŭ storach (ale nie kod, jon — supolnaści), dva ŭładalniki: Raman Cisik z adnoj tracinaj doli i Viktar Havaka ź dźviuma tracinami (u čacie Viktar śćviardžaje, što de-fakta pałova jaho doli — Alaksandra Barsuka).

Pa słovach Cisika, dla pryniaćcia klučavych rašeńniaŭ nieabchodna 76%, i heta «poŭny tupik».

Pavialičyć

Praz dva tydni paśla błakiroŭki na GitHub pradstaŭniki Organic Maps paviedamili pra mihracyju raspracoŭki na płatformu Forgejo.

Kamanda pieraviezła na novuju płatformu repazitoryj z 54 tysiačami commits, 9,5 tysiačy issue, 4,3 tysiačy pull request i 100 tysiačami kamientaryjaŭ.

Pavialičyć

Praktyčna adnačasova GitHub źniaŭ svaje abmiežavańni, ale Cisik u čacie vykazaŭ sumnievy, ci varta viartacca z Forgejo na GitHub.

Pa słovach Viktara Havaka devby, repazitoryjem na novaj placoŭcy, Forgejo, jany z Alaksandram Barsukom taksama nie rasparadžajucca — «tolki Raman».

Viktar Havaka nie staŭ kamientavać padrabiaznaści kanfliktu, adnak vykazaŭ nadzieju na cyvilizavany razvod faŭndaraŭ i zapeŭniŭ, što «prajekt dakładna budzie žyć».

Cisik na pytańni devby nie adkazaŭ.

Što kaža supolnaść

Ułasna kažučy, takija ž pažadańni vykazvajuć u čacie i šarahovyja ŭdzielniki opensorsnaha prajekta.

«Chłopcy, u vas vydatny prajekt! Nie zahubicie jaho!»

«Prajekt nievierahodna kruty! Lepšy ŭ svajoj katehoryi. I dziakujučy adkrytaści kodu jon pavinien pieražyć lubuju turbulentnaść (in the long run). Padobnaja situacyja z faŭndarami zvyčajna vyrašajecca abo pieramovami ź fiksacyjaj pazicyj pa kožnym punkcie (mahčyma, z pryciahnieńniem miedyjataraŭ), abo padziełam borda\prajekta. U abodvuch vypadkach važny davier supolnaści. Prazrystaść = dabro».

«Na praktycy prapisańnie i pryniaćcie finansavych praviłaŭ kampanii moža stać vyrašeńniem patavaj situacyi. Kali pryniać praviły, jakija zadavolać usich udzielnikaŭ i akcyjanieraŭ, heta fundamientalna vyrašyć pieršapačatkovuju pretenziju pra nierehulavanaje vykarystańnie srodkaŭ.

Taksama, kali jość namier u budučyni pavialičvać kapitalizacyju\abarot kampanii — heta ŭ lubym vypadku daviadziecca zrabić. Heta zabiaśpiečyć mahčymaść maštabavańnia.

Možna pryznačyć zarobki mieniedžmientu abo dyvidendy šerchołdaram. Možna navat zahadzia pryniać płan kampiensacyi pry dasiahnieńni peŭnych pakazčykaŭ. Zatym vypłaty robiacca rehularna zhodna z pryniatym płanam z vyvadam srodkaŭ ź biznes-rachunku kampanii.

Zrazumieła, što na pačatkovym etapie značna praściej było kiravać finansami ŭručnuju ŭ momancie. Ale, sudziačy pa kanflikcie, vyhladaje na toje, što kampanija i prajekt pieraraśli hetuju stadyju».

Pavialičyć

Jak uładkavany opensors

Što značyć «vypilić faŭndaraŭ z repazitoryja» ŭ śviecie opensorsu? Jak naohuł ŭładkavanyja opensors-prajekty i jak u ich zvyčajna «razvodziacca»? Paprasili raspavieści faŭndara dvuch opensors-prajektaŭ — jsDelivr i Globalping — Dźmitryja Akułava.

Dysklejmier ad Dźmitryja Akułava

Dźmitryj papiaredziŭ, što jon nie juryst, ničoha nie viedaje pra kiejs Organic Maps i ŭjaŭleńnia nie maje, chto maje racyju. Jahony pohlad na ŭładkavańnie opensors-prajektaŭ zasnavany na asabistym dośviedzie kiravańnia prajektami z adkrytym zychodnym kodam i pryciahnieńnia inviestycyj.

Pavodle Dźmitryja, bolšaść takich prajektaŭ uvohule nie kłapociacca pra jurydyčnaje afarmleńnie, u takim vypadku ŭsio naležyć uładalniku akaŭnta i damiena. Kantrybjutary mohuć patrabavać svaju dolu, adnak ich pravy buduć zaležać ad licenzii i jurysdykcyi prajekta. U lubym vypadku, adstajać svaje pravy inšym udzielnikam (kali jany hetaha zachočuć) budzie niaprosta.

Kali ž prajekt aformleny jak jurydyčnaja asoba (vypadak Organic Maps — devby), u im dziejničajuć tyja ž praviły, što i ŭ lubym startapie. I tak, jaho možna pradać, choć abjektyŭna heta i niaprosta.

— Usie ŭlikovyja zapisy, kody, damieny i inšyja aktyvy pierachodziać da kampanii, — kaža Dźmitryj. — Kantrybjutaraŭ papiaredžvajuć, što jany nie majuć jurydyčnych pravoŭ na kod. U takim vypadku prosta tak vyklučyć kaho-niebudź z uładalnikaŭ nie atrymajecca — treba abo vykupić jaho dolu, abo skarystacca punktam u damovie, jaki abaraniaje ad złoŭžyvańniaŭ i ź jakim usie pahadziacca. Heta standartny praces dla luboha startapa/nievialikaj kampanii. Adkryty kod tut ničoha nie źmianiaje.

To-bok, supolnaść nie moža vałodać kodam?

«Supolnaść» — heta abstraktnaja sutnaść, jana ničym nie moža vałodać. Kankretnyja ludzi vałodajuć kankretnymi rečami. Kantrybjutary majuć dostup da kodu pavodle licenzii, ale nie prava ŭłasnaści na jaho.

Kali isnuje jurydyčnaja asoba, jakaja vałodaje brendam i ŭlikovymi zapisami, to, chutčej za ŭsio, jana taksama vałodaje i kodam. U statucie kampanii i kantraktach akcyjanieraŭ prapisana, chto čym mienavita vałodaje.

Startapy, što vykarystoŭvajuć opensors jak biaspłatnuju pracoŭnuju siłu, źjavilisia nie ŭčora. Luby prajekt z adkrytym zychodnym kodam, jaki ź ciaham času staŭ paśpiachovaj kampanijaj, damohsia hetaha dziakujučy kantrybjutaram i ciapier pradaje vobłačnyja pasłuhi i licenzii, nie dzielačysia prybytkam ź imi.

Ci časta zdarajucca kanflikty ŭ opensors-prajektach i jak jany vyrašajucca?

Čaściej za ŭsio adnosiny vyśviatlajuć za kulisami. A samy papularny vychad z kanfliktu — rašeńnie zrabić fork (adhalinavańnie, novy prajekt — devby). Kali ŭ asnoŭnaj kamandzie ci pamiž kamandaj i supolnaściu isnujuć razychodžańni i prajekt nie maje aficyjnaha ŭładalnika, ad jaho prosta adździalajecca novy prajekt z padobnaj nazvaj i praciahvaje raźvivacca dalej. Tak było šmat razoŭ: Ublock i Ublock Origin, Elastic search i Open search, usie «forki» Redis…

Ja bačyŭ, jak heta byvaje. Časta padziei razhortvajucca pavodle adnaho i taho ž scenaryja:

1. Ty zapuskaješ kłasnuju ideju i raspracoŭvaješ jaje biaspłatna.
2. Pačynaješ źbirać danaty i pryciahvać kantrybjutaraŭ.
3. Razumieješ, što asabliva nichto nie danacić i na narmalnuju zarpłatu nie chapaje.
4. Prajekt raście, i źjaŭlajecca mahčymaść pieratvaryć jaho ŭ kamiercyjnuju kampaniju.
5. Ty karystaješsia hetaj mahčymaściu — i razdražniaješ supolnaść.
6. Supolnaść złujecca, piša błohi i tvity, moža navat forknuć prajekt.
7. Ty kancentruješsia na biznesie, a opensors-prajekt, chutčej za ŭsio, pamiraje. Kampanija pry hetym, moža być, vyžyvie.

Idealny scenaryj, viadoma, kali vialikaja kampanija najmaje kamandu raspracoŭščykaŭ, kab jany praciahvali raźvivać prajekt, tamu što sami na im zaviazanyja. Tady i raspracoŭščyki atrymlivajuć hodnuju apłatu, i karystalniki zadavolenyja praduktam. Ale takoje zdarajecca vielmi redka.

U situacyi z Organic Maps Dźmitryj, na pieršy pohlad, bačyć zvyčajnuju sprečku suzasnavalnikaŭ (a nie kanflikt unutry supolnaści), tamu toje, chto maje racyju, vyznačycca ŭ zaležnaści ad kantraktaŭ faŭnderaŭ.

— Prajekt taksama maje licenziju Apache, tamu supolnaść maje poŭnaje prava na «fork» i praciah raspracoŭki, — kaža jon. — Ale za pieršapačatkovaj arhanizacyjaj zastajecca tavarny znak i prava vykarystoŭvać jaho ŭ kamiercyjnych metach.

P. S. Tym časam, u aficyjnaj telehram-hrupie Organic Maps členy supolnaści praciahvajuć narmalna pracavać nad prajektam.

• 0
• 0
• 3
• 0
• 1
• 0
• 2
• 0