Zbornuju Biełarusi pa futzale mohuć nie puścić na čempijanat Jeŭropy ŭ Litvu i Łatviju
Na minułym stała viadoma, što zbornaja Biełarusi pa futzale ŭpieršyniu za 16 hadoŭ zavajavała pucioŭku na čempijanat Jeŭropy, jaki pavinien uzimku prajści ŭ Łatvii i Litvie. Ale zbornaj Biełarusi moža tudy nie trapić.
U Litvie zabaronienaja vydača viz biełarusam i rasijanam, a miascovaje Minsportu rekamienduje admaŭlacca ad hulniaŭ z pradstaŭnikami Biełarusi i Rasii, a taksama nie dazvalać im udzielničać u spabornictvach na terytoryi krainy. U Łatvii ž takija miery zamacavanyja ŭ vyhladzie dakładnaj zabarony na zakanadaŭčym uzroŭni.
Varta adznačyć, što adbor na Jeŭra taksama prajšła kamanda z Ukrainy, dzie pa zakonie zabaroniena ŭdzielničać u adnych spabornictvach ź biełarusami i rasijanami, jakija nie majuć niejtralny status.
Ministerstva sportu Litvy adkazała na aficyjny zapyt «Trybuny» nakont udziełu zbornaj Biełarusi ŭ Jeŭra-2026.
«Rekamiendacyi dla nacyjanalnych spartyŭnych fiederacyj i spartyŭnych arhanizacyj, zaćvierdžanyja Ministerstvam adukacyi, navuki i sportu Litoŭskaj Respubliki ŭ lutym 2023 hoda adnosna adnosin z Rasijaj i Biełaruśsiu, zastajucca niaźmiennymi.
Ministr rekamienduje litoŭskim spartyŭnym fiederacyjam i spartyŭnym arhanizacyjam nie ŭdzielničać u spartyŭnych spabornictvach, na jakija zaprašajucca i ŭdzielničajuć rasijskija i biełaruskija spartoŭcy i kamandy, što pradstaŭlajuć svaju krainu abo ŭdzielničajuć u jakaści niejtralnych spartoŭcaŭ. Arhanizacyjam rekamiendujecca nie zaprašać i nie dazvalać hramadzianam Rasijskaj Fiederacyi i/abo Respubliki Biełaruś, što pradstaŭlajuć svaju krainu, udzielničać u spartyŭnych spabornictvach i mierapryjemstvach, jakija pravodziacca ŭ Litvie.
Zhodna z rekamiendacyjami, prapanujecca, kab pry arhanizacyi mižnarodnych spartyŭnych spabornictvaŭ u Litvie hramadzianie Rasii i Biełarusi, jakija ŭdzielničajuć u spabornictvach i pradstaŭlajuć inšyja krainy, padpisvali dekłaracyju, jakaja zaklikaje da spynieńnia vajny va Ukrainie i asudžaje teraryzm i ahresiju suprać Ukrainy, a taksama admaŭlaje palityku, jakuju pravodziać Rasija i Biełaruś.
Taksama zhodna z Zakonam Litoŭskaj Respubliki ab abmiežavalnych mierach u suviazi z vajennaj ahresijaj suprać Ukrainy (ustupiŭ u siłu 3 maja 2023 hoda), pryjom zajaŭ na atrymańnie viz ad hramadzian Rasii i Biełarusi litoŭskimi vizavymi słužbami za miažoj prypynieny.
U hetym zakonie niama vyklučeńniaŭ dla vydačy viz hramadzianam Rasii i Biełarusi, jakija žadajuć uziać udzieł u mižnarodnych spartyŭnych spabornictvach u Litvie.
Akramia taho, zhodna z hetym zakonam, hramadzianam Rasii, jakija majuć šenhienskija vizy, vydadzienyja inšymi krainami, moža być admoŭlena va ŭjeździe ŭ Litvu», — adkazali ŭ ministerstvie.
Čempijanat Jeŭropy pa futzale projdzie z 18 studzienia pa 6 lutaha 2026 hoda ŭ Ryzie i Kaŭnasie, losavańnie i dzie buduć hulać kankretnyja kamandy stanie viadoma paźniej.
Kamientary
[Zredahavana]