U Rasii 19-hadovaj dziaŭčynie dali try hady za vierš Šaŭčenki 

Abvinavačańnie patrabavała dla Kozyravaj šeść hadoŭ pazbaŭleńnia voli. U sud dziaŭčyna, jakaja čakała prysudu na voli, pryjšła z torbaj rečaŭ dla SIZA.

Kryminalnaja sprava ab «dyskredytacyi» armii suprać Kozyravaj była raspačataja ŭ lutym 2024 hoda. Heta adbyłosia paśla taho, jak u druhuju hadavinu rasijskaha ŭvarvańnia va Ukrainu jana nakleiła na pomnik ukrainskamu paetu Tarasu Šaŭčenku listok z radkami ź jahonaha vierša «Zapaviet»:

• Pochovajtie ta vstavajtie
• Kajdani porvitie
• I vražoju złoju krovju
• Volu okropitie.

Dziaŭčynu zatrymali prosta kala pomnika. Spačatku zatrymańnie było aformlena pavodle administracyjnaha artykuła ab niepadparadkavańni supracoŭniku palicyi, a zatym pačalisia śledčyja dziejańni ŭžo ŭ miežach kryminalnaj spravy.

Jašče da zatrymańnia kala pomnika Šaŭčenku Kozyravu štrafavali pa administracyjnym artykule ab «dyskredytacyi» armii za post pra vajnu ŭ sacsietcy «UKantakcie».

Z-za hetaj administracyjnaj spravy Kozyravu adličyli ź pieršaha kursa miedycynskaha fakulteta SPbDU. U žniŭni 2024 hoda stała viadoma, što Kozyravaj dadali novaje abvinavačańnie pa kryminalnym artykule ab «dyskredytacyi» — za intervju, jakoje aktyvistka dała prajektu «Sievier.Riealii».

Ź lutaha 2024 hoda Kozyrava znachodziłasia ŭ SIZA, adnak u lutym hetaha hoda joj źmiakčyli mieru strymańnia, pryznačyŭšy «zabaronu peŭnych dziejańniaŭ».

Spravu Kozyravaj ab paŭtornaj «dyskredytacyi» armii sud pačaŭ razhladać jašče ŭ žniŭni minułaha hoda.

U listapadzie dziaŭčyna, vystupajučy ŭ sudzie, raskazała, što Taras Šaŭčenka — jaje lubimy paet i ŭ jaho vieršach nie moža być «dyskredytacyi» rasijskaj armii, bo jon žyŭ u toj čas, kali Rasijskaja Fiederacyja nie isnavała.

U svaim apošnim słovie Kozyrava pracytavała vierš Šaŭčenki i skazała, što, apynuŭšysia ŭ naš čas, paet by nie ździviŭsia: «Dziŭnaja rysa rasijskaj historyi. Jaki b tut ni panavaŭ režym, byccam by relihija hetaha režymu nie dazvalaje prosta ŭziać i pakinuć Ukrainu ŭ spakoi».

U śniežni 2022 hoda Kozyrava, jašče budučy školnicaj, była zatrymanaja za naniasieńnie nadpisu «Zabojcy, vy razbambili jaho. Iudy» na instalacyju «Dva sercy», ustanoŭlenuju ŭ Pieciarburhu ŭ honar Maryupala.

Tady Kozyravu abvinavacili ŭ naŭmysnym paškodžańni majomaści, adnak z tych časoŭ nijakich śledčych dziejańniaŭ pa hetaj spravie nie pravodziłasia, a ŭ 2024 hodzie pa joj minuli terminy daŭnaści.

• 0
• 0
• 1
• 1
• 0
• 6
• 21
• 1