Kachańnie i mužčyny: usio chutka. Kachańnie i žančyny: usio ŭdumliva

U krasaviku 2025 hoda ŭ aŭtarytetnym navukovym časopisie Biology of Sex Differences źjaviŭsia artykuł pra toje, jak mienavita kachańnie adroźnivajecca ŭ žančyn i mužčyn — i čamu heta važna nie tolki dla psichołahaŭ, ale i dla kožnaha z nas.

Navukoŭcy z univiersitetaŭ Aŭstralii i Finlandyi praanalizavali ankiety 808 maładych ludziej z 33 krain — pieravažna ź Jeŭropy, Paŭnočnaj Amieryki i Paŭdniovaj Afryki.

Dla hetaha była vykarystana baza Romantic Love Survey 2022, jakaja achapiła 1556 maładych ludziej ad 18 da 25 hadoŭ, pieravažna studentaŭ. Pry hetym usie biez vyklučeńnia ŭ momant apytańnia pieražyvali stan ramantyčnaha kachańnia. Heta važna: daśledčyki ŭpieršyniu analizavali mienavita tych, chto ciapier kachaje, a nie prosta znachodzicca ŭ adnosinach.

U apytańni ludzi paviedamlali, kolki razoŭ u žyćci jany adčuvali kachańnie, kali mienavita jano ŭźnikała adnosna pačatku adnosin, nakolki mocnymi byli pačućci, nakolki časta jany dumali pra kachanaha čałavieka i nakolki byli addanyja svajmu partnioru.

Vyniki akazalisia nadzvyčaj vyraznymi. Mužčyny, jak praviła, ulublajucca raniej za žančyn. U siarednim jany pryznajucca ŭ kachańni prykładna na miesiac raniej. Bolš za toje, jany čaściej paviedamlali, što raniej užo byli zakachanymi niekalki razoŭ. Heta moža śviedčyć pra toje, što mužčyny schilnyja imhnienna idealizavać abrańnicu i bačyć u joj «tuju samuju».

Adnak kali havorka zachodzić pra hłybiniu pieražyvańniaŭ, situacyja źmianiajecca. Žančyny pakazali značna vyšejšy ŭzrovień emacyjnaj nasyčanaści: jany bolš času dumali pra partniora, adčuvali mocnuju prychilnaść, strach straty, žadańnie padtrymlivać i achviaravać saboj. Ich kachańnie było mienš impulsiŭnym, ale bolš asensavanym i aryjentavanym na budučyniu.

Navukoŭcy tłumačać hetyja źjavy z punktu hledžańnia evalucyjnaj psichałohii. U minułym mužčynam było vyhadna jak maha chutčej vybirać patencyjnuju partniorku, kab pavialičyć svaje repraduktyŭnyja šancy. Tamu jany čaściej i raniej adčuvajuć kachańnie.

Žančyny ž, jakim davodziłasia vynošvać i dahladać dziaciej, aryjentavalisia na stabilnaść, nadziejnaść i doŭhaterminovyja adnosiny. Adsiul — bolšaja emacyjnaja hłybinia, abačlivaść i adkaznaść u kachańni.

Pavialičyć

Cikava, što kala 40% i mužčyn, i žančyn zakochvalisia ŭžo paśla pačatku adnosin. Pry hetym 30% mužčyn i 20% žančyn pryznalisia, što zakachalisia ŭ partniora jašče da taho, jak suviaź stała «aficyjnaj».

Daśledavańnie taksama pakazała, što źniešnija faktary ŭpłyvajuć na toje, jak i kali ludzi adčuvajuć kachańnie. Tak, u krainach z vysokim uzroŭniem hiendarnaj roŭnaści (naprykład, u Skandynavii) ramantyčnaje kachańnie pieražyvajecca ź mienšaj intensiŭnaściu. U bolš tradycyjnych hramadstvach, dzie hiendarnyja adroźnieńni bolš prykmietnyja, emocyi, źviazanyja z kachańniem, prajaŭlajucca macniej.

Takim čynam, kali mužčyna kaža «ja ciabie kachaju» praź niekalki tydniaŭ paśla znajomstva, a žančyna — tolki praz dva miesiacy, heta nie aznačaje, što jon bolš adkryty, a jana — strymanaja. Navukovyja danyja pakazvajuć, što kachańnie moža ŭźnikać u mužčyn i žančyn u rozny čas i prajaŭlacca z roznaj intensiŭnaściu — i heta całkam naturalna.

• 7
• 0
• 0
• 2
• 1
• 0
• 0
• 0