Biełaruska pracuje ŭ Dubai rusałkaj, kab addać doŭh 20 tysiač dalaraŭ
Kab zachavać baćkoŭskuju kvateru, jakaja zastałasia ŭ spadčynu, dziaŭčyna z Bresta płavaje siarod akuł.
Palina pracuje ŭ Dubai adrazu na dźviuch pracach — jana tarhietołah-fryłansier i rusałačka ŭ vodnym šou. Pra svaje pryhody dziaŭčyna raskazvaje ŭ tyktoku.
Darečy, heta nie pieršy dośvied kazačnaj pracy ŭ Paliny. Ahułam jana pracuje na takich kantraktach kala 10 hadoŭ. Palina raskazvaje, što raniej jeździła pracavać rusałkaj u Kitaj, ale pryjšła da vysnovy, što ŭ Dubai ŭsio ž umovy lepš.
Apošni hod dziaŭčyna žyvie ŭ režymie surovaj ekanomii, tamu što pastaviła sabie metaj viarnuć doŭh — 20 tysiač dalaraŭ. U adnym ź videa jana rastłumačyła, adkul jon uziaŭsia.
Palinie z bratam zastałasia ŭ spadčynu kvatera ad baćkoŭ. Spačatku dziaŭčyna dumała pradać jaje, a hrošy padzialić z bratam. Ale ž asablivaha popytu na nieruchomaść nie było. Urešcie dziaŭčyna zrazumieła, što baćkoŭskaja kvatera ŭjaŭlaje dla jaje kaštoŭnaść i jana nie hatovaja raźvitacca ź joj.
Damoviłasia z bratam, što kvateru pieraaformiać na jaje, častku hrošaj jana addaść adrazu, a 20 tysiač dalaraŭ —potym. Kab zarabić adčuvalnuju dla biełarusaŭ sumu, Palina pajechała pa kantrakcie ŭ Dubaj.
Pracujuć rusałki na hłybini 11 mietraŭ, płavać nieabchodna biez akularaŭ i zacisku na nosie.
— Pa pryjeździe mianie adpravili atrymoŭvać siertyfikat dajviera. Bieź jaho mianie b nie dapuścili b da pracy. Z hetym ja spraviłasia paśpiachova i adrazu prystupiła da šou. Praź niekatory čas ja skončyła kursy frydajvinha, kab pavialičyć čas zatrymki dychańnia. Paśla teoryi adrazu była praktyka. U basiejnie ŭ statycy pad nahladam instruktara ja zatrymała dychańnie na 4 chviliny, ujaŭlajecie? Ja była ŭ šoku. Što da akvaryuma, tut treba ŭličvać, što vada chałodnaja, ty ŭ kaściumie z dadatkovaj vahoj (12 kiłahram), u ruchu i vypuskaješ burbałki. Zatrymka dychańnia — niedzie chvilina-paŭtary.
Palina adznačaje, što fizičny stan (naprykład, vyspałasia jana ci nie) taksama vielmi ŭpłyvaje na toje, nakolki jana moža zatrymać dychańnie.
— U šou, dzie ja płavaju jak dajvier, ja zatrymlivaju dychańnie siekund na 40-50. Tolki tam praca cykličnaja: vypłyŭ — padychaŭ u rehulatar.
Samo šou rusałak zvyčajna zajmaje 10-15 chvilin. Adnačasova ź imi pracuje hrupa prafiesijnych dajvieraŭ, jakija abaraniajuć artystak ad akuł i inšych žycharoŭ akvaryuma. Jany ž i dajuć maski, kab rusałki mahli padychać pad vadoj, bo ŭspłyvać zabaroniena.
Palina śćviardžaje, što padvodnaje płavańnie bieź śpiecyjalnych akularaŭ nie stvaraje dla jaje dyskamfortu. Kaža, moža być lohkaje paščypvańnie ŭ vačach, ale tolki ŭ vypadkach, kali da hetaha jana šmat pracavała za kampjutaram ci z telefona.
— Ci dobra ja baču pad vadoj biez akularaŭ? Kali ŭ vas drenny zrok, naprykład, blizarukaść ad -5 dyjoptryj, vy zrazumiejecie lepš za ŭsich. Davoli mocna ŭsio razmyta, ale aryjentavacca ŭsio roŭna lohka. Tvary dziaciej nie baču, ale emocyi i ich ruchi ja adroźnivaju. Heta vializny enierhaabmien. Navat darosłyja časam prychodziać, kab ździejśnić svaju daŭniuju maru i ŭbačyć rusałku.
Dziaŭčyna adznačaje, što viedaje, z čym paraŭnoŭvaje — raniej taki zrok byŭ i ŭ jaje, ale jana zrabiła karekcyju ź pieršych zaroblenych hrošaj na anałahičnym kantrakcie ŭ Kitai.
Kab chutčej sabrać hrošy na kvateru, dziaŭčynie prychodzicca siabie abmiažoŭvać: jana vyrašyła nie tracić na ježu bolš za 5 dalaraŭ štodzień. Hałoŭnaje praviła ekanomii: pradumać padrabiaznaje mieniu na šeść dzion napierad, zakupić usio nieabchodnaje, a potym prytrymlivacca taho mieniu i nie zachodzić lišni raz u kramy.
Dla kahości praca Paliny moža zdavacca pracaj mary. Ale ž jana ščyra raskazvaje, nakolki heta ciažka:
— Kožny raz, kali ja apuskajusia na hłybiniu 11 metraŭ, maje lohkija pamianšajucca ŭ dva razy. Vada chałodnaja, časam maje ruki dranćviejuć i ja pierastaju ich adčuvać. Dychańnie zatrymlivajecca znoŭ i znoŭ, cieła znachodzicca ŭ pastajannym stresie, navat kali zvonku ŭsio vyhladaje vielmi lohka. Napružańnie ŭ pajaśnicy, zaciski ŭ šyi — časam balić tak, što ja nie mahu vyprastacca.
Plus jašče z-za chałodnaj vady časta zapalajucca vušy i horła. Na masaž Palina nie chodzić dziela ekanomii, a lečycca preparatami z aptečki, jakuju pryviezła z saboj, bo ŭ Dubai leki kaštujuć amal jak zołata.
— Paśla źmieny vielmi chočacca palažać. Časta ciamnieje ŭ vačach. Vielmi chočacca cišyni i spakoju.
Žyć u Dubai Palinie nie vielmi padabajecca, i pryčyn tamu chapaje: darahoje žyćcio, natoŭpy turystaŭ, šum… I, kaniečnie, jana sumuje pa rodnych i siabrach.
Kamientary