Ad klaščoŭ abaronić hety aptečny srodak

Amierykanski entamołah Tomas Mazier užo bolš za 40 hadoŭ vyvučaje klaščoŭ i chvaroby, jakija jany pieranosiać. U intervju The Washington Times jon zapeŭnivaje: adna z samych efiektyŭnych i niedarahich mieraŭ abarony — raz na miesiac apracoŭvać abutak srodkam ź piermietrynam.

Čamu mienavita abutak?

Klaščy najčaściej padymajucca źnizu — z travy, apałaha liścia i kustoŭ. Abutak stanovicca pieršym punktam kantaktu: nimfy i ličynki pamieram z makavaje ziernie nieprykmietna čaplajucca da tkaniny, a potym pierabirajucca na skuru.

Tamu, jak kaža Mazier, «kali vy nie možacie ŭbačyć klašča, skancentrujciesia na tym, adkul jon moža na vas trapić».

Jaki srodak padydzie?

U biełaruskich aptekach pradajecca «Piermietryn 0,5% sprej» — preparat, jaki zvyčajna ŭžyvajuć dla lačeńnia piedykulozu. Jon kaštuje kala 6—10 rubloŭ (50 mł) i pradajecca biez receptu. Preparat utrymlivaje tuju ž kancentracyju piermietrynu (0,5%), jakuju rekamienduje dla apracoŭki abutku ad klaščoŭ Tomas Mazier. Pry pravilnym vykarystańni srodak biaśpiečny i efiektyŭna adpužvaje parazitaŭ.

Jak apracoŭvać abutak?

1. Rabicie apracoŭku na vulicy abo na bałkonie.

2. Ščodra raspylicie srodak, kab usia pavierchnia abutku stała vilhotnaj.

3. Pakińcie sušyć na adkrytym pavietry da poŭnaha vysychańnia.

4. Paŭtarajcie raz na miesiac u pieryjad aktyŭnaści klaščoŭ .

Mazier śćviardžaje, što ź jaho praktyki, padychodziać lubyja vidy abutku: boty, krasoŭki, rabočy abutak, navat humavyja boty. Piermietryn nie psuje tkaninu, skuru ci humu. Taksama im možna apracoŭvać vopratku i ryštunak.

Važna:

• Nie apracoŭvajcie abutak u pamiaškańni.

• Nie dazvalajcie katam kantaktavać z apracavanym abutkam da jaho poŭnaha vysychańnia — dla ich vilhotny piermietryn taksičny.

A što nakont naturalnych srodkaŭ?

Mnohija spadziajucca na alei łavandy, kiedra ci hvaździki. Adnak, pavodle Maziera, jany mienš efiektyŭnyja abo dziejničajuć karotki čas. Pakul što niama pierakanaŭčych navukovych dokazaŭ ich nadziejnaści. Daśledavańni praciahvajucca.

Dadatkovyja sposaby abarony ad ukusaŭ klaščoŭ:

• Nadziavajcie vysokija škarpetki i boty, zapraŭlajcie štany ŭ škarpetki.
• Zakryvajcie ŭsie adtuliny ŭ vopratcy — z dapamohaj remienia, humak ci ščylnaj tkaniny.
• Vykarystoŭvajcie zarehistravanyja repielenty.
• Idzicie pa centry ściažynki, paźbiahajcie vysokaj travy i kustoŭ — tam klaščy asabliva aktyŭnyja.
• Paśla viartańnia dadomu ahladajcie siabie, dziaciej i chatnich žyvioł. Rasčašycie sabaku.
• Adrazu paśla prahułki prymicie duš, kab zmyć reštki repielentu i vypadkovych klaščoŭ.
• Vopratku pažadana adrazu zakinuć u sušyłku na vysokuju tempieraturu na 10 chvilin — heta źniščaje klaščoŭ. Rečy, apracavanyja piermietrynam, majcie za zvyčku myć asobna.

• 28
• 4
• 2
• 2
• 7
• 4
• 0
• 0