17-hadovy startapier zajaviŭ, što bazu karystalnikaŭ «Novaj Biełarusi» ŭzłamali. Libier adkazvaje: abvinavačvańnie absurdnaje
Na jutub-kanale błohiera Siarhieja Piatruchina vyjšła videa z abvinavačvańniem Paŭła Libiera ŭ zamoŭčvańni fakta ŭzłomu płatformy «Novaja Biełaruś» i ŭciečcy asabistych danych karystalnikaŭ. Hałoŭny aŭtar abvinavačvańniaŭ — 17-hadovy Alaksiej Burbicki, jaki prezientuje siabie jak maładoha startapiera ŭ Jeŭropie i nazyvaje siabie eks-supracoŭnikam kamandy Libiera, jaki «z 2024 hoda pracavaŭ na aŭtsorsie na vałanciorskich pačatkach, raspracoŭvajučy nievialikija prahramnyja moduli».
«Hetaja historyja vydumanaja ad pačatku da kanca. Nijakich źlivaŭ u nas nie było, a Alaksiej u nas nie pracavaŭ», — prakamientavaŭ Pavieł Libier «Našaj Nivie».
Pa słovach Paŭła Libiera, Alaksiej vychodziŭ na jaho tolki adnojčy: u krasaviku 2025 hoda, paprasiŭšy hlanuć jaho startap.
«Ja jamu skazaŭ, što startapy nie kansultuju. I ŭsio. Taksama jon napisaŭ na poštu dadatku Svae, prapanoŭvajučy rekłamnuju intehracyju, ale jaho rekłamy ŭ nas nie było».
Na siońnia Alaksiej pačyściŭ pierapisku z Paŭłam, kaža apošni. Pry hetym u videa na kanale Piatruchina Burbicki dałučyŭ skrynšoty listavańnia, jakoje nibyta mieła miesca jašče ŭ studzieni. Pavieł Libier ža zapeŭnivaje, što ŭpieršyniu Alaksiej pačaŭ hrukacca da jaho i kamandy tolki ŭ krasaviku.
Taksama Alaksiej nibyta pisaŭ bratu Paŭła Vitalu.
«U mianie jość brat Vital, ale jon nijakim bokam nie maje dačynieńnia da prajektaŭ. Hetaja historyja pra toje, što možna źmiašać praŭdu i chłuśniu, kab heta vyhladała bolš pierakanaŭča», — kamientuje Pavieł Libier.
Dyk ci ŭciakli čullivyja danyja biełarusaŭ u sieciva?
U studzieni 2023 hoda KDB pryznaŭ płatformu «Novaja Biełaruś» «ekstremisckim farmavańniem». U lutym 2025 hoda dadatak pravioŭ rebrendynh — ciapier jon maje nazvu Svae.
Pry hetym Alaksiej Burbicki śćviardžaje, što akurat u pačatku 2025-ha płatforma była ŭzłamanaja, i mienavita tamu kamanda i vyrašyłasia na rebrendynh: tady na pracoŭnuju poštu płatformy nibyta pryjšło paviedamleńnie z patrabavańniem pieravodu kryptavaluty za toje, što chakiery nie buduć raspaŭsiudžvać danyja karystalnikaŭ i viarnuć dostup. Praŭda, na skrynšocie ad Burbickaha ŭsio vyhladaje jak zvyčajny skam — machlarskaje paviedamleńnie, jakoje rassyłajecca, kab čałaviek nieabačliva nacisnuŭ na spasyłku.
«Nie viedaju, ci płaciŭ Libier kamuści hrošy, ale dostup viarnuli», — začytvaje Burbicki ŭ kadry. Usiu sutnaść abvinavačvańniaŭ jon taksama čytaje z zahadzia padrychtavanaj krynicy.
Što tyčycca danych, jakija jon vydaje za piersanalnyja źviestki biełarusaŭ, jakija ciapier dastupnyja na chakierskich sajtach dla kupli, to tam možna razhledzieć infarmacyju pra biznesy, jakija i tak jość u adkrytym dostupie. Dla servisu Bymapka biełarusy ŭvohule admysłova dasyłajuć źviestki pra svaje pasłuhi, kab luby achvotny moh skarystacca imi, znajšoŭšy aryjenciry na karcie ŭ krainie pražyvańnia.
«Apublikavanaja Alaksiejem infarmacyja datyčna našaj płatformy prosta fizična nie moža być realnaj. Dadatak nie źbiraje nijakich piersanalnych danych. Vy možacie pisać u čaty, pakinuŭšy e-mail. Heta adzinaje, što jon u vas paprosić. Vy fizična nie možacie ŭnieści tam takuju kolkaść danych, jak na skrynšotach [ź videa]. Navat kali vy pakidajecie mejł, u nas jość znoska: kali łaska, zrabicie jaho depiersanalizavanym, nam nie treba viedać, chto vy. Tamu źliŭ niejkaj bazy niemahčymy: jaje niama», — kamientuje Pavieł Libier.
«Naša Niva» źviarnułasia pa dadatkovy kamientar da Alaksieja Burbickaha. Jon admoviŭsia adkazvać na pytańni redakcyi:
«Usio, što ŭ mianie było, ja ŭsio raskazaŭ Siarhieju Piatruchinu, jakomu daviaraju. Bolš mnie dadać niama čaho. Usie dokazy ja jamu taksama daŭ».
Admoviŭsia jon i dadatkova paćvierdzić fakt listavańnia z Paŭłam Libieram.
Kamientary
I úsie rahočuć