Ukraina ŭ miežach abmienu pałonnymi z Rasijaj 25 traŭnia pieradała hramadzianina Biełarusi Siarhieja Mirončyka, jaki trapiŭ va ŭkrainski pałon u lutym 2025 hoda.
Jak paviedamili Svabodzie va ŭkrainskim prajekcie «Chaču žyć», jaki realizuje Kaardynacyjny štab Ukrainy ŭ pytańniach abychodžańnia z vajennapałonnymi, da kantraktu z rasijskaj armijaj jon žyŭ u pasiołku Tajcy Hatčynskaha rajona Leninhradskaj vobłaści.
Słužyŭ u padraździele «Štorm V» — heta adno z dvuch farmiravańniaŭ va Uzbrojenych siłach Rasii, jakija farmavalisia sa źniavolenych u rasijskich turmach.
U zhadanym pasiołku Tajcy znachodziacca try kałonii — № 2, № 5 i № 6, u jakich adbyvajuć pakarańnie za ciažkija i asabliva ciažkija złačynstvy. U jakoj ź ich zavierbavali Mirončyka i za jakija złačynstvy jaho asudzili ŭ Rasii — nieviadoma.
Zhodna ź infarmacyjaj ukrainskaha boku, Siarhiej Alaksandravič Mirončyk naradziŭsia 22 lipienia 1982 hodu, žanaty. Žonka Kaciaryna žyvie ŭ Rasii, imavierna, ŭ Sankt-Pieciarburhu. Jahonaje imia było ŭ raniej apublikavanych ukrainskim prajektam «Chaču žyć» śpisach hramadzian Biełarusi, jakija vajujuć na baku Rasii, ale jahonaje imia pa baćku ŭ tych śpisach inšaje — Anatoljevič. Va ŭkrainskim prajekcie nie vyklučajuć, što adbyłasia pamyłka.
Sioleta 19 maja Siarhieja Mirončyka ŭklučyli ŭ bazu centra «Miratvorac», jaki z 2014 hodu źbiraje infarmacyju pra asobaŭ, datyčnych da złačynstvaŭ suprać Ukrainy. Jaho identyfikavali jak «vajskovaha złačyncu i zamiežnaha najomnika-terarysta», jaki datyčny «da hienacydu ŭkrainskaha narodu šlacham viadzieńnia bajavych dziejańniaŭ suprać cyvilnaaha nasielnictva, cyvilnych abjektaŭ i abjektaŭ infrastruktury» i śviadomaha parušeńnia dziaržaŭnaj miažy Ukrainy.
Siarhiej Mirončyk staŭ siomym hramadzianinam Biełarusi, jaki znachodziŭsia va ŭkrainskim pałonie i jakoha pieradali ŭ miežach abmienu z Rasiejaj: u 2020 hodzie pieradali Dźmitryja Novikava, u 2024-ym — Andreja Hieryłoviča, Maksima Ziaziulčyka i Maksima Zapieku, u 2025-ym — Dźmitryja Anančyka i Alaksieja Čarnyšova.
Ciapier va ŭkrainskim pałonie zastajucca jašče 7 hramadzian Biełarusi: Ivan Šabuńka, Siarhiej Šustaŭ, Andrej Łapatnioŭ, Jaŭhien Kamiańkoŭ, Artur Jafremaŭ, Michaił Šałhun, Mikałaj Žuraŭloŭ.
Svajaki jašče dvuch hramadzian Biełarusi, jakija pajšli vajavać na baku Rasii, zajavili ab ichnym źniknieńni bieź viestak. Heta Jaŭhien Iljin i Andrej Kułaha. Jašče adzin biełarus — Ihar Chasanaŭ, jakoha šukali svajaki, paźniej znajšoŭsia z ranieńniem u adnym z špitalaŭ u akupavanaj častcy Łuhanskaj vobłaści.
U pieramovach Rasii i Ukrainy ab abmienach pałonnymi ŭdzielničajuć deputatka Pałaty pradstaŭnikoŭ Iryna Kaścievič i aficer KDB, kolišni supracoŭnik ambasady Biełarusi va Ukrainie Valer Ściepanovič.
Kamientary