«Tydzień u Brazilii, dzie ciabie abrabujuć, abo dva tydni ŭ biaśpiečnaj Biełarusi». Pa što zamiežniki jeduć u našu krainu

U sacsietcy Reddit i na forumie viadomaha sajta padarožžaŭ Tripadvisor padarožniki ź inšych krain časam dzielacca, čym ich zacikaviła Biełaruś.

Najčaściej zamiežniki jeduć u našu krainu, bo adtul ich siabry abo partnior ci partniorka. 

Ale časam jość i bolš aryhinalnyja viersii. Naprykład, adzin italjaniec padzialiŭsia z karystalnikami Reddit, što jon prosta apantany idejaj prajechać na mašynie ad Italii da Biełarusi:

«Viedaju, što heta hučyć vypadkova i trochi pa-varjacku, ale ŭ hetym i fiška. Prahnu sapraŭdnych pryhod, i Biełaruś zaŭždy mianie intryhavała, bo heta sumieś postsavieckaj atmaśfiery, niekranutaj pryrody i, budziem ščyrymi, tajamnicy vakoł hetaha».

A voś hety zamiežnik maje bolš pryziemlenyja intaresy:

«U kancy nastupnaha miesiaca ja pajedu ŭ Biełaruś (Minsk i Brest). Ja lublu vyvučać kultury praź ježu. U mianie niama alerhij, ja nie pieraborlivy ŭ ježy i zaŭždy radujusia mahčymaści pakaštavać dziŭnuju ježu, bo ja nikoli nie viedaju, kali ŭ mianie budzie nastupny šans jaje źjeści».

Niekatoryja turysty nastolki adkazna rychtujucca da pajezdki, što znachodziać takija maršruty, pra jakija zadumajecca nie kožny biełarus.

Naprykład, adzin brytaniec płanuje svajo padarožža ažno za try miesiacy i dumaje nie tolki pra kłasičnyja kirunki nakštałt Minska ci Niaśviža, a i pra savieckija pomniki i mazaiki ŭ Breście i Homieli. Taksama turyst žadaje naviedać Biełaviežskuju pušču i piša, što jaho cikaviać peŭnyja miescy ŭ Iŭi.

Ale ž jość i zamiežniki, jakija jašče vahajucca nakont taho, ci treba im jechać u Biełaruś, i prosiać paradaŭ u siecivie:

«Ja słavianin (ruski?) z Kazachstana, naradziŭsia ŭ Kazachstanie, jak i maje baćki. Mieŭ ideju pajechać vučycca ŭ Minsk. Zvonku ŭsio vyhladała daskanała. Mnie padałosia, što heta taki zručny ŭ moŭnym płanie kutok Jeŭropy, i ja adčuvaŭ, što mahu dobra ŭlicca ŭ biełaruskaje hramadstva. Ale pačaŭ čytać tredy ŭ Reddit i hladzieć videanaviny, ciapier ja napužany».

Inšy hramadzianin Polščy, jaki źbirajecca ŭ Biełaruś, daśleduje historyju Polščy pamiž dźviuma suśvietnymi vojnami — toj čas, kali ŭ składzie Polščy była Zachodniaja Biełaruś. 

Z hetym źviazany i jahony post na Reddit:

«Mianie asabliva cikaviać umacavańni, pabudavanyja na ciapierašniaj biełaruskaj terytoryi. Ja chaču pajechać u Biełaruś, kab ich daśledavać. U mianie pytańnie: ci heta biaśpiečna z punktu hledžańnia prablem z uładami? Jakija šansy, što mianie zatrymajuć za vyvučeńnie mižvajennych (1931-1938) zakinutych bunkieraŭ?»

Byvaje, što zamiežnikam i ŭvohule ciažka vyśvietlić, što ž ich ciahnie ŭ Biełaruś. Tak zdaryłasia z padarožnikam sa Šviecyi:

«Ja pajechaŭ u Biełaruś adzin, tolki zabraniravaŭ numar na adnu noč i nabyŭ zvarotny kvitok na datu praz try dni. Kali ščyra, heta, napeŭna, było naiŭna. Soła-padarožža dla siabie, mahčyma, vyklikanaje niejkaj ekzistencyjnaj turbotaj».

Švied nie raspłanavaŭ padarožža, ale jamu paščaściła sa spadarožnikam — u aŭtobusie da Minska atrymałasia paznajomicca ź biełarusam, jaki havaryŭ pa-anhlijsku. Novy siabar pakazaŭ šviedu horad, paznajomiŭ jaho ź miascovymi žycharami, pravioŭ na parad 9 Maja i navat prapanavaŭ pakaštavać chaładziec. Nie abyšłosia biez tryvožnaha dla zamiežnika momantu: švied akazaŭsia na vulicy ŭ niećviarozym stanie, i da jaho padyšli siłaviki — zapytalisia, ci ŭsio ŭ paradku.

U vyniku čakańni švieda ad Biełarusi nie supali z realnaściu:

«Dumaŭ, što atrymaju ad hetaha padarožža niešta hłybokaje, mahčyma niejkuju mudraść, transfarmacyju. Heta było nachabna, ale kali tak, to mnie paščaściła. Bo toje, što ja atrymaŭ, lepš za adkryćci ŭ samim sabie — [atrymaŭ] suviaź [ź ludźmi]».

Žychar ZŠA paprasiŭ parady na forumie Tripadvisor: maŭlaŭ, treba vybrać pamiž adpačynkam u Paŭdniovaj Amierycy i adpačynkam u Jeŭropie z zajezdam u Biełaruś. Jamu adkazaŭ u tym liku žychar Brytanii — zdajecca, u jaho adkazie pieraličanyja ŭsie asnoŭnyja charaktarystyki našaj krainy z punktu hledžańnia turystaŭ:

«Tydzień u Brazilii, dzie ciabie abrabujuć i abdziaruć, a ty pabačyš tolki haru zabaŭnaj formy, statuju Chrysta i fajny plaž. Abo dva tydni ŭ Biełarusi, dzie tabie budzie supierbiaśpiečna, dzie ty pabačyš pryhožyja harady i klimat, a taksama najmilejšych, samych mudrahielistych i mirnych ludziej na płaniecie.

Chočaš pryhožuju statuju — jedź u Brest, patrebny plaž — pasprabuj Brasłaŭskija aziory. Što da hary, tut nie tak šmat možna zrabić. Ale kamu patrebnaja hara, kali možna pravieści čas za pajadańniem salanki, dranikaŭ, blinoŭ i baršču?»

• 9
• 3
• 6
• 0
• 0
• 0
• 0
• 0