Turcyja — ad 1600 jeŭra, Jehipiet — kala 1800 dołaraŭ, i «tanny» Tajłand. Kolki kaštuje letni adpačynak z vyletam ź Minska
Biełaruskija turfirmy raskazali pra ceny letnich turaŭ u 2025 hodzie ŭ Jehipiet, Turcyju i Bałharyju.
Važna razumieć: adnaznačnuju «siaredniuju canu» nazvać ciažka. Na jaje ŭpłyvaje vielmi šmat faktaraŭ — uzrovień hatela, kolkaść zorak, jakaść absłuhoŭvańnia, charčavańnia, napojaŭ, adlehłaść da plažu, čas tranśfieru z aeraporta i inšyja drobiazi, raspaviadaje «KP».
Adpačynak u Jehipcie
Pa infarmacyi ad minskaha turahienctva, u pačatku letniaha siezonu tur u Jehipiet na 9—10 načej abydziecca minimum u 1800 dołaraŭ (u biełaruskich rublach). Pry hetym havorka idzie pra hatel siaredniaha ŭzroŭniu. Kali chočacca lepšych umoŭ, to varta rychtavacca da sumy ad 2000—2200 dołaraŭ na dvaich (z vyletam ź Minska).
Adpačynak u Turcyi
Turcyja zastajecca adnym z samych papularnych kirunkaŭ u biełarusaŭ. Dla tych, chto vybiraje adpačynak pa sistemie «ŭsio ŭklučana» z vyletam ź Minska čartaram, košt na pačatku leta startuje ad 1600—1800 jeŭra za 9—10 načej na dvaich — heta samy prosty varyjant. Bolš kamfortnyja hateli abyducca ad 2000 jeŭra.
Adpačynak u Tajłandzie
Biełarusy ŭsio čaściej vybirajuć Tajłand. Zaraz tam siezon daždžoŭ, tamu treba być hatovym da vilhotnaha nadvorja, choć daždžy i nie iduć uvieś čas.
Pa słovach turahientaŭ, ciapier najbolš vyhadna lacieć u Tajłand z Maskvy — heta dazvalaje prykmietna zekanomić. Košt tura na dvaich (9—10 načej) — ad 1600—1800 jeŭra. U «vysoki siezon», kali daždžy skončacca, anałahičny tur moža kaštavać ad 2300 jeŭra.
Adpačynak u Bałharyi
Bałharyja — adzin ź cikavych varyjantaŭ siezona-2025, pa słovach śpiecyjalistaŭ. Vylet adbyvajecca ź Vilniusa abo Varšavy, a šerah turfirmaŭ dapamahaje z atrymańniem šenhienskaj vizy, kab pajechać u Litvu ci Polšču i ŭžo adtul lacieć u Bałharyju.
Košt adpačynku na dvaich — ad 1200 jeŭra. Ale jość momant: vizavuju padtrymku nadajuć u asnoŭnym dla turaŭ na lipień 2025 hoda, tamu, kali adpačynak płanujecca na hety miesiac — samy čas zajmacca arhanizacyjaj.
Adpačynak u Čarnahoryi
Taksama biełaruskija turahienctvy prapanujuć adpačynak u Čarnahoryi — vylet ź Minska ź pierasadkaj u Stambule. Ale ceny nie samyja dastupnyja: ad 2500 jeŭra na dvaich i heta — biez uklučanaha charčavańnia.
Kamientary