Hramadstva11

Eks-palitviazień raskazaŭ, jak atrymaŭ mikrainfarkt padčas suda

Bieraściejca Siarhieja Naliŭku sudzili ŭ 2021-m pa «karahodnaj» spravie, a paśla dadali termin za kamientar. Padčas sudoŭ mužčyna pieražyŭ mikrainfarkt i reanimacyju, a paźniej adbyvaŭ termin u adnoj z samych žorstkich biełaruskich kałonij dla recydyvistaŭ — voś jak heta było.

Siarhiej Naliŭka. Fota: archiŭ surazmoŭcy

«Bajsoł» adkryŭ zbor, kab dapamahčy Siarhieju ŭładkavacca ŭ zamiežžy — paŭdzielničać možna tut.

Siarhieju 40 hadoŭ. Pracavaŭ u taksi, u kramie ŭ achovie, byŭ budaŭnikom u Polščy.

Mužčyna — udzielnik paślavybarčych pratestaŭ u Breście ŭ 2020-m hodzie, u tym liku i «karahodnaha» pratestu 13 vieraśnia, za jaki asudzili bolš za 114 čałaviek.

Naliŭka trapiŭ u druhuju partyju abvinavačanych pa «karahodnaj» spravie, ale praz stan zdaroŭja mužčynu pieraviali ŭ nastupnuju hrupu. Usio tamu što paśla pieršaha sudovaha pasiadžeńnia Siarhiej — jakomu tady było 36 hadoŭ — pieražyŭ mikrainfarkt.

Tady Naliŭka znachodziŭsia pad padpiskaj ab niavyjeździe:

«Pryjechaŭ dachaty z suda. Doŭha lažaŭ, niešta prychapiła, dychać było ciažka. Maci prapanavała vyklikać chutkuju, kažu: nie treba, zaraz projdzie. Narešcie ŭstaŭ, dyk mianie tak skurčyła, što dychać nie moh. Maci kaža — vyklikaju chutkuju, bo nie mahu na ciabie hladzieć.

Pryjechała chutkaja. Skazali, što ŭ mianie mikrainfarkt, zabrali. Adrazu pavieźli ŭ apieracyjnuju, abśledavali praz ruku — hladzieli, dzie vieny zakuporanyja».

Dalej byli try dni ŭ reanimacyi i jašče dva tydni ŭ adździaleńni kardyjałohii. A potym Siarhieja vypisali, i praz paru dzion jon znoŭ pajšoŭ na sud. Raskazvaje, adnak, što nastupstvy mikrainfarkta adčuvaje dahetul, bo časam balić serca, skača cisk. Svoj mikrainfarkt jon źviazvaje z sudom i pieražyvańniami.

Za «karahod» Siarhieja asudzili na «chimiju» — jon adpraviŭsia adbyvać dva hady terminu ŭ Viciebsk. Papracavaŭ na drevaapracoŭcy i na vyrabie draŭlanych paddonaŭ. U niejki momant, kaža Siarhiej, jamu pačali vypisvać parušeńni: naprykład, nie pavitaŭsia z supracoŭnikam, nie prybraŭsia ŭ pakoi. Za miesiac jon atrymaŭ try parušeńni i ŭ vyniku adbyvaŭ reštu terminu ŭ kałonii — heta była PK-5, što ŭ Ivacevičach.

Fota: Lookbymedia

Ale na svabodu jon tady nie vyjšaŭ, bo Siarhieja znoŭ asudzili. Na hety raz — pa artykule 369 za «abrazu pradstaŭnika ŭłady»: niekali mužčyna pakinuŭ niecenzurny kamientar pra desantnika z 38-j bryhady, bo toj kinuŭ BČB-ściah na padłohu i vyciraŭ ab jaho nohi. Prysud — dva hady strohaha režymu.

Adbyvać novy termin Siarhieja nakiravali ŭ kałoniju №8, što ŭ Oršy:

«Napeŭna, heta adna z najhoršych zon u Biełarusi, nijakich umovaŭ niama ŭ źniavolenych. Kali ja tudy pryjechaŭ, ja ŭžo ŭ pieršyja tydni zrazumieŭ, kudy trapiŭ. Raskazali, što mnie tam nie daduć spakojna siadzieć, buduć dušyć i dušyć.

Paśla karancinu jašče bolš upeŭniŭsia, kudy trapiŭ. Pahladzieŭ, jak žyvuć viaźni, jak u tych pakojach biehajuć prusaki i myšy. Niama nijakaha ramontu, navat vokny stajać draŭlanyja, jakija pradzimajucca».

Dla cisku na palitviaźniaŭ vykarystoŭvajuć kryminalnikaŭ:

«Ludzi, jakija siadziać, imknucca adzin adnaho prynizić i da mianie tak stavilisia. Padhavorvali adzin adnaho, kab sa mnoj nichto nie kamunikavaŭ, tamu što ja — palityčny. Ale potym tyja ž viaźni, jakija padhavorvali, sa mnoj i hutaryli, nie zrazumieŭ ich łohiku.

Ci, naprykład, zimoj vychodzim na pravierku, jana skančvajecca a pałovu na vośmuju. Ale śpiecyjalna buduć nie dazvalać razychodzicca da vaśmi, kab ludzi mierźli, chacia i bačać — śnieh idzie, maroz, ludzi pakutujuć».

Fota: archiŭ surazmoŭcy

26 kastryčnika 2024-ha bieraściejec narešcie vyjšaŭ na volu. Sprabavaŭ naładzić žyćcio na radzimie, ale zrazumieŭ, nakolki heta składana dla byłych palitviaźniaŭ. 3 maja 2025-ha Siarhiej pierabraŭsia ŭ Varšavu.

«Pracuju na ramoncie pasažyrskich vahonaŭ. My tut usie padalisia na mižnarodnuju abaronu, i z hetym časovym dakumientam, jaki nam dali, mała chto choča brać na pracu. Niedzie treba viedać polskuju movu, ja jaje trochi viedaju, ale im niedastatkova».

«Bajsoł» adkryŭ zbor, kab dapamahčy Siarhieju ŭładkavacca ŭ zamiežžy — paŭdzielničać možna tut.

«Naša Niva» — bastyjon biełaruščyny

PADTRYMAĆ

Kamientary1

  • pf
    09.06.2025
    v žodinskom sizo tožie było mnoho tarakanov i myšiej, a žienskaja kołonija nie ustupajet v žiestokosti - davili každyj dień

Ciapier čytajuć

Izrail pačaŭ novuju chvalu ŭdaraŭ pa Iranie11

Izrail pačaŭ novuju chvalu ŭdaraŭ pa Iranie

Usie naviny →
Usie naviny

Izrailskija ŚMI: jadzierny reaktar u iranskim Natanzie źniščany daščentu12

Kamu ź biełaruskich dziaciej nielha vučycca za miažoj? Minadukacyi prakamientavała našumieły zakon3

Prapahandyst Ihar Tur vyrašyŭ pierasialicca bližej da Astrašyckaha Haradka19

Cichanoŭskaja pra kiejs Mielnikavaj: Situacyja strašnaja32

U Polščy zatrymali afhanca, jaki dumaŭ, što jon u Paryžy. Tak jamu skazaŭ pravadnik, što supravadžaŭ ad miažy Biełarusi3

Jakija časy, takija i prezienty: u biełaruskich aptekach možna nabyć padarunkavyja siertyfikaty1

Izrail zadziejničaŭ dla ŭdaraŭ pa Iranie 200 samalotaŭ2

Iran zapuściŭ 100 dronaŭ pa Izraili3

Tramp adreahavaŭ na avijaŭdary Izraila pa Iranie2

bolš čytanych navin
bolš łajkanych navin

Izrail pačaŭ novuju chvalu ŭdaraŭ pa Iranie11

Izrail pačaŭ novuju chvalu ŭdaraŭ pa Iranie

Hałoŭnaje
Usie naviny →

Zaŭvaha:

 

 

 

 

Zakryć Paviedamić