«Mikałaja bili, dzie tolki jaho bačyli». Pra katavańni źniavolenaha anarchista Dziadka raskazała advakatka Mackievič

Voś što, siarod inšaha, raspaviała Mackievič u intervju:

— Ź Mikałajem Dziadkom ja paznajomiłasia ŭ lakarni. Jon lažaŭ tam z čerapna-mazhavoj traŭmaj, jakaja źjaviłasia paśla jaho zatrymańnia pa darozie na marš 25 sakavika 2017 hodu. Tamu dla mianie była davoli pradkazalnaj situacyja, kali «pravaachoŭnyja orhany» bili Mikałaja, dzie tolki jaho bačyli. U 2017 hodzie jaho navat nie pryniali ŭ izalatar časovaha ŭtrymańnia, a adpravili ŭ lakarniu chutkaj dapamohi paśla zatrymańnia.

— U listapadzie 2020 hodu mnie stali prysyłać kadry ź videa, na jakim pabity Mikałaj Dziadok. Ludzi viedali, što ja jahony advakat. Daśviedčanyja ludzi razumieli, što jon nie prosta pabity i što vykarystoŭvali ślozatačyvy haz.

— Taho, što ja na nastupny dzień pabačyła ŭ IČU, ja nikomu nie pažadaju bačyć. Mikoła Dziadok nie byŭ złamany, ale jon byŭ realna raźbity, pabity. Kroŭ ź jaho nie ciakła, ale i ruki, i tvar byli ŭ śladach ad pabićcia. Jon navat sam nie čakaŭ, što ź im mohuć abychodzicca tak brutalna. Heta była cełaja noč bićcia i pahrozaŭ. Potym jon raskazvaŭ pra heta ŭ sudzie.

Jon skazaŭ mnie: «Zrabicie niešta, kab heta bolš nie paŭtaryłasia». Nakolki ja viedaju, u toj pieryjad heta nie paŭtaryłasia — spadziajusia, što i ciapier nie.

— My pakazali śledčamu jahonyja hiematomy — na ŭsie nohi, na ŭsiu dupu, na ŭsiu śpinu.

Ja šmat što bačyła, ale takoha nie chacieła b bolš nikoli bačyć.

Ja adrazu ž napisała chadajnictva pra ekśpiertyzu. Choć ekśpiertyzu praviali praź niejki tydzień, tam jość fota jahonych siniakoŭ z apisańniem, pamierami i vysnovaj, što jany nie mahli ŭtvarycca padčas padzieńnia. Hetaja ekśpiertyza jość i ŭ jahonaj kryminalnaj spravie, ale pa fakcie pieravyšeńnia słužbovych paŭnamoctvaŭ miełasia b być asobnaja sprava. Była pravierka, ale jana, jak zaŭsiody, ni da čaho nie pryviała, jak i ŭsie zajavy pra katavańnie ŭ toj čas.

— Jaho bili, kab atrymać paroli ad ćviordaha dysku. Ale mahčyma, što bili prosta, kab pryhnieści jahonuju volu i ŭ niečym adpomścić. Bo možna ž było nie bić spačatku i pytacca potym. My viedajem, što pry zatrymańni jamu nasoŭvali na hałavu padušku, raspylali ślozatačyvy haz u tvar i začyniali jaho ŭ kładoŭcy, kudy raspylali haz, bili rukami i nahami. Potym u budynku HUBAZiK jaho bili da samaha ranku, pryšpilvali naručnikami, pahražali.

Mikałaj Dziadok — błohier, jaki pisaŭ i zdymaŭ videa na hramadska-palityčnyja temy, žurnalist, aktyvist anarchisckaha ruchu.

Zatrymali jaho 11 listapada 2020 hodu. Pry zatrymańni Dziadka mocna pabili, u vočy jamu raspylili piarcovy haz. Siłaviki hvałtam prymusili jaho źniacca na kamieru dla roliku MUS. Dziadok na sudzie zajaviŭ, što paśla zatrymańnia jaho katavali — bili dubinkaj, bili elektrašokieram pa piatkach, pahražali zhvałtavańniem.

10 listapada 2021 hodu Dziadka asudzili na 5 hadoŭ źniavoleńnia, pryznaŭšy vinavatym pavodle troch artykułaŭ:

• art. 342 KK («Arhanizacyja i padrychtoŭka dziejańniaŭ, što hruba parušajuć hramadski paradak, albo aktyŭny ŭdzieł u ich»),
• art. 361 KK («Zakliki da dziejańniaŭ, skiravanych na pryčynieńnie škody nacyjanalnaj biaśpiecy Biełarusi»),
• art. 295-3 KK («Niezakonnyja dziejańni ŭ dačynieńni da pradmietaŭ, dziejańnie jakich zasnavanaje na vykarystańni haručych rečyvaŭ»).

Mikałaj Dziadok nie pryznaŭ vinu pa nivodnym artykule. Jon mieŭ vyjści na volu 4 krasavika, ale jaho pieraviali ŭ SIZA № 1 u novaj kryminalnaj spravie, paviedamiŭ u krasaviku pryśviečany palitviaźniu telehram-kanał.

U vieraśni 2024 hodu stała viadoma, što na Mikołu Dziadka zaviali novuju kryminalnuju spravu pavodle art. 411 Kryminalnaha kodeksu — «Złosnaje niepadparadkavańnie patrabavańniam administracyi papraŭčaj ustanovy». Hety artykuł praduhledžvaje pazbaŭleńnie voli ciaham ad adnaho da troch hadoŭ. Artykuł dazvalaje praktyčna biaskonca praciahvać termin zaniavoleńnia palitviaźniam.

• 1
• 0
• 0
• 1
• 0
• 12
• 22
• 0