Hruzinski bank admoviŭ biełaruscy ŭ praviadzieńni płaciažu. Taja vyklikała palicyju — i dabiłasia svajho
Biełarusy Hruzii praciahvajuć sutykacca ź ciažkaściami. Maryna Zialonaja — čempijonka śvietu pa tajskim boksie — užo bolš za dva hady žyvie ŭ Tbilisi, kudy ŭciakła ad pieraśledu na radzimie. Maryna padała prašeńnie ab prytułku ŭ Hruzii i na čas pracedury ŭ jaje zabrali pašpart. Nadoječy žančynie spatrebiłasia apłacić sudovy zbor. Banki admovilisia pravodzić płaciež pavodle paśviedčańnia prośbita prytułku. Biełaruska nie pahadziłasia ź situacyjaj i vyklikała palicyju, kab jany zafiksavali parušeńnie jejnych pravoŭ, piša «Biełsat».
«Koła zamknułasia»
Maryna Zialonaja padała prašeńnie ab mižnarodnaj abaronie ŭ Hruzii na pačatku 2024 hoda, kali skončyŭsia termin dziejańnia pašparta ŭ jejnaha syna. Pieršaja instancyja — Departamient mihracyi — admoviła biełaruscy razam ź dziciom u prytułku. Pryčyna — pryznańnie ich abaich z boku Słužby dziaržaŭnaj biaśpieki Hruzii (SDB) pahrozaj nacyjanalnaj biaśpiecy.
«Heta śmiešna hučyć, što my z synam — pahroza biaśpiecy, ale jak jość, — kaža Maryna. — Ja, viadoma, pajšła ŭ sud, kab abskardzić admovu. I ja chacieła, kab na pasiadžeńnie pryjšli supracoŭniki SDB dy pahladzieli na toje, jakuju my ŭjaŭlajem niebiaśpieku dla krainy. Ale jany nijak nie reahavali. Tady ja źviarnułasia da ich z prapanovaj admianić rašeńnie. A heta možna rabić tolki praz sud, za jaki mnie i treba było zapłacić dziaržaŭny zbor».
U Maryny jość rachunak u adnym z hruzinskich bankaŭ, ale apłacić zbor možna tolki praz adzin z hałoŭnych bankaŭ — «Bank of Georgia» ci TBC. Dziela hetaha treba zarehistravacca ŭ bankaŭskaj sistemie. Adnak abodva banki admovilisia heta zrabić pavodle paśviedčańnia prośbita prytułku, a ŭ biełaruski patrabavali pašpart, jaki ŭ prośbitaŭ prytułku pavodle zakonu zabirajuć. Viarnuć pašpart dla rehistracyi ŭ banku niemahčyma.
«Koła zamknułasia. U banku TBC mnie pačali rehistracyju i vietliva prapanavali pačakać tydzień. Ja paprasiła paskoryć praces, i mnie paabiacali dać adkaz u najbližejšyja terminy. Ja pajšła ŭ susiedni «Bank of Georgia», ale tam mnie admovili ŭ samym pačatku. Skazali, što navat nie mohuć pačać pracesu pavodle hetaha dakumientu», — raspaviadaje Maryna.
Paśla vykliku palicyi praviali płaciež i adkryli rachunak
Biełaruska sprabavała razmaŭlać sa słužbaj padtrymki, adnak tam joj taksama skazali, što ničoha nielha zrabić. Tady žančyna paprasiła, kab joj dali piśmovuju admovu, adnak i na heta joj skazali, što nie zmohuć dać takoha dakumientu.
«Kali ja prajšła ŭsie sposaby damovicca, ja vyklikała palicyju, kab jany skłali pratakoł ab parušeńni majho prava ździejśnić biudžetny płaciež i zafiksavali hety incydent. I vy nie pavierycie — na nastupny dzień mnie patelefanavała vietlivaja žančyna sa słužby padtrymki klijentaŭ «Bank of Georgia» i mianie zarehistravali ŭ sistemie z mahčymaściu apłočvać zbory ŭ sud», — kaža Maryna.
Anałahična Marynu zarehistravali ŭ banku TBC. Žančyna taksama damahłasia, kab joj adkryli rachunak u hetym banku. U abodvuch vypadkach biełaruska tłumačyła bankaŭskim pracaŭnikam, što takoje paśviedčańnie prośbita prytułku i čamu pavodle jaho jana maje prava adkryvać rachunki, pravodzić płaciažy i karystacca inšymi pasłuhami.
Ciapier zastałosia dačakacca pryznačeńnia daty sudovaha pasiadžeńnia, što, na dumku biełaruski, moža być nie tak chutka, jak chaciełasia b. Pa-pieršaje, tamu što biełaruskija kiejsy hruzinam davodzicca davoli hłyboka vyvučać, bo biełarusy prykładajuć šmat dakumientaŭ, u tym liku mižnarodnyja dakłady i spravazdačy. Pa-druhoje, Maryna miarkuje, što takija niazručnyja dla hruzinaŭ kiejsy, jak jejny, buduć zaciahvacca ŭ čakańni «źmianieńnia situacyi, kali ŭžo ničoha nie treba budzie vyrašać».
Biełaruska taksama čakaje, kali Tbiliski haradski sud pryznačyć pasiadžeńnie ŭ jejnaj asnoŭnaj spravie — skarzie na admovu ŭ mižnarodnaj abaronie. Maryna ŭžo prajšła try intervju. Zvyčajna byvaje tolki dva, ale žančyna zrabiłasia čalcom Kaardynacyjnaj rady, što aznačała dadatkovyja abstaviny ŭ kiejsie.
Biełarusy ŭ Hruzii: statystyka
Stanam na 1 studzienia 2025 hoda ŭ Hruzii žyli 12 808 biełarusaŭ. Z 2021 hoda ŭ krainu pryjechali 20 952 asoby, vyjechali — 8144. Ciaham 2023—2024 hadoŭ kolkaść hramadzian Biełarusi ŭ Hruzii źmienšyłasia bolš čym na tysiaču čałaviek.
Za apošnija piać hadoŭ, z 2019 da 2024 hoda, hruzinskija ŭłady nie zadavolili nivodnaha prašeńnia ad biełarusaŭ ab nadańni prytułku. Taksama za hety čas adbyłosia niekalki vypadkaŭ, kali biełarusaŭ nie puskali ŭ krainu paśla vizaranu (vyjezd za miežy krainy, kab abnulić termin znachodžańnia).
Pavodle źviestak hruzinskaha MUS, u pieršym kvartale 2025 hoda Hruzija admoviła ŭ mižnarodnaj abaronie 13 biełarusam, u tym liku dvum niapoŭnahadovym. Ahulnaja kolkaść admoŭ z 2019 hoda — 69, ź ich 15 čałaviek — niapoŭnahadovyja.
Kamientary