Polšča ŭskładniła ŭmovy pracaŭładkavańnia i atrymańnia DNŽ pa pracy dla zamiežnikaŭ

Kardynalna novy padychod

Polšča pryniała značnyja źmieny ŭ mihracyjnym zakanadaŭstvie. Ciapier zamiežnikam stała składaniej uładkavacca na pracu i atrymać časovy dazvoł na žycharstva pa pracy.

Pavodle novych pravił, inšaziemcam z trecich krain dla taho, kab aficyjna pracaŭładkavacca i pretendavać na pracoŭny DNŽ, užo niedastatkova prosta lehalna znachodzicca na terytoryi Polščy i atrymać dazvoł na pracu.

Abnoŭlenaje zakanadaŭstva abmiažoŭvaje mahčymaść pracaŭładkavańnia i padačy zajavy na atrymańnie časovaha DNŽ dla tych, chto znachodzicca ŭ Polščy na padstavie:

— turystyčnaj abo haściavoj vizy, vydadzienaj Polščaj abo inšaj krainaj Šenhienskaj zony;

— doŭhaterminovaj (nacyjanalnaj) vizy, vydadzienaj Polščaj abo inšaj krainaj Šenhienskaj zony;

— pastajannaha abo časovaha dazvołu na žycharstva, vydadzienaha ŭ inšaj krainie ES / Šenhienskaha pahadnieńnia.

Vyklučeńnie składajuć vypadki, kali ludzi karystajucca pravam mabilnaści na terytoryi Polščy. Pad ich pry peŭnych umovach mohuć trapić uładalniki DNŽ typu EU Blue Card i statusu pastajannaha rezidenta ES. 

Taksama ŭ śpis z abmiežavańniami traplajuć uładalniki viz, atrymanych na humanitarnych padstavach, a taksama na padstavie ŭdziełu ŭ spartyŭnych i kulturnych mierapryjemstvach.

Raniej padobnyja abmiežavańni raspaŭsiudžvalisia tolki na vizy, vydadzienyja ŭ turystyčnych metach i dla naviedvańnia svajakoŭ abo siabroŭ.

Inšymi słovami, uładkoŭvacca na pracu i pretendavać na atrymańnie pracoŭnaha DNŽ u Polščy ciapier mohuć tolki:

— uładalniki polskaha DNŽ, vydadzienaha pa inšych, nie pracoŭnych padstavach;

— trymalniki karty palaka;

— asoby, jakija majuć polskuju pracoŭnuju vizu.

Kiepskija naviny dla tych, chto raniej atrymaŭ pracoŭnuju vizu, ale tak i nie pačaŭ pracu. Heta adna z zakonnych padstaŭ dla admovy ŭ vydačy novaha dazvołu na pracu.

Taksama ŭ pracadaŭcaŭ źjaviŭsia abaviazak paviedamlać vajavodzie praz partał praca.gov.pl na praciahu 7 dzion, kali:

— inšaziemiec nie prystupiŭ da pracy na praciahu 2 miesiacaŭ z pačatku terminu dziejańnia dazvołu;

— pierastaŭ pracavać bolš čym na 2 miesiacy;

— zaviaršyŭ pracu bolš čym za 2 miesiacy da zakančeńnia terminu dziejańnia dazvołu.

Nievykanańnie hetych abaviazacielstvaŭ moža paciahnuć štraf u pamiery da 5000 złotych (kala 1170 jeŭra).

To-bok atrymać pracoŭny VNŽ i vykarystoŭvać jaho nie dla pracy, a dla padarožžaŭ nie atrymajecca.

Pavialičyć

Nie tolki kiepskija źmieny dla inšaziemcaŭ

Siarod pazityŭnych navin — źjaŭleńnie patrabavańnia ab minimalnym štomiesiačnym zarobku dla zamiežnikaŭ: jon nie moža być nižejšym za minimalnuju zarabotnuju płatu, niezaležna ad praciahłaści pracoŭnaha dnia abo formy pracoŭnych adnosin. Navat kali zamiežnika najmajuć na niapoŭnuju staŭku, apłata musić być nie mienšaj za minimum pa krainie.

Na 2025 hod minimalnaja zarabotnaja płata bruta ŭ Polščy składaje 4666 złotych (kala 1100 jeŭra), što daje kala 3510 złotych (prykładna 820 jeŭra) na ruki.

Heta norma, imavierna, skiravanaja na toje, kab pracadaŭcy nie ekanomili na padatkach i nie ŭładkoŭvali zamiežnikaŭ farmalna na 0,25—0,5 staŭki z zarobkami nižejšymi za minimalnyja.

Taksama, zhodna z abnoŭlenymi praviłami, u vypadku paharšeńnia situacyi na rynku pracy mohuć uvodzicca łakalnyja abmiežavańni: naprykład, śpisy prafiesij, niedastupnych dla zamiežnikaŭ, abo kvoty na ich pracaŭładkavańnie.

Padrabiaźniej pra źmieny možna pračytać tut.

• 8
• 0
• 3
• 7
• 1
• 8
• 0
• 0