«Balerynu niasuć u čatyry ruki, jak nasiłki z rastvoram». Biełarusy spračajucca pra novy balet «Ščaŭkunok»
Na novy balet «Ščaŭkunok» u Teatry opiery i baleta tak šmat niehatyŭnych vodhukaŭ, što ludzi ŭžo pytajucca ŭ sacsietkach, ci varta zahadzia zdać kvitki za 250 rubloŭ.
Čarhovaja premjera «Ščaŭkunka» adbyłasia ŭ Nacyjanalnym akademičnym teatr opiery i baleta jašče 28 listapada. Baletmajstram, chareohrafam, aŭtaram libreta staŭ Ihar Kołb.
Ihar Kołb naradziŭsia ŭ Pinsku i skončyŭ Biełaruskaje dziaržaŭnaje chareahrafičnaje vučylišča, jašče na 3 kursie pačaŭ vystupać na scenie Teatra opiery i baleta ŭ Minsku. Ale zorkaj staŭ u Rasii — z 1996 hoda jon pracavaŭ u Sankt-Pieciarburhu ŭ Maryinskim teatry.
U 2022 hodzie Ihar Kołb — zasłužany artyst Rasii — viarnuŭsia ŭ Minsk. Tut jaho zrabili hałoŭnym baletmajstram. U intervju BiełTA mužčyna raskazvaŭ, što pryniać prapanovu było nie vielmi prosta — bo siamja nie chacieła nikudy pierajazdžać z Sankt-Pieciarburhu.
Sioleta ŭ krasaviku hledačy aburalisia jaho bačańniem baletaŭ «Balero. Karmen». Publika tady paličyła, što novy baletmajstar «apahaniŭ śviatoje» i patrabavali viarnuć pastanoŭku Valancina Jelizarjeva.
Ciapier ža na Ihara Kołba abrynułasia novaja łavina krytyki — praz «Ščaŭkunka», jaki tradycyjna ličycca adnym z samych navahodnich baletaŭ. Mnohija pajšli na pastanoŭku ŭ kancy śniežnia.
Voś niekalki mierkavańniaŭ biełarusaŭ z sacyjalnych sietak.
«Ja maryła ab hetym balecie niekalki hadoŭ. Mienavita pierad Novym hodam! Viadoma, ja pračytała masu niepachvalnych vodhukaŭ ab novaj pastanoŭcy, ale ja da apošniaha nie toje, što vieryła, ale ja spadziavałasia, što ludzi pierabolšvajuć. Akazałasia — nie. Heta poŭny pravał. Heta mnie nahadała mastackuju samadziejnaść u pryhožych dekaracyjach. Navat muzyka nie vyratavała. Jana hučała niejak cicha i nievyrazna».
«Ahułam uražańni stanoŭčyja, ale taniec śniažynak pakinuŭ niehatyŭnyja emocyi: vielmi mocny raśsinchron — u kahości naha na 90 hradusaŭ, u kahości na 45, ruki roznyja, chtości adstaje, chtości śpiašajecca. Padzieńnie baleryny — asobnaja historyja, vielmi spadziajusia, što ź joj usio dobra. Prync taksama byŭ nie ŭ resursie — zavaliŭ balerynu, kali jana rabiła kručeńnie, jany ŭdarylisia nahami. A ŭ cełym było pryhoža. Ale paraŭnoŭvać niama z čym».
Niechta ŭsio ž sprabuje baranić kołbaŭskaha «Ščaŭkunka»: «Usie tak raźbirajucca ŭ balecie ŭ Minsku. Krytykujuć novaha «Ščaŭkunka». Jak futbolnyja kamientatary, joj Bohu. Ich by vypuścili, jany b stancavali i chareahrafiju b zrabili, i dekaracyi, jašče b i na arfie hrali b zaadno. Vydatnaja sučasnaja pastanoŭka na maju abyvacielskuju dumku. Atrymała maksimum zadavalnieńnia».
«Ludzi adčajna chacieli ŭbačyć toje, što bačyli šmat razoŭ. Nie hatovy prymać niešta novaje. Mnie spadabaŭsia «Ščaŭkunok», moj šaścihadovy syn byŭ uvohule ŭ zachapleńni. Nie viedaju… Syn sam skazaŭ, što budzie dakładna da samaha kanca, a potym jašče biaskonca kryčaŭ artystam «Brava!». Heta jahony pieršy balet i ja vielmi rada, što ŭsio mienavita tak prajšło. U novaj pastanoŭcy inšaje bačańnie i heta treba ŭmieć pryniać. Ja ŭ šoku, što ludzi pišuć taki niehatyŭ».
Byli i vodhuki zachapleńnia, ale krytyki bolš. U abmierkavańni paŭdzielničała madel i baleryna Lizavieta Arciušeŭskaja, jakaja tancuje ŭ novaj pastanoŭcy. Jana napisała ŭ Threads: «Ja ŭžo stamiłasia bačyć hetyja rasčaravanyja kamientary nakont novaha «Ščaŭkunka». Chiba heta nie pryhoža? Pryhoža! I vydatnyja tut nie tolki dekaracyi i kaściumy».
Pretenzij i joj napisali ŭ kamientarach šmat: «Dva partniory niasuć adnu balerynu na čatyroch rukach? Emm… Nu dla tych, chto bačyŭ vysokuju padtrymku baleryny adnym partnioram na adnoj ruce i pry hetym jon nie spatykaŭsia i hledačy nie bajalisia, što jon sarvie śpinu… Nie, nie vielmi pryhoža, vybačajcie».
«A vy pastanoŭku ŭ Maryincy bačyli? Toje, što ja baču na scenie, — heta nie balet, a niejki piłates, nu praŭda. Z elemientami zabiehu na karotkuju dystancyju i ź siłavym padychodam».
«Kali paraŭnoŭvać ź inšymi «Ščaŭkunkami», dyk heta ŭvohule nie balet. Bačyła videa, dzie dziaŭčaty-śniažynki skačuć sisony (vid skačkoŭ — NN), adny padnimajuć nohi na 90 hradusaŭ, inšyja navat nie imknucca z padłohi padniać. Pra dvuch pryncaŭ uvohule maŭču, hańba. Praściej schadzić u kino i pahladzieć staryja pastanoŭki, tam sapraŭdy atrymać asałodu ad možna».
«Navat nie viedaju, jak apisać toje, što adbyvajecca, kab atrymałasia bolš vietliva i miakka. Kali koratka — baleryny, što paŭzuć na popach, i dvoje tancoraŭ, jakija, niby budaŭniki, niasuć balerynu ŭ čatyry ruki, jak nasiłki z rastvoram. Chiba heta balet? Vam by baletmajstra razumnaha, u jakoha možna było b navučycca majsterstvu… Ale, na žal…».
Byli i videa z baleta «Ščaŭkunok», dzie dobra bačna, što padtrymka ŭ artystaŭ nie atrymałasia — ale Lizavieta pa-fiłasofsku kaža, što takoje byvaje va ŭsich.
Usio heta pryviało da taho, što inšyja ludzi pytajucca, ci varta zdavać kvitki i nie iści na hety balet — nie chočacca hublać hrošy, tym bolš, kali niechta zapłaciŭ 250 rubloŭ za adno miesca.
Balet pra Marka Šahała pastaviać u Vialikim teatry
Byłaja baleryna stała samaj maładoj miljarderkaj śvietu, jakaja zarabiła svoj kapitał samastojna
Jakija śpiektakli nazvali najlepšymi ŭ Biełarusi? Padviali vyniki Nacyjanalnaj teatralnaj premii
Čym žyvie opierny śpiavak Silčukoŭ, jakoha ŭ 2020‑m zvolnili ź Vialikaha teatra za pazicyju
Ciapier čytajuć
«Biełaruś ciabie lubić». Repartaž z raźvitańnia ź Mikitam Miełkazioravym5
Kamientary
On nie chorieohraf, polez tuda tolko potomu, čto tancovŝik był vieśma posriedstviennyj, a kušať nado pośle 40!
Žal ludiej, kotoryje potratiliś na Ŝiełkunčika - cieny tieatr ustanovił niehumannyje - 150 - 250 rublej za miesta v partierie, kotoryje obyčno stojat 70-90.
Svaje - zaniadbanaje .
Čužoje ú pašanie .
Mir eto vojna , Pravda eto łoż , Svoboda eto rabstvo , Džordž Oruełł