U Hłybokaje znoŭ sprabujuć pradać budynak byłoha klaštara karmielitaŭ. Jon raz za razam vystaŭlajecca na aŭkcyjon užo niekalki hadoŭ, ale kupiec dahetul tak i nie znajšoŭsia.
Pa źviestkach Biełaruskaj univiersalnaj tavarnaj biržy, čarhovyja tarhi pryznačanyja na 23 studzienia 2026 hoda. Startavaja cana — usiaho 42 rubli, a minimalny krok aŭkcyjonu składaje krychu bolš za dva rubli.
Dvuchpaviarchovy budynak klaštara karmielitaŭ źjaŭlajecca historyka-kulturnaj kaštoŭnaściu. Jon byŭ uźviedzieny ŭ 1735 hodzie. Na jaho terytoryi znachodzilisia žyłyja karpusy, biblijateka, špital, apteka i składy. U 1812 hodzie ŭ klaštary niekalki dzion spyniaŭsia Napaleon Banapart.
U 1865 hodzie manastyr byŭ zakryty, a na jaho terytoryi ŭźviali pravasłaŭnuju carkvu. Da našych dzion zachavaŭsia tolki adzin z troch karpusoŭ budynka.
11 hadoŭ tamu sud pryznaŭ budynak byłoha klaštara karmielitaŭ bieshaspadarčym i pieradaŭ jaho ŭ kamunalnuju ŭłasnaść. Za apošnija try hady niekalki razoŭ sprabavali pradać abjekt z aŭkcyjonu za adnu bazavuju vieličyniu, ale biezvynikova.
Łot uklučaje dvuchpaviarchovy cahlany dom z padvałam ahulnaj płoščaj kala 1280 kvadratnych mietraŭ. Da jaho prykładajecca ziamielny ŭčastak na 10 sotak z pravam arendy na 40 hadoŭ. Budučy ŭłaśnik abaviazany budzie zachoŭvać pomnik, bo jon maje status historyka-kulturnaj kaštoŭnaści.
Ciapier čytajuć
Jak kupić kvateru ŭ Minsku, kali niama kamu dapamahčy? Zadajecca pytańniem biełarus, jaki adkładaje pa $1000 u miesiac i ŭsio adno ŭ adčai21
Kamientary