Tramp padoŭžyŭ nadzvyčajny režym u dačynieńni da Biełarusi jašče na hod
Prezident ZŠA Donald Tramp pryniaŭ rašeńnie praciahnuć na čarhovy hod režym nacyjanalnaj nadzvyčajnaj situacyi ŭ dačynieńni da Biełarusi. Pra heta paviedamlajecca ŭ dakumiencie, apublikavanym u Fiederalnym rejestry ZŠA. Novy termin pačynajecca z 16 červienia.
U paviedamleńni adznačajecca, što dziejańni ŭładaŭ Biełarusi i asobnych čynoŭnikaŭ, a taksama šmathadovyja parušeńni pravoŭ čałavieka i inšyja niedemakratyčnyja praktyki praciahvajuć ujaŭlać surjoznuju pahrozu dla nacyjanalnaj biaśpieki i źniešniaj palityki Złučanych Štataŭ.
Hety režym byŭ uviedzieny jašče ŭ 2006 hodzie prezidentam Džordžam Bušam-małodšym paśla aryštu i źniavoleńnia apazicyjnaha kandydata ŭ prezidenty Alaksandra Kazulina. Z tych časoŭ ukaz №13405, jaki praduhledžvaje błakiroŭku majomaści asobaŭ, što padryvajuć demakratyčnyja pracesy ŭ Biełarusi, štohod padaŭžajecca.
U 2006 hodzie pad sankcyi trapili Alaksandr Łukašenka i šerah vysokapastaŭlenych čynoŭnikaŭ, uklučajučy kiraŭnikoŭ KDB, MUS, CVK i inšych. Bolšaść z hetych asob užo nie zajmajuć pasady, a niekatoryja źjechali z krainy.
Jak i letaś, u dakumiencie padkreślivajecca, što 9 žniŭnia 2021 hoda sankcyi byli pašyranyja z-za padaŭleńnia demakratyi, parušeńniaŭ pravoŭ čałavieka, falsifikacyi vybaraŭ 2020 hoda, razhromu apazicyi i hramadzianskaj supolnaści, a taksama stvareńnia pahrozy mižnarodnaj avijacyi.
Kamientary