U noč na 13 červienia Izrail udaryŭ pa Iranie. Metaj apieracyi byli jadziernyja abjekty Irana.
Izrail udaryŭ supraćbunkiernymi bojeprypasami pa jadziernych padziemnych abjektach u Natanzie, što ŭ 220 kiłamietrach ad stalicy Irana Tehieran. Izrailskija ŚMI paviedamlajuć, što jadzierny abjekt u Natanzie źniščany daščentu.
Udar nanieśli taksama pa pradpryjemstvie pa ŭzbahačeńni ŭranu ŭ Forda.
U vyniku ŭdaru zahinuli vysokapastaŭlenyja iranskija vajskoŭcy. Siarod ich — kamandujučy Korpusa vartavych isłamskaj revalucyi (KVIR) Chasiejn Sałami, kamandzir Vajenna-pavietranych sił KVIR Amir Ali Chadžyzade, hałoŭnakamandujučy iranskich Uzbrojenych sił Machamad Bahiery, namieśnik hałoŭnakamandujučaha Hałamali Rašyd.
Reuters sa spasyłkaj na dźvie rehijanalnyja krynicy piša, što padčas ataki zahinuli nie mienš jak 20 vysokapastaŭlenych iranskich kamandziraŭ.
Iranskija ŚMI paviedamlajuć, što zahinuli taksama prynamsi šeść navukoŭcaŭ-jadzierščykaŭ, jakija majuć dačynieńnie da jadziernaj prahramy Irana.
Pad ataku trapiła taksama sistema supraćpavietranaj abarony Irana. Byŭ atakavany aeraport u Tebryzie. Tam mieścicca vajskova-pavietranaja baza.
Izrail udaryŭ pa rakietnych bazach u Kiermanšachie i Charemabadzie.
Paškodžany niekalki budynkaŭ u Tehieranie.
Iran zapuściŭ 100 dronaŭ u adkaz. Izrail paviedamiŭ, što ŭsie iranskija drony byli źbityja za miežami pavietranaj prastory krainy.
Izrail, Iran, Iardanija i Irak časova zakryli svaju pavietranuju prastoru i admianili ŭsie paloty.
Reakcyja ZŠA
Dziaržsakratar Marka Rubia zajaviŭ, što Złučanyja Štaty nie ŭdzielničali va ŭdarach pa Iranie i hałoŭny pryjarytet dla ich — abarona amierykanskich sił u rehijonie. «Ja chaču padkreślić: Iranu nie varta pahražać intaresam ZŠA i amierykanskim vajskoŭcam».
Prezident ZŠA Donald Tramp zaklikaŭ Iran zaklučyć ździełku, pakul nie pozna.
«Ja davaŭ Iranu šaniec za šancam zaklučyć ździełku. Ja papiaredžvaŭ ich u samych jasnych vyrazach «prosta zrabicie heta, — napisaŭ Tramp u svajoj sacsietcy Truth Social. — Ja kazaŭ im, što heta budzie horš, čym usio, z čym jany sutykalisia, čakali abo pra što im kazali, što ZŠA vyrablajuć najlepšyja i samyja mocnyja ŭzbrajeńni na śviecie, NAMNOHA lepšyja, i ŭ Izraila ich šmat — i jany viedajuć, jak imi karystacca».
«Niekatoryja iranskija jastraby havaryli śmiełyja słovy. Ciapier jany ŭsie MIORTVYJA, i budzie jašče horš! Užo šmat śmierciaŭ i razbureńniaŭ, a nastupnyja zapłanavanyja ataki buduć jašče bolš žorstkija, ale ŭsio jašče jość čas, kab spynić hetuju bojniu. Iran musić zaklučyć ździełku, inakš ad jaho ničoha nie zastaniecca, i ŭratavać toje, što niekali było viadoma jak Iranskaja Impieryja. Bolš nijakich śmierciaŭ, nijakich razbureńniaŭ. PROSTA ZRABICIE HETA, PAKUL NIE POZNA. Boža vas usich dabrasłavi!»
Iranskija miedyja paviedamlajuć, što paśla ataki Izraila Iran nie budzie ŭdzielničać u jadziernych pieramovach z ZŠA. Jany pavinny byli prajści ŭ niadzielu 15 červienia ŭ Amanie.
Čamu Izrail nanios udar mienavita ciapier
Jość niekalki pryčyn, čamu kanflikt, jaki daŭno nazirajecca pamiž Izrailem i Iranam, pierajšoŭ u haračuju fazu, piša Bild.
Adna ź ich — iranskaja jadziernaja prahrama stanaviłasia ŭsio bolš niebiaśpiečnaj.
12 červienia MAHATE abvinavaciła Iran u parušeńni abaviazacielstvaŭ pa nieraspaŭsiudžvańni jadziernaj zbroi. Tehieran abviaściŭ ab budaŭnictvie novaha abjekta pa ŭzbahačeńni ŭranu. Pa słovach ekśpiertaŭ, Iran moh by ŭzbroicca jadziernaj zbrojaj na praciahu niekalkich miesiacaŭ. Izrail upeŭnieny, što ŭ muł dastatkova ŭranu dla dzieviaci jadziernych bombaŭ, a iranskija jadzierščyki ŭsio chutčej vyrablali zbrojevyja materyjały. Viałasia i raspracoŭka jadziernych rakiet. Nievypadkova adnoj z metaŭ Izraila stała likvidacyju iranskich fizikaŭ.
Druhaja pryčyna — sajuźniki Irana asłablenyja. Livanskaja «Chiezbała» ŭ vajnie suprać Izraila vosieńniu 2024 hoda straciła amal usich lidaraŭ i bolšuju častku svajho rakietnaha arsienała. «Chiezbała» finansavałasia i kantralavałasia Iranam i, pavodle zadumy muł, pavinna była ŭtrymać Izrail ad dziejańniaŭ suprać iranskaj jadziernaj prahramy. Asłableny i CHAMAS, jaki pakul utrymlivaje častku siektara Haza, ale daŭno znachodzicca ŭ abarončaj pazicyi.
Treciaje — sistema SPA Irana nie moža supraćstajać izrailskim VPS.
Paśla rakietnaj ataki Irana na Izrail letaś Izrail kropkavymi ŭdarami praktyčna całkam vyvieŭ sa stroju ŭsiu iranskuju sistemu SPA. Pakul jana nie adnoŭlenaja, u Izraila jość čas dla vajennych dziejańniaŭ suprać Irana — biez bojazi, što izrailskija samaloty buduć źbityja.
I čaćviortaj pryčynaj nazyvajecca toje, što jadziernyja pieramovy išli drenna. Iran znachodziŭsia ŭ pracesie pieramovaŭ z ZŠA ab novym jadziernym pahadnieńni. Tehieran pavinien byŭ spynić uzbahačeńnie ŭranu, a ŭ abmien na heta Vašynhton prapanoŭvaŭ źniać ekanamičnyja sankcyi. Ale pieramovy išli drenna: prezident ZŠA Donald Tramp niadaŭna zajaviŭ, što ŭsio mienš vieryć u mahčymaść pahadnieńnia ź Iranam.
Kamientary