«My baimsia zastacca na vulicy». Biełaruska ź dziciem nie moža vylecieć z Dubaja paśla admieny rejsa Fly Dubai
«Biełaruskija turysty zastalisia biez vyletu».
Biełaruska razam z synam prylacieła ŭ Dubaj 4 červienia rejsam avijakampanii Fly Dubai, zvarotny bilet u Minsk byŭ aformleny na 14 červienia. Adnak u dzień vyletu rejs byŭ admienieny, i z hetaha momantu pačalisia prablemy ź viartańniem dadomu, piša Onliner.by.
Pavodle słoŭ turystki, pucioŭka była nabyta praź biełaruskaha turahienta, turapieratar — «Russkij ekspriess», bok u Dubai — Al Khalidia. Adrazu paśla admieny rejsa siamji paabiacali praciahnuć pražyvańnie ŭ hateli, ale zamiest piacizorkavaha hatela ich pierasialili ŭ čatyrochzorkavy, i braniravańnie aformili ŭsiaho na adzin dzień. Pošuk novaha varyjanta zaniaŭ šmat času z-za zatrymak u kamunikacyi pamiž turapierataram i hatelem.
— Nam kazali, što ŭ najbližejšy čas nas adpraviać u Minsk. Zatym pačali prapanoŭvać rejsy ŭ Maskvu i Samaru, ale paćvierdzić nivodzin nie ŭdałosia. My ź biełaruskim ahientam prasili razhledzieć lubyja maršruty z mahčymaściu dajechać da Minska samastojna. Adnak u Fly Dubai admovilisia sadžać biełaruskich turystaŭ na rejsy, što vylatajuć u rasijskija harady, — kaža žančyna.
Pa jaje słovach, rasijskich turystaŭ aktyŭna vyvoziać — pracujuć rejsy Fly Dubai u Samaru, Maskvu, Sankt-Pieciarburh, a taksama borty «Aerafłota» i «Pabiedy».
— A biełaruskija turysty zastalisia biez vyletu. Fly Dubai prypyniła paloty ŭ Minsk, a na rejsy ŭ RF biełarusaŭ nie biaruć. Vylet abiacali arhanizavać na 17 červienia, ale dakładnaj infarmacyi niama. Konsulstva kaža: čakajcie. Turapieratar — taksama. My telefanujem kožny dzień, prosim praciahnuć pražyvańnie, šukajem lubyja varyjanty. Na ščaście, nam padoŭžyli pražyvańnie ŭ hateli da 19 červienia i ŭklučyli dvuchrazovaje charčavańnie, za što my ŭdziačnyja ahientu. Ale dalej — nieviadomaść, — raskazała turystka.
Jana taksama padkreśliła: z kožnym dniom zastajecca ŭsio mienš hrošaj, uzmacniajecca strach zastacca biez dachu nad hałavoj.
— Hetu situacyju aśviatlajuć u presie mienavita pra rasijskich turystaŭ i nadajuć joj uvahu, bo ich zatrymałasia kala 5 tysiač čałaviek. Ale biełarusaŭ taksama zatrymałasia vielmi šmat, i nas nie vyvoziać, u adroźnieńnie ad ich.
Bilety da Minska praz «Biełavija» možna nabyć tolki na 22 červienia, i kaštujuć jany ad 4800 rubloŭ.
Nahadajem, admiena rejsaŭ Fly Dubai źviazanaja z abvastreńniem situacyi na Blizkim Uschodzie. Kampanija nie choča vykonvać abloty zony kanfliktu abo dazapraŭki i pakinuła tolki maršruty na Maskvu. Rejsy ŭ Minsk admienieny całkam.
Kamientary