«My pracujem, kab vyzvaleńni stali sistemnymi, a nie sparadyčnymi». Viačorka adkazaŭ Kraŭcovu
«Muža vypuścili, astatnija niachaj pasiadziać!» — tak sakratar Kaardynacyjnaj rady i adzin z kiraŭnikoŭ štaba Viktara Babaryki Ivan Kraŭcoŭ adreahavaŭ na zajavy Cichanoŭskaj i patłumačyŭ, što jaje słovy vyhladajuć dla jaho kryvadušnymi. Franak Viačorka, starejšy daradca Cichanoŭskaj u adkaz raspavioŭ pra pazicyju Ofisa.
«Naša pazicyja pa vyzvaleńni palitviaźniaŭ zastajecca niaźmiennaj. My pavinny praciahvać i stymulavać hety praces, i vykarystoŭvać najaŭnyja instrumienty. Cisk u kambinacyi z dypłamatyčnymi namahańniami — pracujuć. I my zastajomsia ŭ kamunikacyi z amierykanskimi i jeŭrapiejskimi partniorami, kab vyzvaleńni nie byli sparadyčnymi, a stali sistemnymi — i ŭ vyniku na volu vyjšli ŭsie. Vyzvaleńnie palitviaźniaŭ i spynieńnie represij — hety pieršy krok da pačatku nacyjanalnaha dyjałohu», — napisaŭ Viačorka.
Jon raspavioŭ, što kantekst razmovy Śviatłany Cichanoŭskaj z Politico tyčyŭsia vyzvaleńnia Siarhieja — i ci nie pryjšoŭ čas zdymać sankcyi?
I adkaz Śviatłany Cichanoŭskaj, pavodle jaho słoŭ, byŭ vyrazny i jasny — hetaha niedastatkova.
«Pakul represii praciahvajucca, bolš za tysiaču ludziej u turmach — NIELHA spyniać cisku. Viadoma, režym sprabuje pradać vyzvaleńnie Cichanoŭskaha jak libieralizacyju, a łukašenkaŭskija dypłamaty raskazvajuć, što represii ŭžo spynilisia ad sakavika. My z vami viedajem, što heta niapraŭda. Nam treba być pryncypovymi i paśladoŭnymi», — piša Viačorka.
Na jaho mierkavańnie, cisk — heta jakraz toje, što prymušaje režym rabić sastupki.
Akramia taho, važna, kab ludzi, jakich vyzvalajuć, byli adnoŭlenyja ŭ pravach i mieli prava vybaru — zastacca ci vyjechać.
«Inakš — heta nie vyzvaleńnie, a prymusovaja departacyja. Heta pytańnie pryncypovaje, u tym liku dla samich palitviaźniaŭ, jak naprykład Andžej Pačobut. I my pavinny heta ŭličvać», — kaža jon.
Viačorka dadaje, što ŭ nas sapraŭdy, dziakujučy ZŠA, adkryłasia akno mahčymaściaŭ.
«I našaja zadača — kab praces vyzvaleńniaŭ praciahvaŭsia, i jak možna bolš, a ŭ vyniku ŭsie vyjšli na volu», — davodzić jon.
Ciapier čytajuć
Anžaliku Mielnikavu bačyli ŭ Minsku ŭ «Dana Mole»60
Kamientary