Prezident Francyi Emanuel Makron zajaviŭ, što Francyja razam ź Vialikabrytanijaj hatovyja nakiravać va Ukrainu 50 tysiač sałdat i aficeraŭ u jakaści miratvorcaŭ. Pa jaho słovach, hetaja kolkaść utvoryć armiejski korpus, zdolny ŭdzielničać u bujnych bajavych dziejańniach, piša The Moscow Times.
Franka-brytanskija siły, jak miarkujecca, stanuć asnovaj mižnarodnaha kantynhientu, jaki budzie kantralavać vykanańnie pieramirja.
Premjer-ministr Vialikabrytanii Kir Starmier paviedamiŭ, što płan misii hatovy i moža być ažyćcioŭleny litaralna praź niekalki hadzin paśla padpisańnia damovy ab spynieńni ahniu pamiž Ukrainaj i Rasijaj. Jon padkreśliŭ, što hety płan dobra pradumany i raźličany na doŭhaterminovuju pierśpiektyvu. Makron dadaŭ, što 30 krain buduć udzielničać u padtrymcy pieramirja i dapamahać u adnaŭleńni ŭkrainskaha vojska.
Raniej abmiarkoŭvałasia mahčymaść nakiravańnia kala 30 tysiač miratvorcaŭ, jakija pavinny byli być raźmieščanyja ŭ Kijevie, Adesie i Lvovie dla padtrymki USU. Rasija vystupiła suprać prysutnaści vojskaŭ krain NATA va Ukrainie i papiaredziła, što heta zrobić ich bokam kanfliktu.
Emanuel Makron taksama padkreśliŭ, što dla prysutnaści jeŭrapiejskich miratvorcaŭ paśla vajny zusim nie patrabujecca zhoda Rasii, bo Ukraina — suvierennaja dziaržava i sama vyrašaje, kaho zaprašać na svaju terytoryju. Jon adznačyŭ, što pytańnie miratvorčaha kantynhientu budzie častkaj mirnych pieramovaŭ, bo Ukraina nie moža zhadžacca na terytaryjalnyja straty biez harantyj biaśpieki.
Prezident Ukrainy Uładzimir Zialenski raniej vykazvaŭ žadańnie bačyć 100 tysiač miratvorcaŭ na ŭkrainskaj terytoryi dla zabieśpiačeńnia vykanańnia mirnaj damovy. ZŠA padtrymali ideju jeŭrapiejskaha kantynhientu, ale sami svaich vajskoŭcaŭ pasyłać nie buduć.
Ciapier čytajuć
Aryna Sabalenka vyjšła da minčukoŭ u atačeńni vaśmi achoŭnikaŭ VIDEA16
Kamientary