Seks-koŭč biełaruskaha pachodžańnia Aleks Łeśli prylacieŭ u Maskvu i nie byŭ zatrymany, niahledziačy na kryminalnuju spravu
Błohier i seks-koŭč Aleks Łeśli paviedamiŭ pra svajo viartańnie ŭ Maskvu, paviedamlaje «Novaja hazieta. Jeŭropa».
«Usio ok, tolki pradźmuła ŭ samalocie. Na miažy nijakich pytańniaŭ. Ja jedu adpaić siabie harbataj», — napisaŭ jon.
Da hetaha błohier apublikavaŭ bilet na samalot i zajaviŭ, što «ŭsio skončycca tak ža, jak i ŭ 2019». Tady Kiryłava pryhavaryli da ŭmoŭnaha terminu i faktyčnaha źniavoleńnia na dzieviać miesiacaŭ za nielehalny «seks-treninh» u Tajłandzie.
Raniej Łeśli abvinavaciŭ Aleha Dzierypasku ŭ arhanizacyi suprać jaho kryminalnaj spravy ab ŭciahnieńni ŭ prastytucyju ŭ 2018 hodzie i zajaviŭ, što zaraz suprać jaho taksama fabrykujuć spravu, «vybivajučy pryznańni ŭ nievinavatych ludziej».
U kancy červienia suprać «seks-koŭča» zaviali kryminalnuju spravu pa artykule ab padbuchtorvańni da zhvałtavańnia. Pavodle viersii śledstva, mužčyna schilaŭ svaich paśladoŭnikaŭ ździajśniać suprać maskvičak supraćpraŭnyja dziejańni seksualnaha charaktaru i zdymać heta na videa.
Aleks Łeśli — heta psieŭdanim 43-hadovaha viciebčuka Alaksandra Kiryłava. U svoj čas jon skončyŭ Viciebski fizika-matematyčny licej №1, a potym pajechaŭ skarać Rasiju — pastupiŭ na miechmat MDU.
Ale znajšoŭ siabie zusim u inšaj śfiery — staŭ trenieram pa znajomstvach i spakušeńniach. Łeśli vyvučaŭ usio, što znachodziŭ — eryksanaŭski hipnoz, NŁP, amierykanskija i navat savieckija škoły spakušeńnia. A paśla raspracavaŭ ułasnuju mietodyku «łeślizm».
Suśvietnuju viadomaść Aleks Łeśli atrymaŭ razam ź inšaj biełaruskaj — Naściaj Rybkaj (sapraŭdnaje imia Anastasija Vašukievič).
Razam para pravodziła treninhi pa spakušeńni, jakija šmat chto ličyŭ seks-siektaj. U lutym 2018 hoda Naściu Rybku i Aleksa Łeśli zatrymali ŭ Banhkoku za praviadzieńnie nielehalnych sekc-treninhaŭ pad vyhladam urokaŭ pa spakušeńni. Ich abvinavacili ŭ parušeńni tajskaha zakanadaŭstva ab baraćbie z prastytucyjaj.
Łeśli i Rybka sprabavali prasić palityčnaha prytułku ŭ ambasadzie ZŠA ŭ Banhkoku, abiacajučy raspavieści šmat čaho cikavaha. Ale ničoha nie atrymałasia. U 2019 hodzie ich vypuścili z turmy ŭ Tajłandzie i departavali.
Svaje treninhi Łeśli ładzić nie tolki ŭ Rasii, ale i ŭ Jeŭropie. Sioleta jon rekłamavaŭ treninh u Varšavie.
Kamientary