Bankaŭskija insajdary ličać novyja sankcyi suprać čatyroch biełaruskich bankaŭ małaznačnymi. I voś čamu

Raniej banki, zhadanyja ŭ śviežym, 18-m pakiecie, užo traplali pad jeŭrapiejskija abmiežavańni — ich adklučali ad SWIFT. 

SWIFT — heta sistema abmienu bankaŭskimi paviedamleńniami, pa jakoj pieradajecca infarmacyja chto, kamu, za što i kolki pavinien. 

Adklučeńnie ad SWIFT nie zabiła ŭsich źniešnich apieracyj zhadanych bankaŭ, ale zrabiła daražejšym absłuhoŭvańnie niekatorych valutnych płaciažoŭ dla ich samich i, adpaviedna, ich klijentaŭ. Niekatoryja vonkavyja servisy ŭ pryncypie advalilisia, klijenty pierabiehli da inšych bankaŭ.

Ale heta taksama nie stała krytyčnym udaram, tamu što hetyja banki aryjentavanyja na absłuhoŭvańnie klijentaŭ, jakija pravodziać apieracyi ŭnutry Biełarusi, abo ŭnutry hetak zvanaj Sajuznaj dziaržavy Biełarusi i Rasii. 

Ciapier hetyja banki atrymali «poŭnuju zabaronu» na tranzacyi. Što heta aznačaje dla ich? 

Jak kažuć «Našaj Nivie» bankiry, na praktycy hetyja banki nie zmohuć pracavać naŭprost z pasiarednikami z trecich krain, praź jakija raniej išli płaciažy. 

«Raniejšaje adklučeńnie SWIFT nie aznačała aŭtamatyčna, što pracavać nielha. Niekatoryja płaciažy išli, naprykład, praz Hruziju, Kazachstan, Sierbiju, Turcyju i hetak dalej.

Była mahčymaść i naŭprostavych płaciažoŭ pa tych kantraktach, jakija byli — abo jak byccam by «byli» — zaklučanyja da daty ŭviadzieńnia sankcyj. 

Ciapier hetaja mahčymaść adpadaje va ŭsich valutach, tamu što navat tureckija liry ci tenhie — usio roŭna SWIFT, jaki pracuje ź Bielhii. Adpaviedna, usio bačna. I alternatyvy hetamu niama. Ale jany i tak, paśla sankcyj 2021 hoda, nie razhladalisia jak banki dla absłuhoŭvańnia impartnych kantraktaŭ», — zaŭvažaje bankir. 

Aproč SWIFT, u śviecie jość inšyja kvazisistemy abmienu bankaŭskimi danymi, naprykład, kitajskaja CIPS, ale jana tolki dla raźlikaŭ u juaniach, i biełaruskija banki tudy nie biaruć, chacia tyja i vielmi chočuć.

U 2022 hodzie zajaŭlałasia, što praces harmanizacyi pačaŭsia i nieŭzabavie da CIPS budzie padklučany Biełarusbank, a potym i astatnija. Ale hetaha nie zdaryłasia. Kitajcy kułuarna tłumačać, što heta praź niepadrychtavanaść biełaruskaha aparatnaha i ličbavaha kompleksu. Ale realnaść, chutčej, inšaja: kitajcy prosta nie chočuć ryzykavać, supracoŭničajučy ź biełaruskimi bankami tolki dla zručnaści apošnich — vialikaha kamiercyjnaha sensu dla samich kitajcaŭ u hetaj madeli niama.

«Adpaviedna, zhadanyja ŭ pastanovie banki akazalisia adrezanyja ad finansavaha siektara i navat u ramkach JEAES mohuć pracavać tolki z Rasijaj, u jakoj jość svaja ŭnutranaja sistema abmienu bankaŭskaj infarmacyjaj. Navat Kazachstan tut užo nie dapamoža. A značyć, kali niechta pa niejkich pryčynach zachoča pryniać praz hetyja banki valutny płaciež, to ŭ teoryi jamu spatrebicca minimum dva, a toje i try dadatkovyja pasiaredniki, kab schiema vyhladała tak: płacielščyk — pieršy pasiarednik u treciaj krainie — druhi pasiarednik u Rasii — padsankcyjny biełaruski bank», — dadaŭ finansist. 

Ale na praktycy, kažuć nam, hetyja sankcyi małaznačnyja i nie ŭpłyvajuć na pa-sapraŭdnamu važnyja dla režymu śfiery. 

«Naprykład, płaciažy trecich krain za biełaruski kalij iduć praź Biełarusbank. Jak i za inšy — drabniejšy ŭ paraŭnańni z kalijem — impart tavaraŭ dziaržaŭnaj vytvorčaści. 

«Poŭnaj zabarony na supracoŭnictva» ź Biełarusbankam niama. U jaho adkrytyja karespandenckija rachunki ŭ mnohich bankach Jeŭrasajuza i ŭ bankach inšych jeŭrapiejskich krain, jakija ŭ Jeŭrasajuz nie ŭvachodziać.

Kali b i pa kalii ŭ schiemu pryjšłosia ŭvodzić dadatkovych pasiarednikaŭ, heta było b adčuvalna dla dziaržaŭnaj ekanomiki.

Takija kantrakty nie atrymałasia b pierakinuć navat na pryvatnyja biełaruskija banki, bo tady i dla ich traplańnie pad sankcyi było b tolki pytańniem času. Ale hetaha pakul niama, tamu novyja abmiežavańni nie varta ličyć surjoznymi», — reziumavaŭ surazmoŭca «Našaj Nivy». 

• 1
• 0
• 0
• 8
• 1
• 0
• 3
• 0