36-hadovaja ajcišnica vyrašyła kardynalna źmianić žyćcio i pastupiła ŭ miedycynski ŭniviersitet — choča stać ankołaham

Biełaruska Alaksandra Litašenka raspaviała ŭ treds, što amal u 37 hadoŭ stała pieršakurśnicaj lačebnaha fakulteta BDMU. Jana padzialiłasia, što ad śmiełaj idei da paśpiachovaha zaličeńnia va ŭniviersitet prajšło ŭsiaho 9 miesiacaŭ.

Niechta z kamientataraŭ padumaŭ, što žančyna raniej pracavała miedsiastroj, a ciapier vyrašyła atrymać dypłom lekara — što było b łahična. Ale nie, Alaksandra adkazała, što pa pieršaj adukacyi jana markietołah, a ciapier pracuje prahramistkaj. Pry hetym, u instahramie pačała vieści błoh jak nutrycyjołah.

Raniej Alaksandra raspaviadała, što dumki pra pastupleńnie ŭ BDMU ŭ jaje ŭźnikali pieryjadyčna: «Zaŭsiody heta było ŭ farmacie «zanadta składana, zanadta pozna, nieździajśnialna, doŭha, marnavańnie času».

Ale letaś žančyna pačała dumać nad tym, nie čamu žadańnie niemahčymaje, a jak jaho ździejśnić. I tak supała, što litaralna na nastupny dzień u BDMU byŭ Dzień adkrytych dźviarej — Alaksandra vyrašyła schadzić i pacikavicca.

Ščyra pryznajecca, što nie było takoha, kab jana adrazu pranikłasia atmaśfieraj. Ale ž kaža, što na toj momant dla jaje było važnym zrabić choć nievialiki krok u bok mary.

Pastupać vyrašyła na lačebny fakultet — zavočnaha adździaleńnia tam niama, vučycca treba 6 hadoŭ. Zdavać nieabchodna było try CT — viasioły kvest dla čałavieka, jaki skončyŭ škołu ažno 20 hadoŭ tamu.

Alaksandra pačała hladzieć adukacyjnyja roliki ŭ internecie, sprabavała rabić zadańni teściravańniaŭ minułych hadoŭ. Paśla novaha hoda zrazumieła: biez repietytaraŭ pa chimii i bijałohii padrychtavacca naŭrad ci atrymajecca. Znajści nastaŭnikaŭ akazałasia nie vielmi prosta — šmat chto admaŭlaŭsia pracavać z takoj darosłaj abituryjentkaj.

U vyniku abituryjentka zdała ruskuju movu na 89 bałaŭ, chimiju na 80 i bijałohiju na 91.

Alaksandra śmiajecca z taho, što małady chłopiec, jaki padčas pryjomu dakumientaŭ u BDMU praviaraŭ, ci ŭsie nieabchodnyja papierki prynieśli abituryjenty, adreahavaŭ cikava: «Oho! Vaš školny atestat starejšy za mianie!».

Na płatnaje adździaleńnie pastupić atrymałasia. Alaksandra kaža, što pakul u budučyni bačyć siabie ankołaham, ale dapuskaje dumku, što za hady vučoby moža abrać i inšuju śpiecyjalizacyju.

Kamientatary žartujuć, što ŭ Alaksandry jość adzin vialiki bonus. Kali jana skončyć univiersitet, nichto nie budzie stavicca da doktarki niesurjozna (a z hetym davoli časta sutykajucca maładyja śpiecyjalisty) — usie buduć adrazu dumać, što ŭ jaje ŭžo jość salidny pracoŭny dośvied.

• 16
• 1
• 1
• 1
• 1
• 1
• 0
• 0