Artykuł Bild, u jakim dačka Pucina rezka krytykavała baćku, akazaŭsia pamyłkovym. Lizavieta Kryvanohich praciahvaje lotać u Rasiju
3 žniŭnia vydańnie Bild apublikavała artykuł pra niezakonnuju dačku Uładzimira Pucina — Lizavietu Kryvanohich. U publikacyi śćviardžałasia, što ŭ Łuizy Rozavaj (psieŭdanim, jaki vykarystoŭvała Kryvanohich) isnavaŭ niejki zakryty Telegram‑kanał, dzie jana, siarod inšaha, publikavała zajavy z krytykaj svajho baćki. Jana nibyta nazyvała jaho «mužčynam, jaki adabraŭ miljony žyćciaŭ i razburyŭ majo».
Zaraz materyjał Bild vydaleny z sajta vydańnia, piša Insider.
Jak vyśvietliŭ telehram-kanał All Exclusive, fatahrafii «Rozavaj» na samaj spravie — źmienienyja zdymki 22-hadovaj madeli z Sankt-Pieciarburha Darji Aaron, jakija možna znajści ŭ jaje asabistym telehram-kanale z bolš čym dźviuma tysiačami padpisčykaŭ.
Adno ź ich fota zroblena ŭ pieciarburskim restaranie Reborn, dziaŭčyna sama paznačyła łakacyju.
Fatazdymki dla vobraza «Łuizy Rozavaj» byli abrezanyja i adredehavanyja. Ciapier ich aryhinały z Instagram-akkaunta ź nikam «luizaroz__/» źnikli.
Zastałosia tolki paradyjnaje fota «Rozavaj» ź niaŭmieła padfotašoplenym tvaram Pucina i podpisam: «Ja chaču, kab usie viedali, što hety akaŭnt — fejk».
Astatnija ŭ sietcy foty «Rozavaj», naprykład u Telegram-kanale «Bild na ruskaj», majuć krajnie drennuju jakaść. Sama madel nibyta nie patrapiła ŭ fokus kamiery: skura ŭ dziaŭčyny vielmi razmytaja, źnižanyja bliki, drenna detalizavanyja brovy i viejki.
Na zdymku z restarana nižnija vusny dziaŭčyny nibyta «źjechali», nienaturalna pierakryŭšy rabro dałoni. Usio heta vidavočna pakazvaje na vykarystańnie foataredaktara.
Samaja Darja ŭ razmovie z žurnalistkaj All Exclusive admoviłasia ad kamientaroŭ. Adnak niamieckaje vydańnie RTL na hetym tydni apublikavała dopis, dzie madel paćvierdziła: jaje fota byli skradzieny i adredehavanyja. Imia dziaŭčyny ŭ im nie ŭkazvałasia.
Žurnalist-rasśledavalnik Andrej Zacharaŭ źviarnuŭ uvahu na toje, što krynicaj cytat «Rozavaj», pryviedzienych Bild, było videa PR‑mieniedžara Raścisłava Murzahułava. Murzahułaŭ raspaviadaŭ, što nibyta vioŭ pierapisku z Instagram-akaŭntam «luizaroz__/». Nasamreč ad sapraŭdnaha akaŭnta Rozavaj‑Kryvanohich («luizaroz_») jon adroźnivajecca ŭsiaho tolki nižnim padkreślivańniem i słešam u kancy.
Lizavieta Kryvanohich, jak minimum da 2021 hoda, žyła i pracavała ŭ Paryžy ŭ halerei Studio Albatros (nie pierastajučy pry hetym rehularna lotać u Rasiju). Pavodle jaje avijapieralotaŭ, zaraz značnuju častku času jana pravodzić u Rasii.
Ciapier čytajuć
«Abmiarkoŭvajem pytańnie ab vyzvaleńni jašče 1300 źniavolenych». Tramp raskazaŭ, pra što havaryŭ z Łukašenkam24
Kamientary