Žyhar pra sadysta Šynvize: Jon pryjechaŭ u Hiermaniju pa adnarazovaj vizie i ŭžo atrymaŭ hramadzianstva

— Hety hramadzianin Respubliki Biełaruś prachodziŭ słužbu ŭ departamiencie vykanańnia pakarańniaŭ, i Šynvize byŭ nie prosta niejkim šarahovym supracoŭnikam, jon byŭ namieśnikam načalnika kałonii.

Pa toj infarmacyi, jakuju maje Belpol, jon byŭ datyčny da niehumannaha abychodžańnia sa źniavolenymi, u tym liku z palitviaźniami, ažyćciaŭlaŭ padčas svajoj słužby represii ŭ dačynieńni da hramadzian, mienavita asudžanych pa palityčna matyvavanych kryminalnych spravach. Nie tak daŭno jon repatryjavaŭsia pa linii svajho baćki i pierajechaŭ u Hiermaniju.

Ciapier Belpol znachodzicca ŭ kantakcie z usimi demakratyčnymi instytutami, jakija pracujuć pa hetym napramku. Z našaha boku byŭ nakiravany zapyt u niamieckuju prakuraturu. My taksama ŭžo razmaŭlali z našymi niamieckimi partniorami pa hetym pytańni. Taksama budziem jašče siońnia mieć znosiny z našymi partniorami ŭ inšych dziaržavach, jakija taksama zacikaŭlenyja ŭ tym, kab Šynvize byŭ pryciahnuty da ŭstanoŭlenaj zakonam adkaznaści.

Tak, jon atrymaŭ hramadzianstva Hiermanii. Jak jon trapiŭ na terytoryju Jeŭrapiejskaha sajuza, nam taksama viadoma. Heta była, umoŭna kažučy, adnarazovaja viza, pa jakoj jon prosta pryjechaŭ u Hiermaniju, i tam užo niepasredna ŭ palicyi atrymaŭ pašpart hramadzianina Hiermanii.

My adpravili zapyt u Ministerstva zamiežnych spraŭ nakont hetaj spravy. Dla nas vielmi važna, kab było ŭźniataje pytańnie voś ab čym: kali jon zapaŭniaŭ ankiety pry repatryjacyi, ci pakazvaŭ jon hetuju častku svajoj bijahrafii. Tamu što kali jon nie pakazvaŭ hetaha, kali jon, skažam tak, padmanuŭ Hiermaniju, tady heta moža razhladacca ŭ tym liku jak uchileńnie ad pakarańnia na terytoryi Hiermanii, pavodle ich zakonaŭ.

My taksama starajemsia padklučać usich našych partnioraŭ ź niamieckaj palityčnaj śfiery dla taho, kab jany taksama nakiroŭvali zapyty pa parłamienckaj linii ŭ prakuraturu Hiermanii. Heta treba dla taho, kab jana dała kankretny adkaz pa tym, jak jon naohuł zapaŭniaŭ hetyja dakumienty. Bo adnosna jaho moža dziejničać mižnarodnaja jurysdykcyja, heta značyć univiersalnaja. My chočam viedać, ci razhladajuć jany takoje pytańnie znoŭ-taki ŭ adpaviednaści z kanviencyjaj AAN, i ŭsio inšaje.

Hetaja praca dastatkova niaprostaja, tamu što heta taki pieršy realny vypadak. Mahčyma, pieršy i apošni. Tamu tut vielmi važna adpracavać heta maksimalna, z maksimalnym efiektam dla nas.

— Ja viedaju, što ŭ sankcyjnych śpisach byŭ načalnik turmy na Akreścina, jahonyja namieśniki, a voś ci byli tam kiraŭniki asnoŭnych kałonij, dzie hinuli palityčnyja źniavolenyja? Jak šmat ludziej uvohule, jakija ŭ hetaj sistemie pracujuć, znachodziacca ŭ sankcyjnych śpisach?

— Na žal, zaraz situacyja takaja, što ich nie tak šmat, jak nam chaciełasia b. Tamu što pytańni pravoŭ čałavieka ŭ kantekście vajny va Ukrainie zaraz adychodziać na druhi płan. Kali my majem znosiny z našymi partniorami, łabirujem tyja ci inšyja sankcyjnyja kiejsy, to staŭka robicca ŭ asnoŭnym na ŭdzieł tych ci inšych fizičnych asob abo jurydyčnych asob u vajnie suprać Ukrainy. I kali zastajucca volnyja miescy, naprykład, dla ŭklučeńnia tych ci inšych ludziej u sankcyjnyja śpisy, ludziej, jakija parušajuć pravy čałavieka ŭ Biełarusi, viadoma ž, heta robicca.

Ale, paŭtarusia, jak praviła, staŭka robicca mienavita na ŭdzieł tych ci inšych ludziej, tych ci inšych fizičnych, jurydyčnych asob u vajnie suprać Ukrainy. Heta prablema, tamu što, aproč usiaho inšaha, biezumoŭna, isnujuć łabisty režymu, jakija maksimalna imknucca pieraškadžać uviadzieńniu tych ci inšych sankcyj, łabirujuć, kab uvohule sankcyi ŭ pryncypie nie prymalisia. I nam davodzicca, aproč biurakratyčnych momantaŭ, jakija majucca ŭ Jeŭropie, pieraadolvać i takoje supraciŭleńnie. Ale my jaho ŭsio jašče pieraadolvajem, i heta dobra.

— A ci jość u biełaruskich pravaabaroncaŭ, usich tych arhanizacyj, jakija zajmajucca situacyjaj z palitviaźniami, niejki šyroki śpis ludziej, jakija pracujuć u hetaj sistemie?

— Nasamreč jaho, napeŭna, niama. Jon, u pryncypie, jość u Belpol, bo ŭ Belpol jość u rasparadžeńni ŭsie bazy danych, i my viedajem, chto, jaki čałaviek, u jaki čas i dzie prachodziŭ słužbu ŭ tych ci inšych orhanach unutranych spraŭ abo Departamientu vykanańnia pakarańniaŭ. Heta jość, i tamu, kali da nas źviartajucca tyja ž samyja pravaabaroncy, žurnalisty, my možam hetuju infarmacyju vieryfikavać, paćvierdzić, što heta tak, ci, naprykład, abvierhnuć, skazać, što situacyja absalutna inšaja.

Taksamaja situacyja adbyłasia i z vydańniem «Naša Niva»: kali jany źviarnulisia z pytańniem [pra Šynvize], my pačali jaho sumiesna razhladać, i ŭ kančatkovym vyniku vyjšli na taki artykuł, jaki pakazvaje, što nie šarahovy karnik, a čałaviek, jaki sapraŭdy ŭdzielničaŭ u palityčna matyvavanych represijach u dačynieńni da asob, jakija byli asudžanyja i znachodzilisia ŭ papraŭčaj kałonii № 2, ciapier znachodzicca ŭ Hiermanii. I heta było dla nas, viadoma, vielmi niepryjemnym zvanočkam, bo my vielmi časta čujem vyrazy ab tym, što biełarusam nie chapaje viz.

I vypadak Šynvize — heta tolki publičny kiejs. Jość jašče niekalki padobnych vypadkaŭ litaralna za apošnija niekalki tydniaŭ. Jany nasamreč krychu inšyja, ale ŭsio roŭna my havorym pra byłych ci ciapierašnich pradstaŭnikoŭ pravaachoŭnych orhanaŭ, jakija znachodziacca na terytoryi Jeŭrapiejskaha sajuza. Moža, nie takich, kaniečnie, vysokapastaŭlenych, ale ŭsio ž. I ŭźnikaje pytańnie: dyk u nas jość prablemy ź vizami ci nie? Tamu što takija ludzi traplajuć na terytoryju Jeŭrasajuza dastatkova biesprablemna.

Znoŭ paŭstaje pytańnie vieryfikacyi, tamu što kali my nie vieryfikujem biełarusaŭ, jakija pryjazdžajuć, heta pahražaje jak našaj biaśpiecy, tak i biaśpiecy dziaržaŭ, kudy jany pryjazdžajuć. I hetaje pytańnie my imkniemsia padnimać usiudy i maksimalna sprabujem łabiravać stvareńnie niejkaha vieryfikacyjnaha centra, albo zacikaŭlivać dziaržavy Jeŭrapiejskaha sajuza, kab jany źviartalisia nakont vieryfikacyi. Nie abaviazkova da nas. Heta možna rabić, naprykład, praz Abjadnany pierachodny kabiniet, praz Narodnuju ambasadu, praz pradstaŭnictva demakratyčnych sił u tych ci inšych krainach. Ale hałoŭnaje, kab heta było. Nam hałoŭnaje, kab adbyvałasia hetaja vieryfikacyja, tamu što situacyja sapraŭdy dastatkova składanaja.

• 0
• 0
• 0
• 0
• 0
• 0
• 0
• 0