Jak prezident Finlandyi z dapamohaj hulni ŭ holf prymusiŭ Trampa vysłuchać jaho nakont Rasii
Vydatnaja hulnia Stuba zrabiła jaho dla Trampa pryjemnym surazmoŭcam, a dla jeŭrapiejskich stalic — kaštoŭnym niefarmalnym kanałam suviazi z amierykanskim lidaram pierad jaho sustrečaj z Uładzimiram Pucinym na Alascy.
Jak piša The Wall Street Journal, prezident Finlandyi Alaksandr Stub zvyčajna ŭstaje a piataj ranicy — kab patreniravacca ŭ tryjatłonie, schadzić u saunu i, ź niadaŭniaha času, patelefanavać Donaldu Trampu. Ich ranišnija razmovy stali amal zvykłymi, a kantakt rehularnym: listy, paviedamleńni i zvanki ŭ luby čas sutak.
Holf jak dypłamatyčny kanał
Niahledziačy na adroźnieńni — Stub prychilnik NATA, svabodna vałodaje piaćciu movami i adkryta papiaredžvaje pra pahrozu z boku Rasii, a Tramp viadomy svaim skiepsisam da jeŭrapiejskich sajuzaŭ — ich abjadnaŭ holf.
Ich znajomstva pačałosia piać miesiacaŭ tamu na poli ŭ Uest-Pałm-Bič. Vydatnaja hulnia Stuba zrabiła jaho dla Trampa pryjemnym surazmoŭcam, a dla jeŭrapiejskich stalic — kaštoŭnym niefarmalnym kanałam suviazi z amierykanskim lidaram pierad jaho sustrečaj z Uładzimiram Pucinym u Ankarydžy na Alascy.
Stub staŭ pasrednikam pamiž Trampam i jeŭrapiejskimi lidarami, u tym liku z Uładzimiram Zialenskim. Časam jamu davodzicca pravodzić razmovy paśladoŭna z Trampam, a potym z prezidentam Ukrainy Uładzimiram Zialenskim, kab adrazu pieradać pazicyju i infarmacyju ad adnaho da druhoha.
«Ludzi viedajuć, što ŭ nas, finaŭ, niama schavanych namieraŭ, i my taksama davoli pramyja. Ja mahu danieści da Trampa toje, što dumajuć jeŭrapiejcy ci Zialenski, a potym ja mahu danieści da svaich jeŭrapiejskich kaleh toje, što dumaje Tramp», — adznačaŭ Stub u intervju The Wall Street Journal 31 lipienia.
Finlandyja pamiž Uschodam i Zachadam
Padčas chałodnaj vajny niejtralnaja Finlandyja, jakaja maje kala 1272 km miažy z Rasijaj, časta vystupała mastom pamiž Vašynhtonam i Maskvoj. Siońnia jana — člen NATA, ale jaje kiraŭniki zachavali vopyt i kanały kamunikacyi z abodvuma bakami.
Stub maje vialiki dośvied pieramoŭ z Rasijaj i dobra znajomy z ZŠA — jašče ŭ 1980-ch jon vučyŭsia ŭ Furmanaŭskim ŭniviersitecie u Paŭdniovaj Karalinie pa stypiendyi, jakuju atrymaŭ dziakujučy svajmu vysokamu ŭzroŭniu hulni ŭ holf.
Jon vystupaŭ za kamandu ŭniviersiteta na spabornictvach, a ŭzamien mieŭ finansavuju padtrymku na vučobu. Žartujučy, jon časta kaža amierykancam z mocnym paŭdniovym akcentam: «Fin pa naradžeńni, paŭdniovy amierykaniec pa Božaj łascy».
Apošnija miesiacy Tramp rezka ŭzmacniŭ krytyku Pucina i pačaŭ publična padtrymlivać ideju ŭzmacnieńnia dapamohi Ukrainie, u tym liku praz prodaž zbroi Jeŭropie. Ci adyhraŭ u hetym rolu Stub, aficyjna jon nie pryznaje, ale jeŭrapiejskija čynoŭniki adznačajuć, što heta vidavočny zruch u paraŭnańni ź jaho raniejšaj pazicyjaj.
«Stub staŭ svojeasablivym kanałam suviazi, mastom pamiž Jeŭropaj i Trampam», — adznačaje sienatar ad respublikancaŭ Lindsi Hrem, dadajučy, što časta razmaŭlaje sa Stubam dvojčy na dzień. «Skažu tak: Aleks, napeŭna, najbolš aktyŭny štodnia — pierapisvajecca sa mnoj, dzielicca infarmacyjaj pra padziei, daje parady».
Šlach da prezidenta
Stub vyras u pryharadzie Chielsinki Lechtysaary. Jaho baćka pracavaŭ hałoŭnym pradstaŭnikom Nacyjanalnaj chakiejnaj lihi ŭ Jeŭropie, jaki šukaŭ talenavitych chakieistaŭ dla amierykanskich i kanadskich kłubaŭ. U 13 hadoŭ Alaksandr razam z chakiejnaj kamandaj, u składzie jakoj jon hulaŭ, upieršyniu naviedaŭ Ńju-Jork, što pakłała pačatak jaho pažyćciovaj cikavaści da ZŠA i amierykanskaj palityki.
Chłopiec pravioŭ niekalki svaich letnich kanikuł u ZŠA i Kanadzie, a taksama hod pa abmienie ŭ Dejtan-Bič (Fłaryda, ZŠA), kab mieć mahčymaść zajmacca holfam uvieś hod.
Majučy namier stać prafiesijnym hulcom u holf, pastupiŭ u Furmanski ŭniviersitet u Hrynvile (štat Paŭdniovaja Karalina), dzie paralelna z treniroŭkami pahłybiŭsia ŭ vyvučeńnie amierykanskaj palityki i mižnarodnych adnosin.
Papracavaŭšy ŭ Brusieli ŭ Jeŭrakamisii, Stub u 2004 hodzie ŭvajšoŭ u vialikuju palityku jak deputat Jeŭraparłamienta. Budučy centrysckim kansiervataram i aktyŭnym prychilnikam ustupleńnia Finlandyi ŭ NATA, jon chutka prasunuŭsia pa karjernaj leśvicy, viarnuŭsia ŭ Chielsinki, dzie zaniaŭ pasadu ministra zamiežnych spraŭ, a paźniej — premjer-ministra.
Dla Stuba, jak i dla mnohich finaŭ, pahroza z boku Rasii maje hłyboka asabisty aśpiekt. I jaho dzied, i baćka naradzilisia ŭ haradach, jakija Finlandyja była vymušana pieradać Savieckamu Sajuzu ŭ 1940 hodzie i jakija siońnia źjaŭlajucca častkaj Rasii.
U 2017 hodzie jon pakinuŭ palityku, kab zaniacca finansami i navukovaj dziejnaściu, častkova z-za svajho rasčaravańnia ŭ tryvałaj hramadskaj apazicyi ŭ Finlandyi adnosna ŭstupleńnia ŭ NATA.
Praź siem hadoŭ rasijskaje ŭvarvańnie va Ukrainu padšturchnuła Finlandyju dałučycca da aljansu i viarnuła Stuba ŭ vialikuju palityku. Padčas prezidenckaj kampanii jon adstojvaŭ nieabchodnaść pavieličeńnia vydatkaŭ na biaśpieku i ŭmacavańnie suviaziaŭ z ZŠA.
Jaho ŭpeŭnieny i adkryty styl rezka vydzialaŭsia na fonie tradycyjna strymanaj finskaj palityki. Apanienty abvinavačvali jaho ŭ fanaberystaści, paprakali za źjaŭleńnie na sustrečach u šortach i łajanku padčas dypłamatyčnych sustreč.
Hulnia ŭ holf z Trampam
Praź niekalki miesiacaŭ paśla ŭstupleńnia na pasadu prezidenta ŭ minułym hodzie Stub paznajomiŭsia ź sienataram ZŠA Lindsi Hremam, jaki naviedvaŭ Chielsinki. Ich zblizili suviazi z Paŭdniovaj Karalinaj, zachapleńnie holfam i imknieńnie skaardynavać palityku ZŠA i Jeŭropy ŭ dačynieńni da Rasii.
Kali jany sustrelisia ŭ lutym na kanfierencyi pa biaśpiecy ŭ Miunchienie, Hrem prapanavaŭ patelefanavać Trampu.
«Aleks kaliści hulaŭ u holf u Furmanskim univiersitecie», — skazaŭ jon Trampu, a toj u adkaz prapanavaŭ jamu i Stubu kali-niebudź zhulać razam.
Stub, jaki nie braŭ kluški ŭ ruki ŭžo šmat hadoŭ, pačaŭ treniravacca na krytym poli dla holfa, kab adnavić formu. Praź niekalki tydniaŭ jon u apošni momant zabraniravaŭ bilet na rejs u Majami i dałučyŭsia da Trampa na śniadanku ŭ jaho holf-kłubie ŭ Uest-Pałm-Bič razam z Hremam.
Pavodle słoŭ inšych prysutnych, hulnia Stuba ŭ holf uraziła Trampa. Pamiž udarami jany abmiarkoŭvali ŭsio: ad studenckich hadoŭ Stuba ŭ ZŠA da ledakołaŭ, lasnoj haspadarki i dośviedu Finlandyi ŭ baraćbie z Rasijaj padčas Druhoj suśvietnaj vajny.
Padčas abiedu Tramp zapytaŭ, ci možna daviarać Pucinu. «Nielha», — adkazaŭ Stub, patłumačyŭšy, što rasijski lidar razumieje tolki movu siły, i zaklikaŭ da bolš žorstkich sankcyj i ŭstanaŭleńnia ćviordaha terminu spynieńnia ahniu.
Tramp padaryŭ jamu novy kamplekt klušak zamiest staroha 20-hadovaha, ź jakim toj pryjechaŭ. A na zdymku, vykładzienym u Truth Social, abodva paziravali z šyrokimi ŭśmieškami, trymajučy adnolkavyja kubki, jakija zavajavali na turniry pamiž členami kłuba i haściami.
«Jon vielmi dobry hulec», — napisaŭ Tramp. Stub dypłamatyčna dadaŭ, što hulnia Trampa ŭ holf «značna lepšaja, čym mnohija dumajuć».
Dalejšyja kantakty i ŭpłyŭ
Nie mienš vynikovym akazałasia i łabiravańnie Stuba. Praź niekalki hadzin paśla ich pieramohi na turniry Tramp upieršyniu rezka raskrytykavaŭ Pucina za zaciahvańnie vajny va Ukrainie, zajaviŭšy ŭ televizijnym intervju, što jon «razzłavany» i «vielmi aburany» admovaj rasijskaha lidara ad pieramirja.
Pakidajučy Mar-a-Łaha, Stub pa darozie ŭ aeraport patelefanavaŭ inšym jeŭrapiejskim lidaram, a potym palacieŭ u Łondan na sustreču z premjer-ministram Vialikabrytanii Kiram Starmieram. Paźniej jon prainfarmavaŭ Zialenskaha, adznačyŭšy, što ciarpieńnie Trampa ŭ adnosinach da Pucina, zdajecca, na zychodzie.
Paśla hetaha Tramp i Stub pačali rehularna pierapisvacca i telefanavać adzin adnamu pa-za miežami aficyjnych sustreč. Časam jany abmiarkoŭvali vyniki holf-turniraŭ, a časam Tramp źviartaŭsia da Stuba pierad razmovaj z Pucinym.
«Vy razumiejecie, što ja sprabuju zrabić?» — spytaŭ jon u krasaviku, kali jaho novyja maštabnyja mytnyja taryfy skałanuli suśvietnyja rynki.
«Kali Amieryka na pieršym miescy, zrabi tak, kab Finlandyja była na druhim», — adkazaŭ Stub.
Stub kaža, što ŭ asabistych znosinach Tramp akazaŭsia inšym, čym vyhladaje publična: jon «umieje słuchać» i zdolny vieści «vielmi ščyryja razmovy». Ich kantakty stali nastolki častymi, što finskija dypłamaty ŭ Vašynhtonie žartujuć: zamiest taho kab paviedamlać u Chielsinki pra padziei ŭ stalicy ZŠA, jany sami daviedvajucca pra heta ad prezidenta.
Jeŭrapiejskija čynoŭniki adznačajuć, što Tramp lepš usprymaje pazicyju Jeŭropy, kali čuje jaje ad kiraŭnika nievialikaj krainy. Jon zachaplajecca finskimi ŭzbrojenymi siłami i, pavodle ich słoŭ, pavažaje šmathadovy dośvied Stuba ŭ adnosinach z Maskvoj.
Pa słovach ukrainskich čynoŭnikaŭ, Stub staŭ nieacennym pasrednikam dla Zialenskaha, asabliva paśla napružanaj sustrečy ŭ Avalnaj zale z Trampam. U lipieni ŭkrainski prezident publična padziakavaŭ jamu za «dapamohu ŭ naładžvańni kantaktu» z amierykanskim prezidentam u krytyčny momant.
Sam Stub pryznajecca, što nikoli nie čakaŭ takoj roli, kali ŭpieršyniu pryjechaŭ u ZŠA z marami stać prafiesijnym halfistam. Jon uspaminaje, jak baćka kazaŭ jamu, što ŭmieńnie hulać u holf moža niekali spatrebicca, navat kali jon tak i nie stanie prafiesijanałam.
«Ja dumaŭ, što heta jaho sposab namiaknuć, što ja nikoli nie dasiahnu dastatkovaha ŭzroŭniu, — raskazaje Stub. — Ale paśla partyi z Trampam jon dasłaŭ mnie paviedamleńnie: «Ja ž kazaŭ».
Prezidentam Finlandyi staŭ Alaksandr Stub. Jaho baćka — švied, a žonka — brytanka
Pakul Vens psuje adnosiny ŭ Danijaj, Tramp naładžvaje ź Finlandyjaj
Jak Tramp vykarystoŭvaje «teoryju varjata», kab mianiać śviet pad siabie. I ŭ jaho atrymlivajecca
Jeŭropa zmahła zachavać adzinstva z Trampam na vypadak napadu Rasii
Prezident Finlandyi inkohnita ŭziaŭ udzieł u tryjatłonie i finišavaŭ druhim
Ciapier čytajuć
«Abmiarkoŭvajem pytańnie ab vyzvaleńni jašče 1300 źniavolenych». Tramp raskazaŭ, pra što havaryŭ z Łukašenkam22
Kamientary