Alpinistka z Rasii ŭžo tydzień znachodzicca na vyšyni 7000 mietraŭ: vyratavać jaje nie mohuć, ježa ŭ jaje skončyłasia
47-hadovaja Natalla Nahavicyna, rasijskaja alpinistka, trapiła ŭ dramatyčnuju situacyju: padčas spusku z najvyšejšaj kropki Ciań-Šania ŭ Kyrhyzstanie 12 žniŭnia jana atrymała pierałom padčas spusku. Heta zdaryłasia na vyšyni kala 7000 mietraŭ. Nadvorje pakul nie dazvalaje joj dapamahčy. U hetych ža harach čatyry hady tamu pamior jaje muž.
47-hadovaja Natalla Nahavicyna 12 žniŭnia atrymała pierałom padčas spusku ź Piku Pieramohi na vyšyni kala 7000 mietraŭ.
Na nastupny dzień da Natalli padnialisia italjaniec Łuka i niemiec, jakija prynieśli spalny miašok, ježu i harełku, zanačavali ź joj, a potym spuścilisia nazad u łahier pa padmohu.
Adnak nastupnaja sproba padjomu skončyłasia trahiedyjaj: italjaniec zahinuŭ ad abmaražeńniaŭ i acioku mozhu.
U hety ž dzień vyratavalny viertalot nie zmoh evakuiravać Natallu z-za składanych umovaŭ nadvorja i ździejśniŭ žorstkuju pasadku. Z 10 čałaviek paciarpieli dvoje, astatnija pačali evakuacyju Ramana, spadarožnika Natalli, jaki staŭ spuskacca pa dapamohu, i niamieckaha alpinista.
Na hety momant viadoma, što Natalla znachodzicca ŭ razarvanym vietram namiocie, ukrytaja ŭ spalnym miašku. Pavodle kadraŭ ź bieśpiłotnika, jana žyvaja, ale zastałasia bieź ježy.
Zaraz umovy nadvorja robiać evakuacyju niemahčymaju.
Čatyry hady tamu ŭ hetych ža harach zahinuŭ muž Natalli — Siarhiej Nahavicyn, jaki pamior ad insultu na vyšyni 6900 mietraŭ. Tady Natalla nie pakinuła jaho i praviała pobač usiu noč, čakajučy evakuacyi.
Paźniej jana znoŭ padniałasia na pik Chan-Tenhry i ŭstanaviła tam pamiatnuju šyldu. Ab hetaj historyi režysior Dźmitryj Sinicyn źniaŭ dakumientalny film «Zastacca z Chan-Tenhry».
Z pačatku žniŭnia ŭ harach Kyrhyzstana zahinuli troje zamiežnikaŭ, jašče niekalki čałaviek atrymali ciažkija traŭmy.
Kamientary