Tatuiroŭki bjuć pa imunitecie i pryvodziać da chraničnaha zapaleńnia ŭ limfatyčnaj sistemie — novaje daśledavańnie

Siońnia kožny piaty čałaviek u śviecie maje na ciele malunak, i hetaja tendencyja tolki raście. Doŭhi čas dla navukoŭcaŭ zastavałasia zahadkaj: jak mienavita tatuiroŭki vyžyvajuć pad skuraj, kali imunnaja sistema pavinna ŭvieś čas sprabavać źniščyć čužarodnyja cieły? Adkaz na hetaje pytańnie pryvioŭ da tryvožnych vysnoŭ.

Jak piša Spektrum.de, kamanda šviejcarskich navukoŭcaŭ pad kiraŭnictvam imunołaha Santjaha Hansalesa pieršapačatkova nie płanavała vyvučać škodu tatuirovak.

«My prosta šukali najmienš balučy sposab paznačyć našych łabaratornych myšej, kali niechta prapanavaŭ zrabić im tatuiroŭku, — raskazvaje Hansales. — My pasprabavali i zrabili pieršaje nazirańnie, jakoje i zapuściła ŭsio daśledavańnie».

Jak tatuiroŭki ŭpłyvajuć na imunitet

Navukoŭcy zaŭvažyli, što ŭžo praź niekalki hadzin paśla pracedury čarniła nazapašvałasia ŭ limfatyčnych vuzłach i pravakavała zapalenčuju reakcyju. Pakolki śpiecyjalizacyja kamandy — mienavita zapalenčyja reakcyi, jany vyrašyli vyvučyć hety praces hłybiej.

Daśledčyki vyjavili, što pihmienty nie zastajucca na miescy. Traplajučy ŭ limfavuzły, jany pahłynajucca makrafahami («kletkami-pažyralnikami»). Adnak, u adroźnieńnie ad bakteryj, ćviordyja čaścinki farby niemahčyma pieravaryć.

Heta zapuskaje niebiaśpiečny cykł. Makrafahi raspaznajuć čarniła jak pahrozu i sprabujuć źniščyć jaho, vyklikajučy zapaleńnie. Nie zdoleŭšy rasščapić malekuły pihmientu, kletki vysilvajucca i hinuć. Čarniła vyzvalajecca, i novyja makrafahi znoŭ sprabujuć jaho atakavać.

Asabliva ahresiŭnymi akazalisia čyrvonyja i čornyja farby, jakija najbolš aktyŭna spryjajuć razbureńniu kletak. Ale, jak vyśvietliłasia, hałoŭnaja prablema palahaje nie stolki ŭ vastryni pieršasnaj reakcyi, kolki ŭ jaje praciahłaści.

«Charakterna, što zapalenčy praces zachoŭvajecca praciahły čas. My nazirali vidavočnyja prykmiety zapaleńnia ŭ limfatyčnych vuzłach myšej navat praz dva miesiacy paśla naniasieńnia tatuiroŭki», — adznačajuć aŭtary. Dla čałavieka heta moža aznačać hady chraničnaha stresu dla imunitetu.

Jak tatuiroŭki ŭpłyvajuć na efiektyŭnaść vakcyn

Hrupa Hansalesa taksama pravieryła, jak tatuiroŭki ŭpłyvajuć na efiektyŭnaść pryščepak, što stała asabliva aktualnym pytańniem paśla pandemii.

Vyniki pakazali, što najaŭnaść tatuirovak moža źnižać efiektyŭnaść mRNK-vakcyn (naprykład, suprać COVID-19). U tatuiravanych myšej paśla vakcynacyi vypracoŭvałasia mienš antyciełaŭ. Navukoŭcy źviazvajuć heta z tym, što zaniatyja baraćboj z čarniłam kletki horš sintezujuć spajk-białok karanavirusa. Hety białok pakryvaje pavierchniu virusa padobna kalučkam i słužyć «mišeńniu» dla navučańnia imunnaj sistemy. Kali spajk-białku vypracoŭvajecca mała, arhanizm farmuje słabiejšuju abaronu.

Adnak ź inaktyvavanaj vakcynaj ad hrypu adbyłosia advarotnaje: pihmienty, imavierna, uzmacnili imunnuju reakcyju. Čamu tak adbyvajecca, pakul dakładna nieviadoma, ale, mahčyma, zapaleńnie prymušaje imunitet pracavać u bolš aktyŭnym režymie.

Aŭtary artykuła ŭ navukovym časopisie PNAS padkreślivajuć, što na hety momant heta samaje poŭnaje daśledavańnie ŭpłyvu tatu-čarniłaŭ na imunitet. Jany źviartajuć uvahu na važnuju prablemu: rehulavańnie vytvorčaści farbaŭ dla tatuirovak značna mienš strohaje, čym patrabavańni da farmaceŭtyčnaj pradukcyi, choć čarniła ŭvodzicca niepasredna ŭ arhanizm.

Choć pakul niezrazumieła, nakolki dakładna vyniki, atrymanyja na myšach, možna pieranieści na ludziej, navukoŭcy ŭpeŭnienyja: hramadskaść pavinna viedać pra patencyjnyja ryzyki. Tatuiroŭka moža stać pryčynaj taho, što imunnaja sistema pierastanie pracavać efiektyŭna, bo budzie ŭ stanie pastajannaj baraćby z farbaj unutry ŭłasnaha arhanizma.

• 7
• 0
• 1
• 0
• 4
• 1
• 0
• 0