U Minsku za «zdradu dziaržavie» na 9 hadoŭ asudzili 60-hadovaha prahramista
U Minskim abłasnym sudzie za «zdradu dziaržavie» (č. 1 art. 356 Kryminalnaha kodeksa) asudzili 60-hadovaha prahramista Dźmitryja Baśko. Jamu pryznačyli dzieviać hadoŭ kałonii va ŭmovach uzmocnienaha režymu, štraf u pamiery 500 bazavych vieličyniaŭ (21 tysiača biełaruskich rubloŭ), a taksama pazbavili vajskovaha zvańnia «lejtenant u adstaŭcy». Prysud byŭ vyniesieny 15 traŭnia hetaha hoda, ale pra jaho pravaabaroncam stała viadoma tolki ciapier, piša «Viasna».
Viadoma, što Dźmitryj Baśko da zatrymańnia žyŭ u Minsku, pracavaŭ prahramistam. Taksama jon pieryjadyčna vykładaŭ prahramavańnie ŭ BDU na fakultecie prykładnoj matematyki i infarmatyki.
Pierad samym svaim zatrymańniem Dźmitryj nidzie nie pracavaŭ, bo dla ŭniviersiteta jon staŭ «niadobranadziejnym», a mnohija IT-kampanii pajšli ź Biełarusi, tamu jamu ź jaho vysokaj kvalifikacyjaj pracy nie było. Vyjazdžać ź Biełarusi jon nie chacieŭ, tamu što na toj momant dahladaŭ pažyłuju maci. Padčas śledstva nad Dźmitryjem jaje nie stała.
Mužčynu zatrymali 9 studzienia 2024 hoda i źmiaścili ŭ SIZA KDB, dzie jaho hod utrymlivali ŭ žorstkich umovach. Paśla jaho pieraviali ŭ SIZA-1 u Kaladzičach.
Spravu ŭ zakrytym režymie razhladaŭ Siarhiej Vasileŭski. Dźmitryja Baśko abvinavacili pavodle č. 1 art. 356 Kryminalnaha kodeksa — «vydača zamiežnaj dziaržavie, mižnarodnaj abo zamiežnaj arhanizacyi abo ich pradstaŭnikam dziaržaŭnych sakretaŭ Respubliki Biełaruś, a taksama źviestak, jakija składajuć dziaržaŭnyja sakrety zamiežnych dziaržaŭ, mižnarodnych arhanizacyj, miždziaržaŭnych utvareńniaŭ, pieradadzienych Respublicy Biełaruś na padstavie mižnarodnych dahavoraŭ Respubliki Biełaruś abo ŭ suviazi ź jaje ŭdziełam u hetych mižnarodnych arhanizacyjach, miždziaržaŭnych utvareńniach, albo špijanaž, albo pierachod na bok voraha padčas vajny abo ŭzbrojenaha kanfliktu, albo inšaje akazańnie dapamohi zamiežnaj dziaržavie, mižnarodnaj abo zamiežnaj arhanizacyi abo ich pradstaŭnikam u praviadzieńni dziejnaści, nakiravanaj na pryčynieńnie škody nacyjanalnaj biaśpiecy Respubliki Biełaruś, naŭmysna ździejśnienyja hramadzianinam Respubliki Biełaruś (zdrada dziaržavie)».
Sutnaść abvinavačvańnia i pazicyja Dźmitryja pa spravie pravaabaroncam nieviadomyja.
Mužčyna abskardžvaŭ prysud, ale Viarchoŭny sud pakinuŭ jaho bieź źmienaŭ. Prysud ustupiŭ u siłu 22 červienia hetaha hoda. Adbyvać termin Dźmitryja adpravili ŭ škłoŭskuju kałoniju № 17.
Ciapier čytajuć
«Jana hadami ciarpieła, a paśla adzin raz udaryła muža nažom — hetaha chapiła, kab zabić»12
Kamientary