Bunkiery, układańni ŭ źniešnaść zamiest rozumu. Bajučysia ery štučnaha intelektu, ludzi kidajucca ŭ krajnaści

Jak piša Business Insider, u Kremnijevaj dalinie bolš nie žartujuć pra štučny intelekt. Dla miascovaj elity, ad racyjanalistaŭ-fiłosafaŭ da zasnavalnikaŭ startapaŭ, nadyšoŭ momant iściny. Jany ŭpeŭnienyja: štučny supieryntelekt (AGI — artificial general intelligence) — heta nie pytańnie dalokaj budučyni, a realnaść bližejšych hadoŭ, i čas dla tearetyčnych dyskusij prajšoŭ. Nastaŭ čas dziejničać.

Ich dziejańni pakazvajuć, nakolki palarnymi stali pohlady na budučyniu. Aptymisty bačać śvitanak novaj ery, dzie čałaviectva dasiahnie niebyvałaha roskvitu, vyzvaliŭšysia ad razumovaj pracy. Piesimisty ž rychtujucca da horšaha: ekanamičnaha kałapsu i navat poŭnaha źniščeńnia čałaviectva. Jany traciać svaje źbieražeńni, budujuć bunkiery i sprabujuć uziać ad žyćcia ŭsio, pakul jašče nie pozna.

Bunkier na vypadak bijavajny

Hienry — małady daśledčyk štučnaha intelektu, jaki ličyć, što šancy na źniščeńnie čałaviectva z-za ŠI składajuć prykładna 50/50. Na pracy jon sprabuje praduchilić hety scenar, a ŭ volny čas — rychtujecca da jaho. Jon admoviŭsia ad ramantyčnych adnosin i achviaruje tracinu zarobku na daśledavańni biaśpieki ŠI. A dla siabie i siamji jon buduje bijaschovišča.

Pa słovach Hienry, zrabić heta na ździŭleńnie prosta. Treba kupić pałatku z dadatnym ciskam (takija vykarystoŭvajuć dla vyroščvańnia raślin), ustalavać na ŭvachodzie pavietra niekalki prafiesijnych filtraŭ i zapoŭnić usio heta ježaj, vadoj i prypasami na try hady. Košt takoha «kaŭčeha» — mienš za 10 tysiač dalaraŭ.

Ad razumnych da haračych: novaja fiłasofija žyćcia

Pakul adny kapajuć bunkiery, inšyja mianiajuć žyćciovyja pryjarytety. Jany ličać, što ŭ śviecie, dzie ŠI voźmie na siabie ŭsiu intelektualnuju pracu, kaštoŭnaść čałaviečaha rozumu rezka ŭpadzie. Na pieršy płan vyjduć sacyjalnyja navyki, charyzma i, hałoŭnaje, źniešniaja pryvabnaść. Mozh bolš nie ŭ trendzie, ciapier u modzie pryhažość i muskuły.

Jaskravy prykład takoj źmieny pryjarytetaŭ — historyja Apurvy Šrynivasan, daśledčycy ŭ halinie bijamiedycynskich danych z Łos-Andželesa. Jana pryznajecca, što raniej jaje zaŭsiody pryvablivali intelektuały. Jana śviadoma staviła rozum značna vyšej za standartnuju źniešniuju pryvabnaść.

Ale ciapier, kali hienieratyŭny ŠI ŭsio čaściej biare na siabie razumovuju pracu, jana zrazumieła, što hoły intelekt straciŭ dla jaje byłuju kaštoŭnaść. Na pieršy płan vyjšli charyzma, kamunikabielnaść i prosta źniešniaja pryvabnaść. Jak jana trapna sfarmulavała ŭ svaim tvicie: «Razumny? Pierakvalifikujsia ŭ krutoha i pryvabnaha».

Hetaja ideja znachodzić vodhuk u mnohich.

«Ja zaŭsiody lubiŭ fitnes, — kaža Soren Łarsan, technałahičny pradprymalnik z Fłarydy. — I mnie zdajecca, što być pryvabnym, kamunikabielnym i viasiołym — heta tyja redkija jakaści, jakija buduć asabliva canicca, kali ŠI zmoža rabić usiu intelektualnuju pracu».

Niekatoryja ŭžo žyvuć pavodle hetaj novaj fiłasofii. Kansultant pa ŠI Džejsan Lu kaža, što jon «užo zrabiŭ hety pavarot». Niekalki hadoŭ tamu z-za prafiesijnaj traŭmy ruk jon byŭ vymušany pakinuć karjeru prahramista. Heta prymusiła jaho całkam pieraasensavać svajo žyćcio. Jon zaniaŭsia džyu-džycu i kieramikaj, a novuju karjeru kansultanta pabudavaŭ tak, kab maksimalna delehavać zadačy i vyzvalać čas dla znosin, a nie dla karjernaj honki.

«Ja nie chacieŭ, kab mianie canili za moj intelekt, bo mienavita hety intelekt fizična paškodziŭ mnie i pryvioŭ da straty pracy. Staŭka na adpačynak i zadavalnieńnie — voś tak ja ŭsprymaju epochu AGI», — davodzić Łarsan.

Žyć tut i ciapier, bo zaŭtra moža nie być

Ale jość i inšyja ludzi, jakija mianiajuć svajo žyćcio nie z-za aptymistyčnych nadziej na ŠI, a z-za hłybokich strachaŭ pierad im. Tryvoha za budučyniu sparadziła jašče adzin trend — hiedanizm.

Ludzi, napałochanyja pierśpiektyvaj źniknieńnia, vyrašyli žyć napoŭnicu, nie adkładajučy ničoha na potym. Jany spasyłajucca na piśmieńnika K.S. Ljuisa, jaki kazaŭ, što kali atamnaja bomba pavinna ŭpaści, to niachaj jana zastanie nas za zvyčajnymi čałaviečymi spravami, a nie ŭ panicy.

Vienčurny inviestar Višał Majni prytrymlivajecca śpisu žadańniaŭ: robić toje, što važna, pakul jość čas.

U hetaj niavyznačanaści jon prapahanduje «paleafuturyzm»: śviadomy vybar na karyść realnych čałaviečych znosin u śviecie, pierapoŭnienym zachaplalnym i piersanalizavanym ličbavym kantentam.

Hrošy na viecier ci apošni šaniec razbahacieć?

Finansavyja stratehii taksama padzialilisia na dva łahiery. Daniel Kakatajła, były daśledčyk z OpenAI, pierastaŭ adkładać na piensiju jašče ŭ 2020 hodzie. Jon ličyć, što ŭ bližejšyja hady moža adbycca «strata kantrolu» nad ŠI, jakaja pryviadzie da suśvietnaj vajny ci navat vymirańnia čałaviectva da 2035 hoda.

«Navošta źbirać hrošy na budučyniu, jakaja moža nie nadyści?» — razvažaje jon.

Inšyja, naadvarot, kinulisia zarablać z šalonaj chutkaściu. Jany bajacca, što zastałosia ŭsiaho niekalki hadoŭ, pierš čym «muzyka spynicca» i čałaviečaja praca stanie bieskarysnaj.

Charun Čaŭdery, zasnavalnik ŠI-startapa, emihravaŭ u ZŠA z Pakistana 5 hadoŭ tamu. Jon razhladaje nastupnyja niekalki hadoŭ jak apošni šaniec zabiaśpiečyć budučyniu svajoj siamji.

«Mahčymaściaŭ dla sacyjalnaha rostu stanie značna mienš, tamu ludzi ŭ asnoŭnym zafiksujucca ŭ svaich sacyjalna-ekanamičnych statusach», — kaža Charun.

Strach i nadzieja na «čałaviečy zaapark»

Adnak niekatoryja iduć jašče dalej. Jany rychtujucca nie da finansavaha krachu, a da sapraŭdnaha kanca śvietu.

Pradprymalnik Ulryk Chorn zaŭsiody cikaviŭsia «hramadskimi prablemami», što pryviało jaho ŭ śfieru adnaŭlalnaj enierhietyki. Adnak u apošnija hady jaho chvaluje inšaja prablema: bijabiaśpieka. Chorn zaniepakojeny «lustranym žyćciom» — novaj halinoj bijałahičnych daśledavańniaŭ, jakaja zajmajecca stvareńniem lustranych kopij pryrodnych formaŭ žyćcia.

Jon baicca, što ŠI moža paskoryć daśledavańni ŭ hetaj śfiery i pryvieści da stvareńnia razburalnaj bijałahičnaj zbroi. Na jaho dumku, da momantu, kali ŠI atrymaje takija mahčymaści, zastałosia ŭsiaho 5-10 hadoŭ.

Na sabranyja achviaravańni Chorn zasnavaŭ startap Fonix, jaki robić bijaschoviščy, abstalavanyja filtrami vysokaj stupieni ačystki pavietra.

Za 39 000 dalaraŭ možna nabyć schovišča, jakoje ŭstaloŭvajecca prosta doma na vypadak, kali, jak kažuć, hrymnie hrom. Pavodle jaho słoŭ, jon užo atrymaŭ niekalki papiarednich zakazaŭ, a pastaŭki zapłanavany na 2026 hod.

Biznes na strachu pierad ŠI nabiraje abaroty. Dacent biznes-analityki va Uičyckim univiersitecie Ros Hrucemachier adkryŭ kansałtynhavuju firmu, kab vučyć ludziej «ustojlivaści» da budučych šokaŭ, a dla siabie ŭžo kupiŭ ziamlu pad bunkier u Vajominhu.

Pradprymalnik Džejms Norys pierajechaŭ u «schovišča dla vyžyvańnia» ŭ Azii i dapamahaje inšym rabić toje ž samaje. Jon nastolki vieryć u budučy chaos, što navat zaroksia mieć dziaciej.

A što ž Hienry, pra jakoha raskazvali napačatku? Za niekalki tydniaŭ, pakul rychtavaŭsia artykuł, jon pieradumaŭ samastojna budavać maleńkaje schovišča. Ciapier jon choča kupić ziamlu ŭ Kalifornii, kab uźvieści tam bolš nadziejnyja abarončyja zbudavańni dla siabie, siamji i siabroŭ. Mužčyna rychtujecca da scenaryja, dzie «zvyšrazumny ŠI zachopić uładu».

Hienry spadziajecca, što ŭ mašyn zastaniecca choć krychu empatyi. «Moža, jany pakłapociacca pra tych, chto vyžyŭ, i źmieściać ludziej u niejki čałaviečy zaapark, — razvažaje jon. — A ja b lepš žyŭ u čałaviečym zaaparku, čym byŭ by zabity bijazbrojaj».

• 0
• 0
• 0
• 0
• 0
• 0
• 0
• 0