Paśla pajezdki za miežy ES tajamniča źnik Anatol Kotaŭ, byłaja pravaja ruka Paŭła Łatuški
Kaleham ź pijar-ahienctva jon skazaŭ, što prosić adhuł pa asabistych spravach, žoncy — što treba adjechać pa rabocie. A sam prapaŭ. Mierkavana — paśla vyletu ŭ Turcyju. Paśla ŭciokaŭ ź Biełarusi ŭ 2020-m Anatol Kotaŭ razharnuŭ dziejnaść u Polščy, prymknuŭ da mejnstrymnych palitykaŭ, staŭ pravaj rukoj Paŭła Łatuški. Ale potym «całkam vyjšaŭ z davieru» i sprabavaŭ stvaryć kaalicyju z Valeryjem Capkałam i Volhaj Karač.
Pra zatrymańnie Anatola Kotava ŭ Turcyi pieršym paviedamiła vydańnie Reform.news u noč na 24 žniŭnia. Praŭda, potym vydańnie siabie abvierhła.
«Ja nie mahu paćvierdzić, heta łžyvaja infarmacyja», — skazaŭ Reform.news Alaksandr Apiejkin, siabar Kotava. Žonka Kotava Nastaśsia «była aburanaja publikacyjaj, ale admoviłasia jaje kamientavać».
Ale realnaść nastupnaja: Kotaŭ kali i nie zatrymany ŭ Turcyi — hetaj častki historyi my pakul nie viedajem, — to prynamsi zahadkava źnik u treciaj krainie paśla vyletu ź Jeŭrasajuza.
Jak viadoma «Našaj Nivie», Anatol Kotaŭ pierastaŭ vychodzić na suviaź u čaćvier, 21 žniŭnia.
Znajomyja supakojvali siabie tym, što, mahčyma, jon kanśpiratyŭna sustrakajecca z kimści — Kotaŭ stvaraŭ sabie imidž važnaha dziejača, — dla čaho, maŭlaŭ, i spatrebiłasia admovicca ad devajsaŭ.
U Varšavie Kotaŭ pracuje ŭ ivent-ahienctvie Terra Group.
Svaim kaleham pa ivent-ahienctvie Kotaŭ skazaŭ, što prosić adhuł dla kamandziroŭki pa asabistych spravach, žoncy — što treba adjechać pa pracy.
Ale z čaćviarha, 21 žniŭnia, Kotaŭ nie tolki nie abjaviŭsia ŭ sacyjalnych sietkach — u jahonym telehram-akaŭncie ciapier napisana, što «byŭ anłajn ciaham tydnia» — ale i nie viarnuŭsia ŭ Polšču samalotam u niadzielu, 24 žniŭnia, jak toje było zapłanavana.
Taksama «Našaj Nivie» viadoma, što ŭ polskija orhany siabry Kotava ŭžo padali zajavu ab źniknieńni čałavieka. Takuju samuju davodziłasia pisać, kali prapała śpikierka Kaardynacyjnaj rady Anžalika Mielnikava. Jana tak i nie znajšłasia.
Sam Anatol Kotaŭ — były biełaruski čynoŭnik siaredniaj ruki, daŭni znajomy Paŭła Łatuški. Paśla vypusku z rasijskaha MHIMO Kotaŭ pracavaŭ u sakrataryjacie Savieta Respubliki, paśla pajšoŭ pa dypłamatyčnaj linii.
Kotaŭ, jak i Łatuška, pracavaŭ pasolstvie Biełarusi ŭ Varšavie. Na druharadnaj pasadzie druhoha sakratara.
Było niekalki chvalaŭ vysyłki z Polščy biełaruskich dypłamataŭ u adkaz na vysyłku svaich dypłamataŭ ź Minska. Padčas pieršaj chvali takim vysłanym byŭ Maksim Ryžankoŭ, padčas druhoj, jak uspaminajuć polskija dypłamaty, byŭ Kotaŭ.
Vysłanaha Ryžankova pryznačyli načalnikam u biełaruski Nacyjanalny alimpijski kamitet, a Kotaŭ, paźniej, staŭ tam jahonym namieśnikam.
Potym Kotaŭ apynuŭsia ŭ dyrekcyi Jeŭrapiejskich hulniaŭ, paśla byŭ panižany da namieśnika načalnika adnaho z adździełaŭ u Kiraŭnictvie spraŭ Łukašenki.
U 2020 Kotaŭ adtul pajšoŭ, nie pahadziŭšysia z palitykaj Łukašenki, i vyjechaŭ u Polšču, dzie staŭ pravaj rukoj Paŭła Łatuški.
Imavierna, mienavita na fond Kotava, jaki ŭ taho byŭ, a ŭ Łatuški — nie było, i pastupali hrošy na dziejnaść NAU. Ale staryja znajomyja ŭ vyniku razyšlisia mienavita pa finansavych pryčynach i dahetul sudziacca za hrošy.
Čytajcie taksama: Łatuška pryznaŭsia, što ŭžo niekalki hadoŭ sudzicca sa svaim byłym paplečnikam Anatolem Kotavym
Kotaŭ ža ŭ 2021-m znajšoŭ novych sajuźnikaŭ i staŭ adnym z arhanizataraŭ Foruma demakratyčnych sił — razam z Valeryjem Capkałam, Volhaj Karač i inšymi dziejačami. U Biełarusi kožnamu ź ich urešcie zavočna prysudzili pa 12 hadoŭ źniavoleńnia i hihanckija štrafy. Kotaŭ atrymaŭ 600 tysiač rubloŭ štrafu.
U situacyi z Kotavym šmat niajasnaha — i hetym jana nahadvaje situacyju z Anžalikaj Mielnikavaj, inšaj paplečnicaj Paŭła Łatuški, jakaja ličycca źnikłaj, ale jakaja, jak paźniej vyśvietliłasia, tajemna sustrakałasia ź lehiendavanym ahientam biełaruskich śpiecsłužbaŭ.
Kamientary