U Hiermanii nastaŭnica 16 hadoŭ znachodziłasia na balničnym i atrymlivała poŭny zarobak

Jak piša Bild, nastaŭnica bijałohii i hieahrafii z Dujsburha pačała pracavać u prafiesijnym kaledžy horada Vieziel u 2003/2004 navučalnym hodzie.

Adnak užo sa žniŭnia 2009 hoda jana pajšła na balničny praz «psichałahičnyja prablemy» i z taho času tak i nie viarnułasia na pracu.

Uvieś hety čas jana atrymlivała poŭny zarobak, jaki, pavodle taryfnaj sietki dla dziaržsłužačych, składaje ad 5051 da 6174 jeŭra na miesiac.

Kali ŭ 2015 hodzie ŭ kaledž pryjšoŭ novy dyrektar, nastaŭnica ŭžo daŭno stała ŭ svajoj škole sapraŭdnym «pryvidam». Jak zajaviŭ kiraŭnik vydańniu Bild, jon «nikoli navat nie čuŭ imia hetaj nastaŭnicy».

Prajšło jašče dzieviać hadoŭ, pierš čym viasnoj 2024 hoda na žančynu, jakaja ŭvieś čas chvareła, narešcie źviarnuli ŭvahu orhany školnaha nahladu. Tolki paśla hetaha byŭ pryznačany aficyjny miedycynski ahlad, kab vyznačyć jaje realny stan zdaroŭja. Adnak nastaŭnica razam sa svaim advakatam nieadkładna abskardziła hetaje rašeńnie ŭ sudzie.

Pavialičyć

Rašeńnie suda

Spravu razhladaŭ Vyšejšy administracyjny sud ziamli Paŭnočny Rejn-Viestfalija ŭ Miunstery, jaki kančatkova adchiliŭ skarhu nastaŭnicy. Jana abaviazana prajści ahlad.

Pry hetym sudździ zrabili rezkuju zaŭvahu ŭ adras pracadaŭcy — uładaŭ ziamli. Jany nazvali «šmathadovuju biaździejnaść» čynoŭnikaŭ «sapraŭdy niezrazumiełaj».

Tym nie mienš, sud pastanaviŭ, što patrabavańnie ab ahladzie zastajecca zakonnym, bo prava dziaržavy na takuju pravierku nie maje terminu daŭnaści.

Sud patłumačyŭ, što heta źjaŭlajecca častkaj abaviazku pracadaŭcy kłapacicca pra svajho supracoŭnika. Akramia taho, heta robicca ŭ intaresach hramadstva: takim čynam harantujecca, što pracujuć tolki pracazdolnyja dziaržsłužačyja, i što jany nie atrymlivajuć pastajannuju apłatu, nie vykonvajučy ŭzamien svaich abaviazkaŭ.

Taksama sud vyrašyŭ sprečnaje pytańnie ab tym, ci moža ahlad uklučać psichijatryčnuju ekśpiertyzu. Było pastanoŭlena, što heta dapuščalna, pakolki nastaŭnica sama padavała daviedki z centra nieŭrałohii i psichijatryi, što i apraŭdvaje takuju pravierku.

Kali ahlad paćvierdzić niepracazdolnaść, jana budzie atrymlivać nie poŭny zarobak, a piensiju, pamier jakoj značna nižejšy.

Novyja padazreńni

Tym časam, jak piša Bild, u spravie źjaviŭsia novy pavarot. U internecie byli znojdzieny zapisy pra žančynu-naturapata (śpiecyjalista pa nietradycyjnaj miedycynie), imia i proźvišča jakoj całkam supadajuć z danymi nastaŭnicy.

Hetyja zapisy, vidavočna, źjavilisia paśla 2009 hoda. Akramia taho, u adnoj z sacyjalnych sietak žančyna sama ŭkazała, što prajšła pavyšeńnie kvalifikacyi jak naturapat, choć i nie ŭdakładniła, kali mienavita.

Žurnalisty naviedali adras nastaŭnicy ŭ Dujsburhu. Pa słovach susiedziaŭ, nijakaha kabinieta naturapata tam niama, ale imia žančyny im dobra znajomaje: «Jana nastaŭnica i raniej tut žyła». Adnak pra toje, što jana nie moža pracavać pa stanie zdaroŭja, jany pačuli ŭpieršyniu.

Jak zaŭvažajuć žurnalisty, miarkujučy pa ŭsim, finansavaje stanovišča ŭ žančyny dobraje: joj naležać dźvie kvatery ŭ Dujsburhu.

Ni sama nastaŭnica, ni jaje advakaty pakul nie dali nijakich kamientaroŭ na zapyt žurnalistaŭ.

• 0
• 0
• 7
• 8
• 1
• 0
• 0
• 0