Antanina Kanavałava raskazała, jak jaje prymušali padpisać prašeńnie pra pamiłavańnie

Antanina Kanavałava adznačyła, što pa svaim pamiłavańni «vyjści naohuł nie pavinna była». Jana rakazała, što na prašeńnie na imia Alaksandra Łukašenki joj pryjšła admova. Ale zatym letam 2024 hoda da jaje ŭ kałoniju pryjechali supracoŭniki KDB, prakuratury i HUBAZiKa i prymusili pad dyktoŭku pisać novaje prašeńnie.

«Supracoŭnik KDB mnie dyktavaŭ pra toje, što ja, Kanavałava Antanina Siarhiejeŭna, abaviazvajusia nie parušać zakon Respubliki Biełaruś, prašu pamiłavańnia ŭ prezidenta. I ŭ kancy jon mnie kaža, što vam treba dapisać frazu, što vy ličycie, što Śviatłana Cichanoŭskaja ličyć ludziej ci narod, ja ŭžo dakładna nie pamiataju, miasam», — skazała byłaja palitźniavolenaja.

Zamiest taho kab pisać pradyktavanaje, Kanavałava vyjšła, dumajučy, što jaje ŭžo nie vyzvalać. Tak i adbyłosia: u žniŭni 2024 hoda, jak pieršapačatkova mierkavałasia, jana na volu nie vyjšła. Ale ŭ kastryčniku joj znoŭ prapanavali napisać prašeńnie:

«Nie było nijakich siłavych mietadaŭ, ničoha mnie nie bili, ale było skazana, što vy viedajecie, što za hetym rušyć uśled, kali vy nie padpišacie».

Hetym razam, adnak, ad jaje ŭžo nie patrabavali pisać ničoha suprać Cichanoŭskaj, tolki prośbu ab pamiłavańni — «litaralna, napeŭna, try-čatyry skazy». Paśla hetaha jaje vyzvalili.

Nieŭzabavie paśla svajho vychadu z kałonii Kanavałava pryznałasia, što padčas znachodžańnia ŭ kałonii była prymušanaja napisać pahadnieńnie ab supracy z administracyjaj. Ciapier prapahandysckija resursy sprabujuć jaje dyskredytavać, publikujučy źviazanyja ź joju dakumienty pra heta.

Kanavałava miarkuje, što ataki na jaje z boku siłavikoŭ, jakich jana nazyvaje karnikami, buduć praciahvacca jašče doŭha. Ale, ź jaje słoŭ, «kali ŭ ich tam padharaje, značyć, ja idu pravilnaj darohaj». Byłaja palitźniavolenaja padkreśliła, što joj chavać bolš niama čaho.

Kanavałava paviedamiła, što źbirajecca prajści detektar chłuśni, kab źniapraŭdzić usie inšyja abvinavačvańni ŭ svoj adras, dakazać ludziam, što na siońniašni dzień nijakich suviaziaŭ ź siłavikami jana nie padtrymlivaje.

«I mieć nikoli nie budu. I jany heta vydatna viedajuć. Tamu jany takim čynam sprabujuć mianie dyskredytavać», — skazała jana.

Davieranaja asoba Śviatłany Cichanoŭskaj Antanina Kanavałava była zatrymanaja 6 vieraśnia 2020 hoda. Joj prysudzili piać z pałovaj hadoŭ kałonii za «masavyja biesparadki». Paśla byŭ aryštavany i jaje muž Siarhiej Jaraševič. Dzieci Antaniny zastalisia z babulaj. Antanina Kanavałava vyjšła pa pamiłavańni 10 śniežnia 2024 hoda, paśla čaho źjechała za miažu.

• 2
• 1
• 1
• 2
• 1
• 1
• 0
• 1