Na Dzień horada ŭ Minsku abmiažujuć uvachody ŭ mietro i padziemnyja pierachody
U Dzień horada 13 vieraśnia ŭ centry Minska mahčymyja abmiežavańni dostupu ŭ padziemnyja pierachody i stancyi mietro, asabliva ŭ rajonie Niamihi. Pra heta paviedamiŭ načalnik Upraŭleńnia achovy pravaparadku i prafiłaktyki HUUS Minharvykankama Siarhiej Harochaŭ.
Abmiežavańni mohuć uvieści pry niespryjalnych mietearałahičnych umovach i mocnych apadkach pablizu miescaŭ praviadzieńnia śviatočnych mierapryjemstvaŭ.
Asabliva vialikaja kolkaść haściej čakajecca kala Pałaca sportu i na placoŭcy fiestyvalu histaryčnaj rekanstrukcyi. Prachod tut budzie arhanizavany praz vosiem kantrolna-prapusknych punktaŭ: kala stancyi mietro «Niamiha», kala pierachodaŭ u handlovym centry «Halereja», na vulicy Mielnikajcie, uzdoŭž zialonaj zony praśpiekta Pieramožcaŭ i praśpiekta Mašerava.
Dla asobnych katehoryj hramadzian — vieteranaŭ, invalidaŭ, ciažarnych žančyn i ludziej ź dziećmi — buduć arhanizavanyja asobnyja punkty propusku pad aranžavym tentam. Kožny KPP budzie abstalavany infarmacyjnymi stendami sa śpisam zabaronienych rečaŭ dla chutčejšaha prachodu. Padčas mierapryjemstvaŭ buduć pracavać kamiery zachoŭvańnia na praśpiekcie Pieramožcaŭ, vulicy Mielnikajcie i ŭ rajonie skryžavańnia praśpiektaŭ Mašerava i Pieramožcaŭ.
Akramia taho, šeść KPP buduć pracavać na placoŭcy «Vierchni horad». Uzmocnienyja miery biaśpieki dziejničajuć u parku imia Horkaha, dzie 13 vieraśnia projdzie «Fiestyval prafiesij». Z 19.00 u skviery «Starościnskaja słabada» kala hatela «Biełaruś» buduć ustanoŭlenyja pierymietry biaśpieki, adkul u 23.00 zapuściać śviatočny fiejervierk.
Siarhiej Harochaŭ adznačyŭ, što padčas śviatočnych mierapryjemstvaŭ miery biaśpieki buduć uzmocnienyja va ŭsich rajonach Minska. Z 12 vieraśnia pavialičycca kolkaść patruloŭ, a z 13 vieraśnia milicyja pierachodzić na ŭzmocnieny režym niasieńnia słužby.
Kamientary