Kamaroŭ pryciahvajuć ludzi, jakija napiaredadni pili piva i zajmalisia seksam
Niekatoryja ludzi niby mahnitam pryciahvajuć da siabie kamaroŭ i tamu pakutujuć ad ich ukusaŭ značna čaściej za inšych. U navukoŭcaŭ pakul niama adzinaha mierkavańnia, čym mienavita abumoŭleny hety efiekt, daśledavańni ŭ hetym kirunku praciahvajucca. Niadaŭna svoj uniosak u vyvučeńnie hetaha pytańnia zrabiła hrupa śpiecyjalistaŭ ź Niderłandaŭ. Ich vysnovy mohuć ździvić.
Kamary vinavatyja ŭ najbolšaj kolkaści čałaviečych śmierciaŭ u śviecie, bo pieranosiać takija niebiaśpiečnyja chvaroby, jak malaryja, lichamanka denhie, virusy Zika, Zachodniaha Niła i Čykunhuńja. Pavodle acenak, jany štohod stanoviacca pryčynaj kala 2,7 miljona śmierciaŭ.
Kab efiektyŭna zmahacca z hetaj pahrozaj, treba razumieć, kaho kamary vybirajuć u jakaści achviary. Daŭno viadoma, što ich hałoŭny aryjencir — vuhlakisły haz, jaki my vydychajem. Adnak navukoŭcy ŭpeŭnienyja, što klučavuju rolu adyhryvajuć i inšyja sihnały, asabliva pachi, jakija vydzialaje cieła čałavieka.
Jak piša Popular Science, daśledčyki z Univiersiteta Radbaŭda ŭ Niderłandach vyrašyła vyśvietlić, jakija bijałahičnyja i sensarnyja faktary najbolš upłyvajuć na «charčovyja pieravahi» kamaroŭ.
Zamiest taho, kab zaprašać dobraachvotnikaŭ u sterylnuju łabaratoryju, kamanda navukoŭcaŭ pad kiraŭnictvam bijołaha Fieliksa Choła pajšła niezvyčajnym šlacham.
Jany razharnuli svaju pierasoŭnuju łabaratoryju ŭ transpartnych kantejnierach prosta na terytoryi bujnoha muzyčnaha fiestyvalu Lowlands, jaki prachodzić štohod prykładna za 65 kiłamietraŭ na ŭschod ad Amsterdama.
Z prykładna 60 tysiač naviedvalnikaŭ fiestyvalu zhodu pryniać udzieł u ekśpierymiencie vykazała kala 500 čałaviek. Spačatku jany adkazvali na pytańni ankiety ab svaim charčavańni, hihijenie i ładzie žyćcia, uklučajučy vielmi asabistyja detali.
Paśla hetaha kožny ŭdzielnik źmiaščaŭ ruku ŭ śpiecyjalna skanstrujavany kantejnier z akryłavaha škła, dzie znachodzilisia samki malaryjnych kamaroŭ (Anopheles).
Kanstrukcyja była biaśpiečnaj: adtuliny byli dastatkova małymi, kab kamary mahli adčuć pach čałavieka, ale nie pratknuć skuru svaim chabatkom. Navukoŭcy zapisvali reakcyju nasiakomych na videa.
Analiz danych pakazaŭ vyraznuju tendencyju. Vyśvietliłasia, što ludzi, jakija napiaredadni pili piva i zajmalisia seksam, byli prykładna ŭ 1,35 raza bolš pryvabnymi dla kamaroŭ, čym ćviarozyja i ŭstrymanyja ŭdzielniki.
I naadvarot, nasiakomyja radziej sprabavali atakavać ruku, kali jaje niadaŭna pamyli abo nanieśli na jaje soncaachoŭny krem.
«U ich prosta hust da hiedanistaŭ siarod nas», — z humaram adznačyli aŭtary daśledavańnia.
Choć navukoŭcy pryznajuć, što ekśpierymient prachodziŭ u «słaba kantralavanych umovach», a jaho ŭdzielnikami byli pieravažna «amatary navuki siarod naviedvalnikaŭ fiestyvalu», vyniki dajuć hlebu dla razvažańniaŭ. Jany paćviardžajuć, što na vybar kamaroŭ upłyvaje składany kaktejl pachaŭ, jaki vydzialaje naša cieła, i hety kaktejl mianiajecca ŭ zaležnaści ad taho, što my jamo, pjom i robim.
Tamu, kali ŭ nastupny raz vy budziecie adbivacca ad nadakučlivych nasiakomych, uspomnicie: mahčyma, vy prosta zanadta dobra pravodzicie čas. A pakul navuka praciahvaje daśledavańni, nie zabyvajciesia pra prostyja parady: abmiažoŭvajcie ałkahol na pryrodzie i karystajciesia soncaachoŭnymi srodkami. Što tyčycca treciaj zvyčki, to navukova dakazana, što jana, pry ŭzajemnaj zhodzie, vielmi karysnaja dla zdaroŭja.
Ciapier čytajuć
Kaśmičnaja turystka Maryna Vasileŭskaja vyjšła zamuž za kasmanaŭta Navickaha? Jany nosiać piarścionki23
Kamientary