Prync Hary papiŭ harbaty z karalom Karłam. Heta moža być pieršaj prykmietaj jaho prymireńnia ź siamjoj

U mai Hary daŭ intervju Bi-bi-si, u jakim ton jaho vykazvańniaŭ pra svajakoŭ značna źmianiŭsia.

Šmat hadoŭ u jaho słovach prasočvalisia adkrytyja emocyi i žorstkaja krytyka karaleŭskaj siamji — heta adnosiłasia i da jaho miemuaraŭ pad nazvaj «Zapasny» (Spare), i da dakumientalnaha filma vytvorčaści Netflix, i da šmatlikich razmoŭ Hary z žurnalistami. Ale ciapier pierad kamierami paŭstaŭ zusim inšy prync.

«Ja vielmi chaču pamirycca sa svajoj siamjoj, — skazaŭ Hary ŭ intervju. — Niama sensu pastajanna svarycca. Žyćcio karotkaje».

Takim čynam, prync davoli vyrazna abaznačyŭ svaje namiery: jon choča sustrecca z baćkam. Ale ci adčuvaŭ sam karol Karł toje ž samaje?

U lipieni brytanskaja hazieta Mail on Sunday apublikavała fatahrafiju, na jakoj była źniataja sustreča supracoŭnikaŭ pres-słužby prynca Hary z pres-sakratarom karala. Takim čynam my daviedalisia pra pieramovy pamiž dvuma łahierami, jakich raniej ličyli varožymi, i hetaja navina trapiła na pieršuju pałasu bujnoj brytanskaj haziety.

Abodva baki admaŭlali, što naŭmysna «źlili» fota žurnalistam, ale tak ci inakš stała zrazumieła, što dyjałoh pačaŭsia. Abodva baki pačali padtrymlivać kantakt.

U apošnija dni jak pradstaŭniki Hary, tak i karala Karła maŭčali — i heta maŭčańnie taksama było davoli šmatznačnym. Jany nie paćviardžali i nie abviarhali dadzienyja pra mierkavanyja datu i čas sustrečy prynca z manarcham.

Žurnalisty tym časam praciahvali zdahadvacca, kali mienavita baćka pahavoryć z synam, vyvučajučy ich hrafiki pajezdak i prabieły ŭ raskładzie publičnych sustreč. Paśla siamiejnaj svarki, napoŭnienaj niedavieram i razdražnionaściu, jak pradstaŭniki Karła, tak i prynca Hary nie śpiašalisia havaryć pra mahčymuju sustreču. Abodva łahiery maŭčali da samaha kanca.

Na hetym tydni prync Hary pryjechaŭ u Vialikabrytaniju, kab uziać udzieł u niekalkich dabračynnych mierapryjemstvach.

Z 2020 hoda jon žyvie ŭ ZŠA i nie bačyŭsia z baćkam tvaram u tvar ź lutaha 2024 hoda. Apošni raz jany sustrakalisia adrazu paśla taho, jak u Karła vyjavili rak — tady Hary pryjechaŭ na radzimu, kab atrymać u baćki karotkuju aŭdyjencyju.

Paśla sustrečy, jakaja adbyłasia ŭ sieradu na hetym tydni, Bukinhiemski pałac i supracoŭniki prynca Hary skaardynavali svaju reakcyju: jany patłumačyli žurnalistam, što nie buduć kamientavać padrabiaznaści čajavańnia.

Paźniej Bukinhiemski pałac paćvierdziŭ, što karol pryvatna sustreŭsia z synam i papiŭ ź im harbaty, a taksama što Hary naviedaŭ karaleŭskuju rezidencyju i prabyŭ tam kala 50 chvilin.

Paśla hetaha, u adkaz na pytańnie žurnalistaŭ pra toje, jak siabie adčuvaje jaho baćka, Hary skazaŭ: «Tak, ź im usio cudoŭna, dziakuj».

Uźnikła adčuvańnie, što ahulny nastroj u adnosinach Hary i Karła trochi źmianiŭsia.

Kali b na hety raz Hary źjechaŭ ź Vialikabrytanii, tak i nie sustreŭsia z karalom, było b ciažka spadziavacca, što ich adnosiny ŭdasca naładzić.

Taki scenar paškodziŭ by abodvum bakam.

Ale pakul niezrazumieła, jak padziei buduć raźvivacca dalej. Da poŭnaha ŭźjadnańnia siamji jašče vielmi daloka.

Na hetym tydni nie było nijakich prykmiet taho, što Hary sustreniecca z bratam, pryncam Uiljamam: ich pracoŭnyja hrafiki byli zusim asobnyja.

Prync Hary źjazdžaje ź Vialikabrytanii ŭ čaćvier, i kali jon vierniecca siudy nastupny raz, pakul nieviadoma.

Padčas vizitu na radzimu jon upieršyniu za apošnija paŭtara hoda pravioŭ niejki čas sa svaim baćkam u adnym pakoi — i papiŭ ź im harbaty.

Šlach da prymireńnia moža być doŭhim i niaprostym — i ciapierašnija kroki pa im možna ličyć pakul što nievialikimi, ale važnymi.

• 1
• 0
• 1
• 1
• 0
• 0
• 0
• 0