Babaryka raskazaŭ, jakija ŭ jaho adnosiny ź Cichanoŭskaj i inšymi pradstaŭnikami demsiłaŭ
Były palitviazień, bankir i eks-pretendent na pasadu prezidenta Biełarusi Viktar Babaryka ŭ intervju Delfi raskazaŭ pra svaje adnosiny sa Śviatłanaj Cichanoŭskaj i Abjadnanym pierachodnym kabinietam, acaniŭ pracu demakratyčnych sił za apošnija hady i patłumačyŭ, u čym ź imi nie pahadžajecca.
Babaryka adznačyŭ pracu, jakuju biełaruskija demakratyčnyja siły zrabili paśla 2020 hoda — «zachavańnie Biełarusi ciaham užo šaści hadoŭ paśla 2020 hoda ŭ jeŭrapiejskim i suśvietnym paradku dnia».
Asobna Babaryka adznačyŭ vynik hetaj pracy ŭ kantekście vajny suprać Ukrainy.
«Pry ŭsioj realnaj uciahnutaści režymu ŭ vajnu jak saahresara ja ŭsio roŭna baču pośpiechi ŭ padziele adkaznaści režymu i adkaznaści biełaruskaha naroda. I tut adnaznačna možna skazać, što heta zasłuha, biezumoŭna, demakratyčnych sił».
Razam z tym Babaryka bačyć prablemu ŭ tym, što za hady emihracyi pamiž demakratyčnymi strukturami za miažoj i biełarusami ŭnutry krainy ŭźnik razryŭ. Na jaho dumku, u takich umovach heta było amal niepaźbiežna.
«Pa ŭsich statystyčnych danych, try-piać hadoŭ emihracyi — kali jana isnuje, jana pačynaje žyć inšymi intaresami. Jon [hety razryŭ] nazirajecca».
Hałoŭnaje razychodžańnie z častkaj demakratyčnych sił Babaryka bačyć u tym, jakija zadačy jany staviać pierad saboj:
«Ja vielmi časta čuju: «Naša zadača — zachavać toje, čaho my dabilisia. Voś ja nie zhodny zachoŭvać. Ja liču, naša zadača — nie prosta prymnažać, naša zadača ŭsio ž taki farmiravać karysnaść dla biełarusaŭ unutry krainy, niahledziačy na ŭsie ciažkaści.
Voś u hetym, chiba što, my krychu nie supadajem».
Svaje adnosiny z demsiłami Babaryka akreśliŭ jak «družalubny niejtralitet».
Pry hetym Viktar padkreśliŭ, što nie zacikaŭleny ŭ supraćstajańni ŭnutry demakratyčnaha asiarodździa, bo «ŭ pryncypie nie prychilnik luboj vajny, tamu što vajna prosta zajmaje kuču sił i nakiravanaja na razbureńnie», a jon «usio ž taki prychilnik stvaralnaha pracesu».
Asabliva biessensoŭnymi takija kanflikty jon ličyć va ŭmovach abmiežavanych resursaŭ biełaruskaj emihracyi.
Jak śćviardžaje Babaryka, ź jaho boku ŭ adras demakratyčnych sił Biełarusi pakul nie hučała krytyka, tolki pytańni.
«Na žal, adkazaŭ ja nie pačuŭ. Prahučała krytyka samoha pytańnia», — adkazaŭ Babaryka.
U jakaści prykładu jon pryvioŭ reakcyju na toje, što jahonyja pytańni paraŭnoŭvali z aŭdytarskaj pravierkaj.
«Mnie časam vielmi padabajecca krytyka: «Babaryka zadaŭ pytańnie jak aŭdytar». A ja zaŭsiody kažu: «A ja nie vielmi zrazumieŭ, a čamu aŭdyt — heta drenna?»
Nasamreč aŭdyt uvohule — heta kłasnaja historyja. (…) U čym kaštoŭnaść niezaležnaha aŭdytu? Mienavita ŭ praŭdzivaści jaho acenki. A tut nie. Kažuć, što aŭdytar — heta drenna».
Ciapier čytajuć
U rasijskaj armii biełaruskaha najomnika paviesili na drevie ŭniz hałavoj i bili pałkaj pa hienitalijach23
Kamientary