Cichanoŭskaja: Heta było nie vyzvaleńnie, a departacyja

Śviatłana Cichanoŭskaja adkryła pres-kanfierencyju vyzvalenych palitźniavolenych. Pryvodzim tekst jaje vystupu.

«Pierš za ŭsio, ja chaču pryvitać našych hierojaŭ na voli. Dziakuj, što vy vystajali, dziakuj, što vy vytrymali. Učora byŭ vielmi emacyjny i ciažki dzień dla nas usich.

Najpierš ja chaču padziakavać prezidentu Trampu, Džonu Koŭłu, Krysu Śmitu, bo dziakujučy im i ich dypłamatyčnym namahańniam ludzi vyjšli na svabodu. I prezident Tramp pravilna nazvaŭ: heta vyzvaleńnie zakładnikaŭ. I my cenim jaho asabistuju rolu ŭ hetym humanitarnym pracesie.

Dziakuj Jeŭrapiejskamu sajuzu i ŭsim krainam, jakija ŭsie hetyja hady pryncypova i paśladoŭna dabivajucca vyzvaleńnia palitviaźniaŭ. Vyzvaleńnie — heta vynik našaj supolnaj pracy. Ja chaču padziakavać asobna Litvie, jakaja zrabiła niejmaviernaje: apieratyŭna pryniała palitviaźniaŭ, aformiła dakumienty i dapamahła na miažy.

My cenim i bačym hetuju dapamohu. I, viadoma, dziakuj usim pravaabaroncam, mižnarodnym partnioram, jakija ŭčora chutka adhuknulisia na prośbu ab dapamozie: Mižnarodny humanitarny fond, «Viasna», «Kraina dla žyćcia», «Dapamoha», BYSOL, Freedom House, BDPČ, BAŽ i ŭsie-ŭsie astatnija.

My radyja bačyć ludziej na voli, ale davajcie nazyvać rečy svaimi imionami. Toje, što adbyłosia ŭčora, — heta nie vyzvaleńnie, a prymusovaja departacyja.

My ŭsie pieražyvajem za los Mikałaja Statkieviča, jaki admoviŭsia vyjazdžać ź Biełarusi i mieŭ poŭnaje na heta prava. Ciapier jaho miesca znachodžańnia nieviadoma. Jaho mužny ŭčynak nahadvaje ŭčynak Maryi Kaleśnikavaj, jakaja pry sprobie departacyi parvała svoj pašpart.

Usie vyzvalenyja pavinny mieć prava vyjechać ci zastacca. I ŭčora ja razmaŭlała pra heta z amierykanskimi partniorami. My dabivajemsia, kab pry nastupnych vyzvaleńniach heta antyčałaviečnaja praktyka była spynienaja.

My dabivajemsia taksama, kab vyzvaleńni supravadžalisia spynieńniem represij. Tamu što, na žal, kožny tydzień źjaŭlajucca novyja palitviaźni, a pravaabaroncy fiksujuć pašyreńnie represij.

Biezumoŭna, usie pavinny vyjści na volu. I prezident Tramp nazvaŭ minimalnuju płanku — 1300 palitźniavolenych. I my budziem pracavać z amierykanskaj administracyjaj i ŭsimi našymi sajuźnikami ŭ Jeŭropie, kab vyzvaleńni praciahvalisia.

Heta krok u pravilnym kirunku, i ja zaklikaju režym vyzvalać usich zakładnikaŭ z turmaŭ. Heta pieršy krok da nacyjanalnaha dyjałohu, jaki nam usim patrebny.

Ciapier naša zadača — zabiaśpiečyć vyzvalenych dapamohaj: jurydyčnaj, psichałahičnaj i miedyčnaj, vyrašać pytańni ź lehalizacyjaj i dakumientami. Taksama litaralna za dzień biełarusy sabrali 85 tysiač jeŭra na padtrymku vyzvalenych. Ja vielmi ŭražanaja hetaj salidarnaściu. Dziakuj vam vialiki.

My pracujem z uradami roznych krain, kab zmabilizavać dapamohu dla represavanych, a praz dva tydni my rychtujem vialiki kanhres pa palitźniavolenych, kudy ja taksama zaprašaju jak našych siabroŭ, tak i ŭsie ŚMI».

• 7
• 0
• 1
• 3
• 0
• 0
• 0
• 1