Rasśledavalniki znajšli dubajskaha kašalka Łukašenki, jaki pabudavaŭ biznes-impieryju ŭ Litvie i zastaŭsia pa-za sankcyjami

Nitkaj, za jakuju paciahnuli žurnalisty «Biełaruskaha rasśledavalnickaha centra» razam ź litoŭskim miedyja 15min.lt pry padtrymcy kamandy Research and Data Centra daśledavańnia karupcyi i arhanizavanaj złačynnaści OCCRP i «Kibierpartyzan», stała litoŭskaja budaŭničaja kampanija z aptymistyčnaj nazvaj «Puiki investicija» («Vydatnaja inviestycyja»).

Pra kampaniju zahavaryli litoŭskija miedyja ŭ 2020 hodzie z-za jaje ambicyjnaha prajekta — budaŭnictva žyłoha kompleksu ŭ histaryčnaj častcy porta Kłajpiedy.

Prajekt vyklikaŭ pytańni ŭ člena haradskoj rady Niny Puciejkienie. Jak jana raskazała BRC, jaje naściarožyła małalikaść supracoŭnikaŭ (dva-try čałavieki) i nadzvyčaj ścipły prybytak firmy.

Jak paviedamlajecca ŭ materyjale, Puiki investicija aktyŭnaja nie tolki ŭ Kłajpiedzie, ale i ŭ Vilni, dzie firma pabudavała kompleks taŭnchaŭsaŭ i šmatkvaterny dom. Pavodle danych rejestraŭ, pa ŭsioj Litvie hetaja struktura vałodaje abo vałodała bolš čym 150 abjektami nieruchomaści.

Rasśledavalniki pajšli pa śledzie i vyśvietlili, što za kampanijaj staić arabski inviestar — Machamied Achmad Al-Zaraim Al-Suvajdzi, jaki kantraluje litoŭskuju kampaniju praź dźvie brytanskija firmy.

Ślady viaduć da Viktara Šaŭcova

Jak pišuć aŭtary, imia Al-Suvajdzi ŭžo hučała ŭ rasśledavańniach BRC pobač z adnym z samych daŭnich «kašalkoŭ» Alaksandra Łukašenki — biznesmienam Viktaram Šaŭcovym. Al-Suvajdzi ciesna źviazany z Šaŭcovym i razam ź im kantralavaŭ budaŭničuju kampaniju «Biełzamiežbud».

Pavialičyć

Viktar Šaŭcoŭ, jaki dziesiacihodździami absłuhoŭvaje finansavyja intaresy Łukašenki, trapiŭ pad sankcyi ES i Šviejcaryi tolki ŭ žniŭni 2024 hoda.

Rasśledavalniki adznačajuć, što nie znajšli nivodnaha surjoznaha prajekta Al-Suvajdzi, dzie b nie prysutničaŭ Viktar Šaŭcoŭ. Padobnaja historyja i ź litoŭskaj firmaj Puiki investicija, dzie taksama nie abyšłosia bieź ludziej Šaŭcova.

Pakolki sam Šaŭcoŭ znachodzicca pad sankcyjami, kiravać aktyvami ŭ Jeŭropie niepasredna jon nie moža. Adnak, jak vyśvietliŭ BRC, u Litvie dziejničajuć šerah źviazanych ź im asob. Adzin ź ich — Alaksandr Hryboŭski, jaki pracavaŭ z Šaŭcovym z pačatku 90‑ch i da niadaŭniaha času byŭ členam praŭleńnia Puiki investicija. Jon taksama ŭdzielničaje ŭ inšych budaŭničych firmach, jakija ŭzvodzili elitnaje žytło ŭ samym centry Vilni.

Siarod partnioraŭ Hryboŭskaha ŭ litoŭskim biznesie fihuruje jašče adzin biełaruski mieniedžar — Vital Bandaryk. Jon taksama byŭ siarod dyrektaraŭ Puiki investicija, źjaŭlaŭsia hiendyrektaram «Biełzamiežbuda» i navat, jak śćviardžajuć aŭtary, u 2017 hodzie lacieŭ adnym samalotam z Łukašenkam u składzie dziaržaŭnaj delehacyi ŭ Indyju.

Reakcyja fihurantaŭ i nastupstvy

Kali žurnalisty pasprabavali atrymać kamientary, fihuranty schiemy vidavočna zaniervavalisia. Bandaryk kinuŭ słuchaŭku, zajaviŭšy, što nie viedaje Šaŭcova. Al-Suvajdzi taksama ŭsio admaŭlaŭ.

Adnak samy krasamoŭny fakt: litaralna praz dva tydni paśla vizitu žurnalistaŭ u ofis Puiki investicija Hryboŭskaha i Bandaryka śpiešna vyvieli sa składu praŭleńnia kampanii — mahčyma, sprabujučy zamieści ślady.

Vyniki rasśledavańnia ŭžo vyklikali rezanans u Litvie. Miascovyja palityki, uklučajučy byłoha ministra abarony, paabiacali inicyjavać pravierki z boku słužby finansavych rasśledavańniaŭ. Iranična, što ofis hetaj biznes-impieryi, źviazanaj z režymam Łukašenki, znachodzicca ŭ Vilni prosta nasuprać budynka litoŭskaha Siejma — simvał taho, nakolki hłyboka takija ludzi pranikli ŭ samaje serca Jeŭropy.

• 8
• 1
• 6
• 7
• 1
• 0
• 1
• 0